Te parau nei i pāpaꞌi ai e Pauro mo te nuꞌu taina o Kōrinto. I pāpaꞌi ai ꞌi te meꞌe era e rahi rō ꞌana te meꞌe taꞌe tano aŋa e tētahi o rā ŋā taina. He hatu ia e Pauro pē hē te haka tere iŋa tano mo rāua mo te nuꞌu he kiritiano. Te meꞌe raꞌe i kī: e ai rāua e tahi mau nō manaꞌu ꞌi te meꞌe o te ꞌAtua (1.10–17).

Te kona nei ko Kōrinto, e māhani era e te nuꞌu ꞌi rā noho iŋa, he kona ꞌi ira e rahi rō ꞌā te nuꞌu aŋa i te meꞌe hano-hano pohe nō e te hakari, ꞌātā e ai rō ꞌana te rāua vānaŋa pē nei ē: «e kōrinto ꞌana», he kī iŋa mo te nuꞌu aŋa i te meꞌe hopeꞌa o te hara. ꞌE te ꞌati o te nūnaꞌa taina haka moe i te manaꞌu ꞌi ruŋa i a Ietū o rā kona, te kope e tahi o roto o rāua ko moe ꞌana i te viꞌe o tōꞌona matuꞌa (5.1), he meꞌe ꞌina he aŋa korohaŋa e te nuꞌu taꞌe he kiritiano.

Te meꞌe taꞌe tano takoꞌa i aŋa e te taina o Kōrinto he horo i te rāua taina haka moe i te manaꞌu ꞌi ruŋa i a Ietū ꞌi muꞌa o te huē taꞌe he kiritiano, he meꞌe ꞌina ko aŋa e te nuꞌu haka moe i te manaꞌu ꞌi ruŋa i a Ietū. He ture e Pauro ꞌe he kī mo taꞌe aŋa haka ꞌou pē ira. E ai rō ꞌana, paꞌi, te nuꞌu o roto o rāua mo haka tī-tika i te rāua ture.

Tētahi ia nuꞌu taina o Kōrinto e manaꞌu era: meꞌe taꞌe tano te meꞌe he hāipo-ipo, te auraꞌa, te noho pa he kenu pa he viꞌe, ꞌe he haka ꞌite e Pauro taꞌe he parautiꞌa te manaꞌu era o rāua. Ka ai atu pē ira, i haka rē nō ki te rāua manaꞌu, ꞌe pē nei i haka mao i kī ai: te kope haŋa mo hāipo-ipo, ko tano ꞌana, ꞌe te kope haŋa mo noho taureꞌa-reꞌa ꞌina ko piri tane, ꞌata hau rō atu i te riva-riva (7.38).

I ai takoꞌa rō te taina o Kōrinto e ꞌaka-ꞌaka rō ꞌana te manaꞌu o ruŋa i te ora iŋa haka ꞌou mai te mate (15.12). ꞌE ꞌi ruŋa nei i haka manaꞌu haka ꞌou ai e Pauro: he parautiꞌa mau ꞌana ko ora ꞌā a Ietū mai te mate (15.3–8). ꞌE he haka ꞌite pē nei ē: «Pa he ai iŋa o te mate hai taŋata mau nō e tahi, pē ira takoꞌa ꞌana hai taŋata mau nō e tahi ka ai ena te ora iŋa mai te mate» (15.21).

I haꞌaauraꞌa rō e Pauro ki te ŋā taina nei o Kōrinto: te nūnaꞌa taŋata haka moe i te manaꞌu ꞌi ruŋa i a Ietū he hakari o Ietū (12.12–30). I haka ꞌite takoꞌa rō: ꞌina e tahi hauhaꞌa te ꞌite meꞌe rahi meꞌe, te ꞌite mo vānaŋa meꞌe rahi nō atu ꞌarero, ꞌe te haka moe o te manaꞌu ꞌi ruŋa i a Ietū mo taꞌe haŋa ki te rua. ꞌO ira i kī ai pē nei ē: «E toru meꞌe ꞌina e ko kore ki te hora hopeꞌa: he haka moe iŋa i te manaꞌu ꞌi ruŋa i te ꞌAtua, he ŋatu o te haŋu ꞌi ruŋa i tāꞌana meꞌe hōrea mai era, ꞌe he haŋa ki te rua. ꞌE te meꞌe hopeꞌa o te hauhaꞌa o te ŋā meꞌe nei e toru he haŋa ki te rua» (13.13).