Te puka nei ꞌa Ruka i pāpaꞌi ꞌe he rua puka i pāpaꞌi e ia mo tōꞌona repahoa ko Teofiro he haŋa mo haka ꞌite ki a ia i te meꞌe taꞌatoꞌa o ruŋa i a Ietū Kiritō (1.1; Ruka 1.1–4). E ꞌaꞌamu ꞌana pē hē te nuꞌu hāpī ꞌa Ietū i haka ꞌite i oho ai i te roŋo riva-riva o te ꞌAtua a te kona taꞌatoꞌa, pa he meꞌe kī era e Ietū.

ꞌI te haꞌamata e haka ꞌite ꞌā e Ruka o ruŋa i te topa iŋa mai o te Vārua Maitai hōrea e Ietū (1.5–8). I topa mai ai ꞌi te mahana o te Peneketote, ꞌe he haka riro i te nuꞌu hāpī ꞌa Ietū he ꞌaito ꞌi te haka ꞌite iŋa o ruŋa i te ora iŋa o Ietū mai te mate (2.1–47), he vaꞌai ki a rāua i te mana mo haka ora i te māui-ui (3.1–10; 5.12–16), ꞌe he vaꞌai i te pūai mo aŋa mo oho i te meꞌe haŋa o te ꞌAtua ꞌina he riꞌa-riꞌa. O te Vārua Maitai i haka aŋi-aŋi ki te nuꞌu nei pē nei ē: te roŋo riva-riva o ruŋa i a Ietū Kiritō taꞌe mo te nuꞌu hūrio nō, mo te taŋata taꞌatoꞌa o te ao, ka hūrio, ka taꞌe hūrio (10.34–35).

E haka ꞌite takoꞌa ꞌā e Ruka ꞌi ruŋa i te puka nei pē hē a Sauro, kī takoꞌa ko Pauro, i māhani ai ki a Ietū ꞌe pē hē i huri ai i tōꞌona manaꞌu ki ruŋa i a ia (8.1–4; 9.1–6). Mai rā mahana i riro ai he ꞌāpōtoro ꞌa Ietū Kiritō. ꞌE o te nuꞌu taꞌatoꞌa haka ꞌite i te roŋo riva-riva o ruŋa i a Ietū ko Pauro te kope ꞌata hōnui.

E hā ara o Pauro i oho i haka ꞌite i te roŋo riva-riva o ruŋa i a Ietū ki kona era ki kona era o te henua taꞌatoꞌa haka tere e te rōmano, ꞌe ꞌātā ki Roma mau ꞌā. I hokorua rō i a ia ꞌi te ŋā ara nei e Verenāvē, e Tira, e Timoteo ꞌe te tētahi haka ꞌou atu nuꞌu. E tuꞌu rō ꞌana pa he meꞌe: i hokorua takoꞌa rō e Ruka, kope pāpaꞌi era i te puka nei. ꞌI ruŋa nei, paꞌi, e vānaŋa e oho nō ꞌā o ruŋa i a Pauro ꞌe o te nuꞌu hokorua i a ia, he oꞌo takoꞌa a Ruka ꞌi roto i te ꞌaꞌamu (16.10–17; 20.5–15; 21.1–19; 27.1–28.16).

E haka mao ena te puka nei o ruŋa i te noho iŋa o Pauro ꞌi Roma ꞌe e kī ena o ruŋa i a ia pē nei ē: ki te hopeꞌa ꞌina he riꞌa-riꞌa e haka ꞌite era o ruŋa i a Ietū ꞌe o ruŋa i te haka tere iŋa ꞌāpī o te ꞌAtua ꞌi roto i te māhatu o te taŋata, ꞌe ꞌina e tahi taŋata i haka mou i a ia (28.31).