Ja senenhati chonka esé
20
Jatianra jatíbi nato joibo yoii Dios yoyo ika iki:2 “Eara min Ibo Dios iki, yanka yonokatai ikenbira Egiptonkonia en mia pikoa iki.
3 Ea Dios ikenbi wetsa diosboya iamawe.
4 Jawebi ja rabiti jawéki minbi ayamawe, jaweki jisaboakin ayamawe, naikanmea jisáboakin ayamakanwe, main iká jisábo ayamawe, mai naman iká aniparo chichó iká jisáboakin ayamakanwe.
5 Jabo yokati jaskarabo bebon beoyamawe, jainxon jabo rabiamawe, eara min Ibo Dios iki, ranoya Dios ixonra jan ea omisai papabaon ocha kopi, jaton bakebo, jaton bababo jainoax jaton bababaon bakebo en masá tenemati iki;
6 ikaxbira ea noixon nokon joi senenhaibo, jaton chiní bakebo waranka kaman kaikanabo, noixon en jato jakonhai.
7 Min Ibo Diossen jane arésbireskin janeyamawe, jaskara iketianra arésbireskin jakonmakin jawen jane janeketian jato masá tenemati iki.
8 Ja tantiti nete iketian, Ibo axonkin mekéti shinanwe.
9 Sokota nete teewe, jatíbi ja min akasaibo ja netebaon awé,
10 ikaxbi ja kanchis iti netera, Ibo Dios ixoni mekéti nete iki. Ja nete jawe teebi ayamawe, min bakenbira atima iki, min bake ainbaonbira atima iki, ja min yanka yonoai joninbira atima iki, ja min yanka yonoai ainbaonbira atima iki, ja min yoinabobira teetima iki, ja mibé jaa wetsankonia jonibira teetima iki.
11 Ibonra, sokota nete kaman aká iki nai, mai, aniparo, itan jatíbi jain ikáboribi, jaskaakin akáxa ja kanchis iti neten tantia iki. Ja kopíra ja tantiti nete Ibon jakon shinanxona iki, jaskara ikaxa iresama nete iki.
12 Nato main min Ibo Diossen mia basi jamanon, min papa betan min titaki yoiti ikin itan jato koirankin jakon ninkakaamawe.
13 Jato reteyamawe.
14 Wanoya ixonbi jato teayamawe.
15 Yometsoyamawe.
16 Mibé joniboki jansoxon jakonma imayamawe.
17 Mibé jonin xobo noibai jaon keenyamawe: jawen awinin keenyamawe, jawen yanka yonoti benbón keenyamawe, jawen yanka yonoti ainbaonbi keenyamawe, jawen wakanbi keenyamawe, jawen burronbi keenyamawe, jawen jayata jawékibaonbi keenyamawe”, iki.
Israelitabo onantibiresi Dioski raketa
18 Jatíbi israelitabora jaton jishnonbi tirin ikaitian, kanábo ikaitian, carnero machanbo xoon ikaitian, itan koinman manan mapoabo oinnax rakékana iki, jaskatira ochóres ikana iki.
19 Jaskákinra Moisés yoikana iki: —Min noa yoyo awe, noara miki yoiti iti iki; Diossen noa yoyo atinra noa keenyamai, noara mawánake —akin.
20 Jatianra Moiséssen jato yoia iki: —Rakéyamakanwe. Jawen koshi shinan mato onanmaira joke, itan jatíbitian jaon raketi mato ochayamanon ikax —akin.
21 Jatianra taxkéyamai jonibo ochóres ikanaitian, nai koin wisoa meran Dios iká patax Moisés kaa iki.