O te ŋā ꞌevaneria ena e hā o ruŋa i te Pīpīria, te ꞌevaneria haka aŋi-aŋi riva-riva mai: a Ietū Kiritō he ꞌAtua ꞌina ōꞌona haꞌamata ꞌe ꞌina ōꞌona hopeꞌa ko te ꞌevaneria nei ꞌa Iovani. Te kope nei ko Iovani he ꞌāpōtoro ꞌa Ietū Kiritō ararua ko tōꞌona taina ko Tanatiako.

ꞌI te haꞌamata iŋa o te puka nei ꞌa Iovani e haka ꞌite mai ena pē nei ē: ꞌi raꞌe ki te aŋa i te ao ꞌe i te meꞌe taꞌatoꞌa, ko ai era ꞌana te Vānaŋa (1.1), ꞌe he haka ꞌite takoꞌa mai: rā Vānaŋa i noho rō ꞌi roto i a tātou pa he taŋata (1.14). Hai vānaŋa taꞌe aŋarahi mo aŋi-aŋi i haka ꞌite mai ai e Iovani: rā Vānaŋa ko Ietū, Poki o te ꞌAtua ꞌe ꞌAriki o Itaraera (1.49).

Ki oti te haka aŋi-aŋi mai i te parautiꞌa nei, he ꞌaꞌamu mai e Iovani i te mana aŋa e Ietū mo haka aŋi-aŋi ki te nuꞌu ko ai mau a ia. Rā ŋā mana ko te ŋā mana nei: he haka riro iŋa i te vai he vino (2.1–11); he haka ora iŋa i te poki o te kape o te rōmano (4.46–54); he haka haꞌere iŋa i te kope hakari taꞌe makenu (5.1–18); he hāŋai iŋa i te nuꞌu e pae taꞌutini (6.1–14); he haꞌere iŋa a ruŋa i te vaikava (6.16–21); he haka ora iŋa i te mata o te taŋata matapō (9.1–12); ꞌe he haka ora iŋa i te taŋata mai te mate (11.1–44).

ꞌE, ki haka mao te ꞌaꞌamu mai o ruŋa i te mana aŋa e Ietū, he haka ꞌite mai e Iovani o ruŋa i te meꞌe i vānaŋa e Ietū ananake ko tāꞌana nuꞌu hāpī mo māhani riva-riva o rāua ki a ia, ꞌe mo aŋi-aŋi e rāua he aha te meꞌe mo topa pe muꞌa ka oho ena (12–17). E vānaŋa era e Ietū ki rā nuꞌu taꞌe toe pa he maꞌori hāpī o rāua, e vānaŋa era pa he repahoa (15.15). ꞌO ira e vānaŋa tī-tika tahi era i te meꞌe ki rā nuꞌu (16.25–30), ꞌe e no-noꞌi era ki te ꞌAtua Matuꞌa mo hāpaꞌo ꞌe mo haka riro i te nuꞌu nei e tahi nō manaꞌu pē rāua ko te ꞌAtua (17.1–26).

Rauhuru te meꞌe topa kē o te ꞌevaneria nei ꞌa Iovani ki te tētahi atu ꞌevaneria. E tahi o rā ŋā meꞌe he huru o te haka ꞌite iŋa o Ietū ko ai a ia. E kī era i a ia: he haraoa vaꞌai i te ora (6.35); he mōrī haka māꞌeha i te taŋata o te ao nei (8.12); he taŋata hāpaꞌo riva-riva i te māmoe (10.11); he kope vaꞌai i te ora ꞌe haka ora haka ꞌou i te nuꞌu mate (11.25); he ara, he parautiꞌa, ꞌe he ora (14.6); ꞌe he tumu vino parautiꞌa (15.1).

Te parautiꞌa taꞌatoꞌa nei ꞌe te tētahi haka ꞌou atu parautiꞌa o ruŋa i a Ietū ꞌi ruŋa i te ꞌevaneria nei. ꞌE te vānaŋa ꞌata nehe-nehe ko te vānaŋa kī mau era ꞌā e Ietū pē nei ē: «ꞌI te haŋa rahi o te ꞌAtua ki te taŋata taꞌatoꞌa o te ao, he vaꞌai i tāꞌana Poki mau nō era e tahi mo mate, ꞌe nuꞌu nō era mo haka moe i te manaꞌu ꞌi ruŋa, e ko haka tapa e te ꞌAtua mai muri i a ia ꞌe e ko haka ūtuꞌa; he vaꞌai i te ora ꞌāpī ꞌina he hopeꞌa raꞌa» (3.16). I pāpaꞌi ai a Iovani o ruŋa i te haŋa o te ꞌAtua ki te taŋata taꞌatoꞌa o te ao ki aŋi-aŋi ai e te taꞌatoꞌa e haŋa rō ꞌā te ꞌAtua mo eꞌa o te taŋata mai roto i te ūtuꞌa o te hara ꞌe mo ravaꞌa i te ora ꞌāpī ꞌina he hopeꞌa raꞌa hai haka moe i te manaꞌu ꞌi ruŋa i a Ietū, he Kiritō, he Poki o te ꞌAtua (20.31).