Ko Pauro ꞌe he ꞌāpōtoro reo-reo
11
¡Pē hiva ꞌā a kōrua ana haꞌaoromaꞌi mai i te vānaŋa tuꞌu pa he meꞌe maꞌa-maꞌa ka kī atu ena!
E uꞌi e haꞌaoromaꞌi mai.
2 ꞌIna kōrua ko rehu:
e haŋa rō atu ꞌana a au ki a kōrua pa he haŋa iŋa ena ꞌā o te ꞌAtua ki tōꞌona taŋata.
A kōrua ko haka haꞌamoꞌa-moꞌa era ꞌana e au mo hāipo-ipo ki te kenu mau nō e tahi,
he Kiritō,
ꞌe ko haŋa ꞌana a au mo maꞌu i a kōrua ki muꞌa i a ia pa he viꞌe ꞌina kai noho ꞌā ki te taŋata ꞌe hāpaꞌo i a ia mo tāꞌana kenu mau nō.
3 ꞌE,
e riꞌa-riꞌa rō ꞌā a au ꞌo kore te kōrua haŋa parautiꞌa ki te Kiritō,
pa he meꞌe topa ki a Eva ꞌi te hora haka roŋo ki te reo-reo o tū kōreha era ko Rukifero.
4 ꞌE,
nā kōrua e haka roŋo ꞌā hai koa ki te nuꞌu vānaŋa atu o ruŋa i te Ietū kē ki te Ietū haka ꞌite atu era e mātou.
E haka roŋo takoꞌa ꞌana hai koa ki te roŋo kē taꞌe hāpī atu e mātou,
ꞌe ki te vārua kē taꞌe ki te Vārua Maitai noho ꞌi roto i a kōrua.
5 ꞌIna a au he ŋaroꞌa pē nei ē:
kope taꞌe hōnui a au ꞌi muri i tū ŋā ꞌāpōtoro reo-reo tuꞌu atu ena ki a kōrua manaꞌu ena pē nei ē:
ꞌata hau rō atu ꞌō a rāua ꞌi te hōnui ki a au.
6 He aŋi ꞌana,
pēaha,
kope taꞌe haka kē a au mo vānaŋa.
Ka ai atu pē ira,
e ꞌite rō ꞌana a au i te hāpī parautiꞌa o ruŋa i te ꞌAtua,
ꞌe ko haka takeꞌa ko oho atu ꞌā hai meꞌe taꞌatoꞌa aŋa e mātou.
7 ꞌI te hora haka ꞌite atu ōꞌoku i te roŋo riva-riva o te ꞌAtua,
ꞌina a au he kī atu mo ꞌauhau mai;
i aŋa a au mo ravaꞌa o tāꞌaku rāveꞌa.
Ki te kōrua manaꞌu,
¿he kope taꞌe hōnui au ꞌo te meꞌe ōꞌoku pē ira?
I aŋa ai a au pē ira mo te kōrua riva-riva.
¿Ka kī ꞌō te meꞌe nei he hara e tahi?
8 Te parautiꞌa,
i tano ai a au mo aŋa atu ki a kōrua taꞌe e ꞌauhau mai ꞌi te meꞌe era i haka maꞌu rō mai e te tētahi taina o te tētahi atu kona hai meꞌe tara mōꞌoku.
9-10 ꞌE,
ꞌi rā hora era ōꞌoku ꞌi muri i a kōrua,
e hape era tāꞌaku meꞌe,
ꞌina a au he no-noꞌi atu.
O te taina tuꞌu mai mai Mātērōnia i hāꞌūꞌū mai.
A au,
paꞌi,
e uꞌi rō ꞌana ꞌo riro a au he meꞌe paŋahaꞌa e tahi mo kōrua,
ꞌe pē ira a au e aŋa e oho nei ꞌi te kona taꞌatoꞌa o Ākāia.
ꞌO ira,
ꞌina e tahi kope o rā ŋā kona mo kī i tōꞌoku reo-reo ana teꞌo-teꞌo a au o ruŋa i te taꞌe no-noꞌi i te moni mo haka ꞌite i te roŋo riva-riva o te ꞌAtua.
ꞌE tāꞌaku vānaŋa nei e kī atu ena pa he parautiꞌa ena ꞌā o tāꞌaku vānaŋa taꞌatoꞌa kī atu o ruŋa i te Kiritō.
11 Te taꞌe no-noꞌi atu ōꞌoku mo hāꞌūꞌū mai,
¿e taꞌe haŋa atu ꞌana a au ki a kōrua?
¡He ꞌAtua te meꞌe i ꞌite e haŋa rō atu ꞌana a au!
12 ꞌE,
e ko haka kore a au i tōꞌoku haka tere iŋa nei he taꞌe no-noꞌi atu hai moni,
ꞌo teꞌo-teꞌo tū nuꞌu tuꞌu atu ena ki a kōrua pē nei ē:
e aŋa rō ꞌana a rāua pa he aŋa iŋa nei ꞌā o mātou.
13 A rāua he ꞌāpōtoro reo-reo e haka tuꞌu rō ꞌana i a rāua pa he ꞌāpōtoro o te Kiritō.
14 Te meꞌe nei taꞌe he meꞌe mo māere;
a Rukifero mau ꞌā e haka tuꞌu rō ꞌana i a ia pa he merahi ꞌana-ꞌana o te ꞌAtua.
15 ꞌE mo aŋa o Rukifero i te meꞌe tuꞌu pē ira,
taꞌe ia he meꞌe mo māere te haka tuꞌu o te nuꞌu aŋa ki a ia pa he nuꞌu tano aŋa ki te ꞌAtua.
Te meꞌe ka topa ena ki te nuꞌu pē nei he ūtuꞌa tano ki te rāua meꞌe aŋa.
He haka paka iŋa o Pauro
16 ꞌĪ a au he kī haka ꞌou atu:
ꞌina kōrua ko manaꞌu e maꞌa-maꞌa rō ꞌana a au.
ꞌE mo ai pē ira e manaꞌu ena,
ka haka rē mai ia mo vānaŋa atu ōꞌoku pa he maꞌa-maꞌa,
ki tano takoꞌa ai au mo teꞌo-teꞌo ꞌiti-ꞌiti atu o ruŋa i a au mau ꞌā,
17 ka ai atu te teꞌo-teꞌo nei he meꞌe maꞌa-maꞌa e tahi ꞌe taꞌe ꞌō he meꞌe mo koa o te ꞌAtua.
18 Nuꞌu riꞌa-riꞌa,
paꞌi,
te nuꞌu,
hai manaꞌu taŋata,
e teꞌo-teꞌo ena o ruŋa i a rāua ꞌe o ruŋa i te rāua meꞌe aŋa.
¿He aha ia a au ana taꞌe teꞌo-teꞌo takoꞌa atu?
19 ¡A kōrua e manaꞌu ena he nuꞌu mārama-rama kōrua,
ꞌe te aŋa he haꞌaoromaꞌi hai haŋa i te nuꞌu maꞌa-maꞌa!
20 Mo tuꞌu atu,
paꞌi,
o te nuꞌu haꞌariro i a kōrua he ꞌekaravo o rāua,
te nuꞌu toꞌo i te kōrua meꞌe,
te nuꞌu reo-reo atu,
te nuꞌu taꞌe haka au atu,
ꞌe te nuꞌu vā-vā atu he haꞌaoromaꞌi e kōrua.
21 ¡Ko te haꞌamā ꞌō ꞌi te pūai kore o mātou mo meꞌe takoꞌa atu pē rāua!
ꞌE,
ꞌi te meꞌe era ꞌina a rāua he riꞌa-riꞌa mo teꞌo-teꞌo,
ꞌina takoꞌa ia a au e ko riꞌa-riꞌa,
ka ai atu pa he kope maꞌa-maꞌa a au e vānaŋa atu ena.
22 ¿He ꞌevereo a rāua?
Pē ira takoꞌa ꞌana a au.
¿He itaraera a rāua?
Pē ira ꞌana a au.
¿He hakaara a rāua o ꞌAparahama?
Pē ira takoꞌa ꞌana a au.
23 ¿He tāvini a rāua o te Kiritō?
ꞌAta hau rō atu tōꞌoku tāvini iŋa ki te Kiritō ki a rāua,
ka ai atu ꞌi tōꞌoku kī i te meꞌe nei,
e vānaŋa ꞌana a au pa he maꞌa-maꞌa.
ꞌAta rahi rō atu tōꞌoku aŋa mōꞌona ki a rāua,
ꞌata rahi rō atu tōꞌoku puru iŋa ꞌi roto i te hare maꞌuꞌaurī ꞌo te aŋa ki te Kiritō ki a rāua,
ꞌata rahi rō atu te tiŋaꞌi iŋa mai i a au,
ꞌe i rahi rō te mahana i oho rō a au mo mate.
24 E rima tiŋaꞌi iŋa mai e te hūrio e toru ꞌahuru mā iva ꞌuaka ki te tuaꞌivi.
25 E toru puꞌa-puꞌa iŋa mai hai miro,
ꞌe e tahi tamaꞌi iŋa mai hai māꞌea.
E toru oho iŋa ōꞌoku ꞌi ruŋa i te pahī i emu ai te pahī.
E tahi pō,
e tahi ꞌōtea i noho ai a au ꞌi roto i te vaikava.
26 ꞌI tōꞌoku ara taꞌatoꞌa i piri rō mai meꞌe rahi nō atu ꞌati:
he rio ko ꞌata rahi ꞌā e te vai,
he toke-toke,
he haŋa o tōꞌoku taŋata he hūrio ꞌe o te nuꞌu o te rua henua mo tōtōā mai.
I piri mai ai te ꞌati nei ꞌi te kona noho taŋata,
ꞌi ꞌuta,
ꞌi roto i te vaikava,
ꞌe ꞌi muri i te nuꞌu kī e haka moe rō ꞌana a rāua i te manaꞌu ꞌi ruŋa i a Ietū ꞌe,
te parautiꞌa,
taꞌe pē ira.
27 ꞌI rā ŋā ara takoꞌa i rahi rō tāꞌaku aŋa ꞌe i rohi-rohi rō a au;
i rahi rō te mahana ꞌina a au kai haꞌuru;
ꞌi tōꞌona mahana i maruaki rō ꞌe i pohe rō ki te vai.
I ai rō te mahana ꞌina a au kai kai,
ꞌe kē mahana i takeꞌo rō ꞌi te kahu kore mo puꞌa.
28 ꞌE taꞌe nō ꞌō he ŋā meꞌe nei te meꞌe i topa mai ki a au;
takoꞌa paurō te mahana he manaꞌu nō tāꞌaku aŋa ki te nuꞌu taꞌatoꞌa haka moe i te manaꞌu ꞌi ruŋa i a Ietū,
29 ꞌo viri tāꞌue e tahi o rāua ki roto ꞌi te hara ꞌo te taꞌe pūai o tōꞌona haka moe iŋa i te manaꞌu ꞌi ruŋa i a Ietū ꞌe ꞌo te haka hara i a ia e te kope e tahi.
Ka meꞌe era,
he riri ia a au mo rā kope era ꞌāꞌana i haka hara.
30 Meꞌe taꞌe haŋa ꞌāꞌaku he teꞌo-teꞌo o ruŋa i a au;
ꞌe mo teꞌo-teꞌo atu,
he teꞌo-teꞌo atu ia a au ꞌi tōꞌoku taꞌe pūai.
31 Te ꞌAtua,
Matuꞌa o te tātou Pūꞌoko Haka Tere ko Ietū,
kope ki a ia ana haꞌahana-hana ꞌātā ki te hora hopeꞌa,
ko ꞌite ꞌā e kī atu ꞌana a au i te parautiꞌa.
32 ¡ꞌĀ!
ꞌI te hora era ōꞌoku ꞌi Rāmako,
te suerekao aŋa ki te ꞌariki ko ꞌĀreta i haka ꞌauario rō i te ꞌōpani o ira mo ꞌa-ꞌaru i a au.
33 Ka ai atu pē ira,
i ai rō te nuꞌu i haka topa i a au ki haho o Rāmako ꞌi roto i te kānato.
Pē ira a au i tere ai mai te rima o rā suerekao.