3 Eꞌu hau kiꞌami e,

au anuatae kiꞌa baha Tirama ena bamauri hatabu ahina hauna pouna eꞌu marereai karerena kewahi heremi,

iamo bariu naraonana marere karerena kewahi hanona kabataburanimi Tirama aꞌikakauma weiana rani hamonai ebaibeni ena robe maearimakia ikoikiai ꞌeukia hauna huari aonai katoꞌima haraina.

4 Pokina maearima baika aba bunianai tekatoto wai baiatamiai ṯemiaho.

Ia hanona eka Tirama tiꞌoatana ena aokoꞌo hoana pouna tiaꞌi banai haeaina ia kipokia ekia nabau hoa hoakia kiꞌa obokia tabakiai tibaonakia mai Iesu Keriso eka Obiapaka ikupaiana mo nipoki ainaka hauna tibakiꞌana.

Maearima neiakia ekia puma katehoaina pouna hanona aba waꞌi baha Puka robenai ehina ꞌuaina.

5 ꞌAbi neiana aba toꞌiobina iamo au nanuatae kabaraona muenimi.

Obiapaka^a ehore Isaraela haukia Aikupito hanonai ꞌarakia ebamaurina ia muriai weiakia aꞌi teaꞌikakauma haukia ikoikiai ebapururunakia.

6 Haeamona aneru baika ekia bero teaꞌina hiabuna ihobonai mo aꞌi temiaho ia kipokia ekia miaho ꞌekana tehabona,

ia hanona aba tabiri weiana aꞌi kemohu banaibanai haunai tebirinakia wapura aonai ṯemiaho,

weia Tirama ehore parenakia katemiaho keaomo bakai apaꞌuana wapunai puma katehoaina.

7 Taeara ihobonaimo,

Sodoma mai Gomora haeamona aiara herekiai haukia nabau akakia mai hoahoa kiꞌa obokia tebabainakia hanona iruba banai banai pumana tehoaina,

ba ihaiha weiana hanona aika ikoikai ibaraonaka puma aꞌi hamahoaina paunai.

8 Ihobonaimo,

maearima neiakia baiatamiai tetoto haukia abomo baꞌiobi haukia baiꞌoikia neiakia ekia nibiai hoahoa ꞌopukia tibabai kipokia hauanikia tiaꞌi kiꞌanakia,

Tirama ena hiabu tibakiꞌana haeamona kupa anerukia nuabikia tiꞌabi kiꞌa benakia.

9 Mikaela aneru ꞌarakiai hauna hanona hoahoa uahomana aꞌi ebabai ꞌapuana.

Tiaporo ohi Mose eꞌari hauanina tebaihara taeaina raninai ꞌabi pumakiai tiaporo aꞌi ehinabe pahihina,

ia ehina bena etibaha,

“Obiapaka kehore oi kebataniꞌo.”

10 Ia maearima neiakia hanona taba obokia aꞌi tiobo haukia ahakiai tiꞌabi kiꞌa,

mai ekia ꞌiobi hanona ihobona mahi ꞌaki weiakia ekia raonaraona ahaꞌi haukia ꞌabakia hauanikia taikia titai,

ekia hoahoa neiakia tihore ia kipokia tibapururunakia.

11 Ia herekiai hanona kekiꞌa kiꞌa bahana.

Pokina taeara weiana Kaino ena hoahoa kiꞌa obona taina tetai.

Moni paunai kipokia teaoainakia beho weiana Balam ebabaina hauna aonai tetoto.

Kora ebakiꞌa ꞌabana,

ia abokiamo Tirama tebakiꞌana,

ua buonai taeara ihobonaimo ia abokiamo katepururu.

12 Wai emi raonaꞌau miatoꞌukia anianikia aokiai maearima neiakia titoto ꞌopu hoahoakia tibabai,

ekia haumaea ahaꞌi kipokia mo tiraonanakia.

Ihobona matoha ꞌauhao weiakia baura nihore niabunakia nikaꞌainakia ia abara haꞌi tibaibeni,

haeamona matoha matiu weiakia ekia buaꞌa ranina tohanai,

iamo buabuakia haꞌi tibaramanakia,

matiu weiakia hanona mai ramukia aba ipuhuꞌau haeamona aba teꞌari baihana.

13 Ia hanona matoha ꞌakuai roio nihara puni ꞌabana kipokia ekia haumaea hoahoakia tiwaira tina matoha ꞌutoꞌuto ꞌabakia,

haeamona matoha bihiu weiakia tiaru ꞌabaea haukia ꞌabakia.

Maearima weiakia hanona wapura banai banai aonai kateꞌao.

14 Enoka hanona Adamu ena uru ibaꞌabaihau hamomona aonai hauna ena mahabanai ꞌabina aonai maearima neiakia robakia ṉa eahu aihona,

“Obiapaka hanona ena aneru robekia boꞌona ꞌakina kipokia katemai.

15 Maearima ikoikiai kebabakainakia,

Tirama aꞌi temariki aina haukia ekia babai kiꞌa pumakia kebahoainakia,

haeamona Tirama herenai teꞌabi kiꞌa haukia ikoikiai behoai kehorotinakia.”

16 Maearima neiakia hanona ṯeururu toꞌo baihana haeamona maearima baika tikaiahinakia,

kipokia ekia nuatae kiꞌa obokia taikia titai,

kipokia tiapainakia,

mai maearima baika tibaꞌamenakia herekiai taba namokia pateaꞌi paunai.

17 Eꞌu hau kiꞌami e,

eka Obiapaka Iesu Keriso ena iuhubeau haukia taba wairai kerama hauna tehina benimi ꞌabikia katoraona ꞌininakia.

18 Haiamiai teꞌabi tetibaha,

“Rani orekia katemai raninai Tirama aꞌi timariki aina maearimakia baika katewaira tina bapoꞌo poꞌo ꞌabikia heremiai katehinanakia haeamona kipokia ekia nuatae kiꞌa obokia taikia katetai.”

19 Maearima neiakia robakia teahuna haukia hanona wai Tirama ena marea haumi baiatami ai hoa hore tibaramanakia,

hanopaka maearimakia ekia nuatae taikia titai,

Auba Robe aokiai aꞌi nemiaho.

20 Ia,

eꞌu hau kiꞌami e,

kipomi emi aꞌikakauma robena ahanai emi mauri katobakori ꞌauna mai Auba Robe ena baraibarai ai katobahubaꞌari.

21 Eka Obiapaka Iesu Keriso ṯoꞌimana ena aokoꞌoai keaoainimi mauri banaibanai aonai,

kipomi Tirama ena raonaꞌauai katomiaho.

22 Weiakia mai ekia raona kaiꞌau kaiꞌau haukia katoaokoꞌo ainakia.

23 Baika mauri pahihina matoha iruba ꞌabana aonai ṯemiaho haukia mai taburami katobarainakia katekarahi katemauri,

haeamona baika hauani ena aka kiꞌai ekia mauri teꞌopu haukia katoaokoꞌo ainakia mai taꞌutaꞌumi,

ekia kiꞌa aonai aꞌi temeberi totonimi,

ekia nabau hoahoa kiꞌa obokia katobakiꞌanakia matoha habuni ꞌopukia ꞌarikia aꞌi tuꞌari ꞌabana.

24 Tirama hanona etabura kebarainimi ketaina aꞌi katoꞌeho,

ba kemaiai harainimi ena nuabi aonai kebaka totonimi,

weiana emi beho keahaꞌi ia wairanai mai emi aonamo keapaꞌua.

25 Ia hanona Tirama hamona mo,

ikupaiana aika ibamaurika hauna.

Iesu Keriso eka Obiapaka paunai Tirama herena nuabi,

mariki hoana,

tabura,

mai ena hiabu katemiaho,

ꞌuaina ranikia ikoikiai aokiai,

emai bariu,

keaomo banaibanai.

Amen.