2 Refidimhainoax boaxa, tsoa jonibi jain jaama Sinaí mananhain nokókana iki, jainra ja manan bekeibabi ikana iki.

3 Ja mananmanxon Ibon kenaara jabé nokoanani Moisés jain mapeta iki, jainoara yoia iki: —Nato en mia yoia joiboribi Jacobnin chiní bake, israelitabo yoiwe:

4 ‘Egipciobo en jato akaira maton oinna iki, jaskáaxon nato ea ikainko en mato beaira maton oinna iki, teté pekaten joai keskatira mato joa iki.

5 Jaskara iken, ja senenhabekonti joi en aká, jatíbinin ea yoiti ixonkin senenhaaxa, wetsa jemabo xaran, nokon keenshaman jonibo mato iti iki, jatíbi nato maira nokona iki.

6 Matora jatíbi nato netemea sacerdotebo iti iki, eabiribi axonai nokon jonibora mato iti iki’. Jatíbi nato israelitabo jato yoiwe —akin.

7 Ja Ibon jaskara ati yoia jatíbi joibora, ja joni koshibo kenaxon Moiséssen jato yoia iki.

8 Jato jaskara yoiketianra israelitabaon jatíxonbi yoikana iki: —Jatíbi ja Ibon ati yoiabora non akai —akin. Jaskati jonibo yoyo ikana joira Moiséssen kaxon Ibo yoia iki,

9 jatianra Ibon yoia iki: —Nai koin kextó meranra ea mii bebon ikai, jatianra ea miibetan yoyo ikaitian jonibaon ninkáti iki, jatianra jatíbitian miki koshikanti iki —akin. Jatianra Moiséssen jaskati jonibo yoyo ikana joi, Ibo yoiribia iki,

10 jatianra Ibon yoia iki: —Ea rabiti kopí, rama itan bakish jato benxokaamatanwe. Jaton chopara patsákanti jake,

11 jatianra wetsa bakish iti kopí benxokaakanti iki, ea Ibora, wetsa bakish Sinaí mananhin jatíxonbi oinkanon ikax ea paketai.

12 Ja mananhin jonibo mapénaketian jain senenres nokókanti ja katemakin seréawe, jainxon ja mananki raketi jain mapéyamakanon jato yoiwe, jainxon patáxshamakanon jato yoiwe, jaskara ikenbi ja ochóma kaabora mawáti iki.

13 Tsonbira ja manan tii atima iki, jaskara ikenbi jan akára makaman iamaxon pian tsakaxon reteti iki. Joni iamax yoina inonbira ati iki, jara moa jatima iki. Carnero machan tii ati ikai ninkataxbichoresa ja manan tasenenain jonibo kati iki —akin.

14 Jatian Dios rabikanon ixon jonibo benxonkamaira Moisés mananmameax ipakea iki. Jonibaonra jaton chopa patsata iki,

15 jatianra Moiséssen jato yoia iki: —Wetsabakish iti kopí moa benxokaakanwe, jainxonra maton yorantimapari iki —akin.

16 Ja kimisha nete itin, nete xabataitianra kanáyabi tirin iká iki, jatianra nai koin kextó ja manan maxkaten iká iki. Carnero machan koshin xoon ikaiton imaara jatíbi ja peotain tsamatabo raketi saki ikana iki.

17 Jatianra Dios betan nokoananon ixon jaton peota ochó Moiséssen ja jonibo boa iki, ja boaxa manan tenaman tsamakana iki.

18 Chii tiritai meran Ibo jaki pakéketianra jatíbi ja Sinaí manan koinna iki. Horno meranoax ikai keskatira koin keyata iki, jatianra jatíbi ja manan koshinbires shakota iki.

19 Ja carnero machan xoon ikai kestenra, bebon tekíkaresa iki; Moiséssen yoyo akaitian, ja kopikin yoyo akara Diossen joi tirin ika iki.

20 Ja Sinaí manan bebon keyá ikainra Ibo paketa iki, jainxonra já ikainko mapénon ixon Moisés kenaa, Moisés mapeta iki,

21 jatianra Ibon yoia iki: —Naman kaxon jonibo keshantanwe, ja jain seneres iti seré winoxon ea oinkasira ikánake, jaskataxa icha mawákanake.

22 Ja sacerdoteboribira, epataxbi joti ikax benxokakanti iki, jaskayamaxbira mawákanti iki —akin.

23 Jatianra Moiséssen Ibo yoia iki: —Nato jonibora Sinaí mananman mapékantima iki, iresama meké iketianra jain senenres kati onantiakin min noa yoia iki —akin.

24 Ikaxbira Ibon yoia iki: —Moa naman, katanwe; japekáora Aarón betan mia neno mapetai. Sacerdote betan jonibora jain senenres iti en jato yoia winobeiranax ea ikain jotima iki, enra jato retenake —akin.

25 Moiséssenra ipakexon ja joiribi israelitabo jato yoia iki.