Marere Ibaruana
IOANE
Ererena Hauna
Banamo ꞌAbina.
1
Au,
Ioane Tirama ena marea ekia kiro hauꞌu,
Tirama etinaꞌaniꞌo babiꞌemu nahumu kipokia narere benimi,
wai naraonaꞌau ai tohanimi,
aumo ikupaiaꞌu ahaꞌi,
ia Tirama ena ꞌabi tohana teꞌiobina haukia ikoikiai abokiamo wai tiraonaꞌau ainimi.
2 Pokina Tirama ena ꞌabi tohana hanona aika aokai nemiaho,
haeamona aika herekai kemiaho keaomo banaibanai.
3 Raonaꞌauai mai ꞌabi tohanai nahamiaho hanona Tirama aika Hamaka mai Nahuna Iesu Keriso katehore baraibarai apaꞌuana,
aokoꞌo mai baibua katebenaka.
Ha Ha ꞌAbaka Kaharaonaꞌau ainakia.
4 Aoꞌu enamo kiꞌa baha pokina pou aona nahumu baika hanona Hamaka ehina benaka akana kahababaina ihobonai Tirama ena ꞌabi tohanai ṯemiaho.
5 Ua buonai,
babiꞌe kiꞌamu e,
bariu au wai narere benimi hanona rauhubu ꞌabina mahamahana ahaꞌi,
ia rauhubu ꞌabina aba ꞌuainai haꞌikakauma aonai haona hauna,
ba au oi nanoiniꞌo,
aika ikoikai hanona ha ha ꞌabaka kaharaonaꞌau ainakia.
6 ꞌAbaka kaharaonaꞌau ainakia hanona ihobona aika Tirama ena rauhubu ꞌabikia kahakaꞌa ainakia ꞌabana.
Ena rauhubu ꞌabina neiana hanona aba popouna ꞌuruna tona,
wai ikoimiai hanona raonaꞌau aonai katomiaho.
Keriso Ena ꞌOu Haukia.
7 Baiꞌoi haukia boꞌona aba tekarahi hanopaka maikoinai.
Maearima weiakia hanona Iesu Keriso hauaniai emai hauna aꞌi tibatohana.
Maearima uahomakia hanona baiꞌoi haukia mai Keriso ena ꞌou haukia.
8 Kipomi katoꞌima ꞌima harainimi,
weiana taba weiakia buokiai haka ꞌari haukia ikoikiai aꞌi katoꞌubo ainakia,
weianai arami maikoina katoaꞌina.
9 Hau ha Keriso ena baꞌiobi aꞌi nikaꞌaina mai ahanai baꞌiobi haeai nihore ꞌauna hauna hanona herenai Tirama ahaꞌi.
ꞌA hau ha Keriso ena baꞌiobi nikaꞌaina hauna hanona herenai Hamana mai Nahuna ohi ṯemiaho.
10 Ua buonai,
hau ha kemai heremi,
baꞌiobi neiana aꞌi kemai aina raninai,
aꞌi katoaꞌi taeana emi itu aokiai,
haeamona banamo ꞌabina ha aꞌi katohinana ia herenai.
11 Pokina hau ha maearima weiana eaꞌi taeana hauna hanona hau weiana ohi ena aka kiꞌa tibabai haeamona.
Banamo ꞌAbina Orena.
12 Kahina beniꞌo ꞌabikia hanona eboꞌo,
ia marere hamonai karerena hanona aꞌi nanuatae.
Eꞌu buabeni hanona kawahi kaihaniꞌo ba hararua kahabaiwaira kahaꞌabiꞌabi,
weiana eka ꞌabi kahabaore harainakia mai aonamoka.
13 Uahoꞌabamu Tirama etinaꞌana babiꞌena nahuna ekia banamo ꞌabina tibeniꞌo.