Te kope ꞌāꞌana i pāpaꞌi i te parau nei ko Hura, taina o Tanatiako (1). I pāpaꞌi ai ki te nuꞌu kiritiano mo no-noꞌi ki a rāua pē nei ē: «E maꞌu hio-hio ꞌi roto i te kōrua māhatu te hāpī parautiꞌa vaꞌai mai e te ꞌAtua ki a tātou ki te nuꞌu haꞌataꞌa e ia māꞌana ꞌe e hāpaꞌo ꞌo huri hai manaꞌu taŋata» (3). E ai rō ꞌana, paꞌi, ꞌi roto i te taina te nuꞌu kī a rāua he kiritiano huri i te hāpī parautiꞌa o te ꞌAtua (4).

Te kī ꞌa Hura: te nuꞌu nei pa he nuꞌu era o Tōroma ꞌe o Kōmora. Te meꞌe o rā ŋā kona, ꞌi ira te nuꞌu e hara taparahi-taꞌata era. Mo Hura, ꞌina he nuꞌu hopeꞌa o te rake-rake pa he nuꞌu huri nei i te hāpī parautiꞌa o te ꞌAtua (8–10). ꞌO ira e kī mai nei mo rāua pē nei: «he raŋi vai kore», «he tumu ꞌina he hua», «he vave taparahi-taꞌata» ꞌe «he hetuꞌu eꞌa mai te rāua ara», ꞌe he haka ꞌite mai: «ko ai era ꞌā te ūtuꞌa mo rāua, he noho mau rō ꞌāvai ꞌi roto i te kona hopeꞌa o te pōꞌuri» (12–13).

Mo haka mao o te parau nei he hatu mai e Hura pē nei ē: «ꞌE a kōrua, e te taina ē, e haka hio-hio e oho nō ꞌi roto i te hāpī parautiꞌa hai haka moe i te manaꞌu ꞌi ruŋa i a Ietū», «e uꞌi ꞌo rehu te rahi o te haŋa o te ꞌAtua mo tātou» ꞌe «e haka ꞌaroha ꞌe e hāꞌūꞌū e oho kōrua i te nuꞌu e ꞌaka-ꞌaka rō ꞌana te rāua manaꞌu» (20–22).