He tātara iŋa o ꞌĒteva
7
He ꞌui e te oromatuꞌa hopeꞌa o te ra-rahi ki a ꞌĒteva:
—¿He parautiꞌa te meꞌe kī nei o ruŋa i a koe?
2 He pāhono e ꞌĒteva:
—E te taina ē,
e kuā koro ē,
ka haka roŋo mai rā:
Te tātou ꞌAtua,
i a ia te ꞌana-ꞌana o te pūai taꞌatoꞌa,
ko haka takeꞌa ꞌana i a ia ki te tātou tupuna ko ꞌAparahama ꞌi Mētōpōtāmia,
ꞌi te hora kai oho kai noho ꞌā a ꞌAparahama ꞌi Hārana,
3 ꞌe i kī rō:
“Ka haka rē tuꞌu kāiŋa ꞌe tuꞌu huaꞌai ꞌe ka oho ki te henua ka haka takeꞌa atu ena e au”.
4 »He eꞌa ia a ꞌAparahama mai te henua o te kārea he oho he noho ꞌi Hārana.
ꞌI ira i mate ai tōꞌona matuꞌa tane.
He maꞌu mai ia e te ꞌAtua i a ꞌAparahama ki te henua nei e kōrua e noho atu ena.
5 »I tuꞌu mai era,
kai vaꞌai e te ꞌAtua,
ꞌi rā hora,
e tahi parehe henua mōꞌona,
korohaŋa e tahi parehe ꞌiti-ꞌiti.
Ka ai atu pē ira,
i hōrea rō e te ꞌAtua e vaꞌai rō ki a ia mo tōꞌona hakaara.
(ꞌI rā hora kai ai ꞌana te poki ꞌa ꞌAparahama).
6 ꞌE i kī takoꞌa rō e te ꞌAtua:
tōꞌona hakaara e noho rō ꞌi te henua kē pa he taŋata o te rua henua,
e riro rō he ꞌekaravo o te nuꞌu o rā henua,
ꞌe e raveꞌino rō i a rāua e maha hānere matahiti.
7 »I kī takoꞌa rō pē nei ē:
“E haka ūtuꞌa rō e au i te hau haka ꞌekaravo i tōꞌoku taŋata.
Ki oti rā ūtuꞌa,
he eꞌa tōꞌoku taŋata mai rā henua mo tāvini mai ki a au ꞌi te kona nei”.
8 ꞌI te haꞌaꞌau iŋa o te ꞌAtua ararua ko ꞌAparahama,
i kī ai e te ꞌAtua ki a ꞌAparahama:
māꞌana e hāpaꞌo i a ia ꞌe i tōꞌona hakaara,
ꞌe mo kuā ꞌAparahama e haꞌamuri ꞌe e haꞌatura ki a ia.
Pa he tāpaꞌo o rā haꞌaꞌau he kī e te ꞌAtua:
e hore te kiri o te kinoŋa o te ŋā poki mo tāpura he taŋata ꞌāꞌana.
»ꞌO ira a ꞌAparahama,
ꞌi te vaꞌu mahana o te poreko o tāꞌana poki ko Itaꞌata,
i hore ai i te kiri o te kinoŋa.
Pē ira takoꞌa i aŋa ai e Itaꞌata ki tāꞌana poki ko Hākovo,
ꞌe e Hākovo ki tāꞌana ŋā poki,
he matuꞌa o te hoꞌe ꞌahuru mā piti huaꞌai o te itaraera.
9 »Te ŋā poki raꞌe ꞌa Hākovo,
ꞌi te mākota ꞌi te rāua taina ko Kōsē,
he toꞌo mai he hoꞌo ki te nuꞌu mo ꞌekaravo,
ꞌe he maꞌu e rā nuꞌu ki Ehipto.
ꞌE,
ꞌi te ai ꞌi ruŋa i a Kōsē te mata o te ꞌAtua,
10 he haka eꞌa te aŋa i a ia mai roto i te ꞌati taꞌatoꞌa ꞌe he vaꞌai i te mārama-rama.
ꞌO ira te ꞌariki o Ehipto i haŋa ai ki a Kōsē,
he haka suerekao ꞌe he haka riro he pūꞌoko haka tere o tōꞌona meꞌe taꞌatoꞌa.
11 »He topa ia te oŋe ꞌe te ꞌati ꞌi Ehipto ꞌe ꞌi Kanaꞌana:
he kore te meꞌe mo kai o te tātou tupuna.
12 I ꞌite era a Hākovo ko Ehipto te kona i haꞌaputu i te kai,
he uŋa i tāꞌana ŋā poki,
he tupuna o tātou,
mo oho mo hoꞌo mai hai kai.
He oho iŋa raꞌe nei o rāua.
13 »ꞌI te rua oho iŋa ki Ehipto i haka ꞌite iho ai a Kōsē ki tōꞌona taina ko ai mau a ia,
ꞌe pē ira te ꞌariki i ꞌite ai he aha te hau o Kōsē.
14 I oho era he uŋa e Kōsē mo oho o tōꞌona matuꞌa ꞌe o tōꞌona huaꞌai taꞌatoꞌa.
Rā ŋā nuꞌu e hitu ꞌahuru mā pae.
15 Pē ira a Hākovo i tuꞌu i noho ai ꞌi Ehipto;
ꞌi ira i mate ai,
ꞌe ꞌi ira takoꞌa i mā-mate ai tāꞌana ŋā poki,
tupuna o tātou.
16 Te hakari o Hākovo i maꞌu i hoki rō ki Tīkeme;
ꞌi ira i tanu ai ꞌi te henua hoꞌo e ꞌAparahama mai te ŋā poki ꞌa ꞌĀmoro.
17 »I hāhine era mo tano o te hōrea kī e te ꞌAtua ki a ꞌAparahama,
ko ꞌata rahi ꞌana te itaraera ꞌi Ehipto.
18 He oꞌo ia te ꞌariki ꞌāpī o rā henua taꞌe māhani ki a Kōsē.
19 Te ꞌariki nei i tōtōā rō i te tātou taŋata;
ꞌi te haŋa mo haka kore i a rāua,
he haka hoa i te ŋā poki poreko iho mo mā-mate.
20 »ꞌI rā noho iŋa i poreko ai a Mōtē,
poki hopeꞌa o te nehe-nehe.
E toru ꞌāvaꞌe i naꞌa i hāpaꞌo ai ꞌi te hare.
21 I tuꞌu era te mahana ꞌina he rāveꞌa toe mo naꞌa mo oho nō i tū poki era ꞌi ira,
he maꞌu he naꞌa ꞌi te kona kē.
He ravaꞌa ia e te poki vahine o te ꞌariki ꞌe he hāpaꞌo pa he poki mau ꞌā ꞌāꞌana.
22 Pē ira a Mōtē i hāpī ai hai haka tere iŋa o te ehipto,
ꞌe he riro he taŋata hōnui ꞌi tāꞌana meꞌe aŋa ꞌe ꞌi tāꞌana meꞌe kī.
23 »I tano era te maha ꞌahuru matahiti o Mōtē,
he oho he uꞌi i tōꞌona hau,
he itaraera.
24 I takeꞌa era e tōtōā ꞌā e te ehipto i te itaraera e tahi,
he toꞌo mai he tiŋaꞌi he haka mate i tū ehipto era.
25 Ki tōꞌona manaꞌu e aŋi-aŋi rō e tōꞌona taina he itaraera:
hai ia te ꞌAtua ka haka eꞌa era i a rāua mai roto i te ꞌati,
ꞌe ꞌina kai aŋi-aŋi.
26 »ꞌI te rua mahana,
he takeꞌa e Mōtē e rua itaraera e moto ꞌā.
ꞌI te haŋa mo taꞌe moto haka ꞌou o rā ŋāŋata he kī:
“He taina kōrua;
¿he aha rā e moto ena?”.
27 Te kope era ꞌāꞌana te ꞌata puꞌa i te rua he tono i a Mōtē ꞌe he kī:
“¿ꞌA ꞌai koe i haka pūꞌoko o mātou?
28 ¿E haŋa ꞌā koe mo tiŋaꞌi mo haka mate mai i a au pa he tiŋaꞌi iŋa ōꞌou i tū ehipto era o ꞌaŋataiahi?”.
29 »I ŋaroꞌa era e Mōtē i rā vānaŋa he riꞌa-riꞌa.
He eꞌa he tere ki te rua henua te ꞌīŋoa ko Mariana.
ꞌI ira i noho ai,
he hāipo-ipo ꞌe he poreko e rua ꞌāꞌana poki.
30 »Ko ravaꞌa ꞌā ka maha ꞌahuru matahiti ꞌi ira he haka takeꞌa te merahi i a ia ki a Mōtē ꞌi te kona ꞌone taꞌe noho taŋata hāhine ki te maꞌuŋa ko Tinaī,
ꞌi roto i te ura ahi o te tumu e hū rō ꞌā.
31 He māere a Mōtē ꞌi tū meꞌe era ꞌe he haka hāhine mo uꞌi riva-riva.
He ŋaroꞌa i te reꞌo o te ꞌAtua ka kī ki a ia:
32 “A au he ꞌAtua o tuꞌu tupuna.
He ꞌAtua o ꞌAparahama,
o Itaꞌata ꞌe o Hākovo”.
»He rurū ia a Mōtē ꞌi te riꞌa-riꞌa,
ꞌe ꞌina he haŋa mo uꞌi.
33 He kī e te ꞌAtua:
“Ka patu tuꞌu kirivaꞌe;
te kona ena koe e māroa ena kona moꞌa.
34 Ko takeꞌa ꞌana e au te mamae ꞌe te māui-ui o tōꞌoku taŋata taꞌatoꞌa ꞌi Ehipto.
Ko ŋaroꞌa takoꞌa ꞌana e au i te rāua taŋi.
ꞌO ira a au i topa mai nei mo haka eꞌa i a rāua mai te rāua ꞌati.
ꞌE ꞌī a au he uŋa i a koe ki Ehipto”.
35 »Ko te Mōtē taꞌe haŋa era nei e te itaraera,
ꞌui era:
“¿ꞌA ꞌai koe i haka pūꞌoko o mātou?”,
ko ia te kope i uŋa e te ꞌAtua mo pūꞌoko haka tere o te itaraera ꞌe mo haka eꞌa i a rāua mai roto i te ꞌati hai merahi haka takeꞌa i a ia ꞌi roto i te ura ahi.
36 ꞌĀꞌana i toꞌo i te tātou tupuna mai Ehipto i aŋa i te mana ꞌi rā henua,
ꞌi te kona ko Vaikava Mea-mea ꞌe pē ira ꞌana ꞌi te kona ꞌone taꞌe noho taŋata ꞌi roto i te maha ꞌahuru matahiti o rāua ꞌi ira.
37 »Ko te Mōtē mau nei ꞌā te meꞌe kī era ki te itaraera:
“E haꞌataꞌa rō e te ꞌAtua mai roto i a kōrua e tahi perofeta pa he haꞌataꞌa iŋa nei i a au”.
38 ꞌE,
takoꞌa,
hora era ꞌā ꞌi te kona ꞌone taꞌe noho taŋata te itaraera,
ko Mōtē te meꞌe i vānaŋa ararua ko te merahi ꞌi ruŋa i te maꞌuŋa ko Tinaī ꞌe i maꞌu i te vānaŋa ki te tātou tupuna.
Ki a Mōtē e haka ꞌite era e te merahi i te vānaŋa o te ꞌAtua vaꞌai i te ora ꞌina he hopeꞌa raꞌa mo haka ꞌite mai ki a tātou ki te itaraera.
39 »ꞌE,
te tātou tupuna ꞌina he haŋa mo haꞌatura ki a Mōtē;
he riri nō te aŋa mōꞌona,
ꞌe te meꞌe haŋa he hoki haka ꞌou o rāua ki Ehipto.
40 Hora era ōꞌona ꞌi ruŋa i te maꞌuŋa i kī ai e te tupuna ki a ꞌĀrone,
taina o Mōtē:
“Ka aŋa hai ꞌatua mo haka tere i a tātou.
Kai ꞌite mai,
paꞌi,
ko aha ꞌā a Mōtē”.
41 »He aŋa ia i te ꞌatua tuꞌu pa he tēnero.
He tūtia ꞌe he aŋa i te ŋoŋoro ki rā ꞌatua,
ꞌe he koa ꞌi tū meꞌe aŋa era.
42 ꞌO ira te ꞌAtua i hārui ai i te itaraera hai tuaꞌivi ꞌe he haka rē mo haꞌamuri ki te raꞌā,
ki te māhina ꞌe ki te hetuꞌu haꞌariro e rāua he ꞌatua.
Pē nei,
paꞌi,
e pāpaꞌi ena ꞌi ruŋa i te puka o te perofeta:
“E te itaraera ē,
ꞌi roto i te maha ꞌahuru matahiti o kōrua ꞌi te kona ꞌone taꞌe noho taŋata,
¿i tiŋaꞌi rō kōrua i te ꞌanimare mo tūtia mai?
43 ꞌIna.
Te meꞌe nō o kōrua i aŋa
he maꞌu i te karapā pure o te ꞌatua reo-reo ko Moroko,
ꞌe i te ꞌītoro tuꞌu pa he hetuꞌu ko Rēfana,
ꞌītoro aŋa e kōrua mo haꞌamuri.
ꞌO ira a au ka toꞌo ena i a kōrua mai te kōrua henua
ka hoa ena ki rā atu era o Vāvīrōnia”.
44 »ꞌI te hora era o te tātou tupuna ꞌi te kona ꞌone taꞌe noho taŋata,
e ai rō ꞌana te rāua Karapā Moꞌa haka aŋa e te ꞌAtua ki a Mōtē pa he meꞌe haka takeꞌa e ia,
mo haka manaꞌu ki tōꞌona taŋata:
a ia ꞌi muri i a rāua.
45 O te tātou tupuna i maꞌu mai i rā karapā ki nei ꞌi te hora tuꞌu mai ananake ko kuā Kosuē toꞌo i te henua nei mai te rima o te hau i he-heꞌi e te ꞌAtua.
I noho ai rā karapā ꞌi nei ꞌātā ki te taꞌu o te ꞌariki era ko Tāvita,
46 kope ꞌi ruŋa i a ia te mata o te ꞌAtua.
»He ani e Tāvita ki te ꞌAtua mo haꞌatiꞌa i a ia mo haka tuꞌu i te hare e tahi mo haꞌamuri o rāua o te hakaara o Hākovo ki a ia.
47 I hopeꞌa ai,
ꞌa Toromono,
poki ꞌa Tāvita,
i aŋa i te Kona Haꞌamuri ꞌAtua.
48 »Te parautiꞌa,
ꞌina he noho te ꞌAtua i te hare aŋa hai rima o te taŋata.
Pē nei,
paꞌi,
e hāꞌaki ena ꞌi ruŋa i te puka pāpaꞌi e te perofeta:
49 “Te raŋi he pepe ōꞌoku,
ꞌe te henua he kona raŋo o tōꞌoku vaꞌe.
¿Pē hē ia te hare ka aŋa mai ena mōꞌoku?,
i ꞌui ai e te ꞌAtua,
¿hē te kona mo haka ora ōꞌoku?
50 ¿Taꞌe ꞌō ꞌāꞌaku i aŋa i te meꞌe taꞌatoꞌa ena?”.
51 Ko te vānaŋa iŋa ꞌana ia a ꞌĒteva he meꞌe:
—E te pūꞌoko hio-hio ē,
ꞌina kōrua he haŋa mo haka roŋo ꞌe mo haꞌatura ki te ꞌAtua,
pa he nuꞌu taꞌe ꞌite ko ai te ꞌAtua parautiꞌa.
Te aŋa o kōrua he aŋa i te meꞌe taꞌe tano ki te Vārua Maitai.
Te kōrua huru pa he huru ꞌā o te kōrua tupuna.
52 ¿Ko ai o roto o te perofeta taꞌatoꞌa i taꞌe tōtōā e te kōrua tupuna?
ꞌĀtā ko tiŋaꞌi ko haka mate ꞌana e rāua i te nuꞌu vānaŋa o ruŋa i te tuꞌu iŋa mai o te taŋata aŋa i te meꞌe tī-tika ꞌe ꞌina he hape,
ꞌe ko tuꞌu mai ꞌā rā taŋata.
»I tuꞌu mai era,
he toꞌo mai e kōrua he vaꞌai ki te rima o te nuꞌu taꞌe haŋa ki a ia ꞌe he haka tiŋaꞌi he haka mate.
53 Ki a kōrua i haka ꞌite atu ai e te merahi i te roŋo o te ꞌAtua;
ꞌe,
ꞌina kōrua he haꞌatura ki rā roŋo.
He mate iŋa o ꞌĒteva
54 I ŋaroꞌa era i te meꞌe taꞌatoꞌa nei e rā nuꞌu,
he ŋuŋu te niho mo ꞌĒteva.
55 ꞌE,
a ꞌĒteva,
ko ꞌī ꞌana e te pūai o te Vārua Maitai,
he uꞌi a te raŋi he takeꞌa i te ꞌana-ꞌana o te ꞌAtua ꞌe i a Ietū e māroa rō ꞌana ꞌi te pāꞌiŋa mataꞌu.
56 He kī ia:
«¡Ē,
ka uꞌi rā kōrua!
ꞌĪ e takeꞌa mai nei i te raŋi e ha-hata rō ꞌā,
ꞌe i te Poki o te taŋata ꞌi te pāꞌiŋa mataꞌu o te ꞌAtua».
57 ꞌO ŋaroꞌa i tū vānaŋa era,
he puru tū nuꞌu era i te rāua tariŋa hai rima ꞌe he ohu-ohu mo haka pōŋeha.
He moko ananake he ꞌa-ꞌaru i a ꞌĒteva.
58 He to-toi he oho mai tū kona era ꞌe he tamaꞌi hai māꞌea.
Tū nuꞌu mataꞌite reo-reo era ki te kope ꞌāpī te ꞌīŋoa ko Sauro i haka hāpaꞌo ai i te rāua paratoa.
59 E tamaꞌi era i a ꞌĒteva hai māꞌea ꞌai e pure era:
«E Ietū ē,
ka toꞌo koe i tōꞌoku vārua».
60 He tū-turi ia he ohu pūai:
«¡E Ietū,
ꞌina koe ko tapa atu i te hara nei o te nuꞌu nei!».
I oti era te kī i te meꞌe nei,
he mate.