He topa iŋa o te Vārua Maitai
2
I tano era te ŋoŋoro o te Peneketote,
e tahi nō kona i taka-taka tahi ai te nuꞌu taꞌatoꞌa haka moe i te manaꞌu ꞌi ruŋa i a Ietū.
2 E no-noho nō ꞌā he ŋaroꞌa i te heruru mai te raŋi pa he hu-hū tokerau pūai,
ꞌe he heruru tahi tū hare era ꞌi ira a rāua.
3 ꞌĪ ka uꞌi atu ena ko te meꞌe tuꞌu pa he ura ahi ka topa a ruŋa i te taꞌatoꞌa e tahi ka tahi o rāua.
4 He ꞌī ia ananake e te pūai o te Vārua Maitai ꞌe he haꞌamata he vānaŋa ꞌarero kē ꞌarero kē,
hai ꞌarero haka vānaŋa e te Vārua Maitai.
5 ꞌI Hērutarema te hūrio haꞌamuri ꞌe haꞌatura ki te ꞌAtua o te kona taꞌatoꞌa o te ao.
6 I heruru era rā hare,
he pae meꞌe rahi nuꞌu ki rā kona,
ꞌe ꞌina he aŋi-aŋi he aha te auraꞌa,
he ŋaroꞌa i te nuꞌu haka moe i te manaꞌu ꞌi ruŋa i a Ietū e vānaŋa ꞌā i te ꞌarero o rāua o te nuꞌu pae ki ira.
7 ꞌI te māere o rā nuꞌu he kī:
«¿Taꞌe ꞌō te nuꞌu taꞌatoꞌa era e vānaŋa mai era ai o Karirea?
8 ¿Pē hē ia e ŋaroꞌa mai nei e vānaŋa ꞌā hai ꞌarero kē-kē o tātou o te nuꞌu taka-taka o nei?
9 ꞌI roto i a tātou,
paꞌi,
te nuꞌu o Paratia,
o Mēria,
o ꞌĒrama,
o Mētōpōtāmia,
o Hūrea,
o Kāpārōtia,
o Ponotō,
o ꞌĀtia,
10 o Firihia,
o Panafiria,
o Ehipto,
ꞌe o te ŋā kona era o Rivia hāhine ki Tīrene.
E ai takoꞌa rō ꞌana te nuꞌu o Roma ꞌi nei,
11 tētahi he hūrio maꞌu i te rāua haka tere iŋa mai te poreko iŋa ꞌā ꞌe tētahi atu he nuꞌu oꞌo ki roto i te haka tere iŋa o te hūrio.
ꞌE ꞌi roto takoꞌa te nuꞌu o Kereta ꞌe o Aravia.
¡ꞌE,
ꞌī e ŋaroꞌa mai nei i te nuꞌu era e vānaŋa ꞌā o ruŋa i te meꞌe taꞌatoꞌa nui-nui aŋa e te ꞌAtua hai ꞌarero kē-kē vānaŋa e te nuꞌu o te kona nei!».
12 Ko māere tahi ꞌā ananake.
ꞌIna he ꞌite pē hē ana manaꞌu,
ꞌe he ꞌui ki a rāua ꞌā:
«¿He aha te haꞌaauraꞌa o te ŋā meꞌe taꞌatoꞌa nei?».
13 ꞌĪ ia te tētahi o rā nuꞌu e haka meꞌe-meꞌe era pē nei ē:
«¡Ko taꞌero tahi ꞌana!».
He tātara iŋa o Pētero
14 He māroa ia a Pētero ananake ko te tētahi ŋā ꞌāpōtoro era e hoꞌe ꞌahuru mā hoꞌe,
ꞌe hai reꞌo pūai he kī:
«E te hūrio ꞌe e te nuꞌu taꞌatoꞌa noho o Hērutarema ē,
ka ꞌite kōrua i te ŋā meꞌe nei,
ꞌe ꞌai ka haka roŋo riva-riva rō mai tāꞌaku vānaŋa ka kī atu ena.
15 Kai taꞌero te nuꞌu nei,
pa he meꞌe manaꞌu e kōrua;
hora iva iho o te pōꞌā nei.
16 Te parautiꞌa,
te meꞌe takeꞌa ena ꞌe ŋaroꞌa ena e kōrua ko te meꞌe haka ꞌite era e te perofeta era ko Hōere pē nei ē:
17 “ꞌI te ŋā mahana hopeꞌa era,
i kī ai e te ꞌAtua,
e vaꞌai rō e au i tōꞌoku Vārua Maitai ki te taŋata taꞌatoꞌa.
Te ŋā poki o kōrua e haka ꞌite rō i te roŋo haka ꞌite e au ki a rāua,
te ŋā poki ꞌāpī e takeꞌa rō i te meꞌe haka takeꞌa e au,
ꞌe te nuꞌu korohuꞌa e moe vārua rō.
18 ꞌE,
ꞌi rā ŋā mahana,
e haka topa takoꞌa rō e au i tōꞌoku Vārua Maitai
ki ruŋa i tōꞌoku tāvini,
ka ai he taŋata ꞌo he viꞌe,
ꞌe e vānaŋa rō rāua i te meꞌe haka vānaŋa e au.
19 E haka takeꞌa rō e au a ruŋa i te raŋi i te meꞌe nui-nui;
ꞌe ꞌi ruŋa i te henua he toto,
he ahi ꞌe he ꞌau.
20 Te raꞌā e pōhāhā rō,
ꞌe te māhina e riro rō pa he toto
ꞌi raꞌe ki te tuꞌu iŋa mai o te mahana nui-nui o te ꞌAtua.
21 ꞌE te nuꞌu taꞌatoꞌa ani hai ꞌīŋoa o te Kiritō,
he eꞌa mai roto i te ūtuꞌa o te hara
ꞌe he ravaꞌa i te ora ꞌāpī ꞌina he hopeꞌa raꞌa vaꞌai e te ꞌAtua”.
22 »E te itaraera ē,
ka haka roŋo mai te meꞌe nei ka kī atu ena:
A kōrua ko ꞌite riva-riva ꞌana:
hai meꞌe nu-nui aŋa e Ietū ꞌe hai mana aŋa e ia i haka takeꞌa atu ai e te ꞌAtua:
a Ietū o Nātāreta he taŋata uŋa mai e ia.
23 I vaꞌai atu ai ki a kōrua mo haka tano o te aŋa manaꞌu ꞌāꞌana ꞌi muꞌa ꞌā;
pē ira kōrua i haka tiŋaꞌi ai ꞌi ruŋa i te tātaurō hai rima o te taŋata taꞌe he hūrio.
24 I oho era he haka ora e te ꞌAtua,
he haka eꞌa mai te ꞌati o te mate i a Ietū;
taꞌe,
paꞌi,
te mate mo rē ki a ia.
25 Te ꞌariki era ko Tāvita i pāpaꞌi rō o ruŋa i a Ietū pē nei ē:
“Te aŋa nō he takeꞌa e au i tōꞌoku Pūꞌoko Haka Tere ꞌi muri i a au;
ꞌi te ai mai ōꞌona ꞌi tōꞌoku pāꞌiŋa mataꞌu,
ꞌina he meꞌe mo haka hiŋa i a au.
26 ꞌO ira tōꞌoku māhatu e koa nei,
ꞌe hai ŋutu ōꞌoku e haꞌahana-hana nei i a ia.
Ko ꞌite riva-riva ꞌana,
paꞌi,
e au:
te mate e ko rē mai.
27 E ko haka rē koe i tōꞌoku vārua ꞌi muri i te nuꞌu mate
ꞌe e ko haꞌatiꞌa koe mo piro o te hakari o tuꞌu tāvini haꞌataꞌa ꞌe haꞌatura ki a koe.
28 Ko haka takeꞌa mai ꞌana koe i te ara o te ora ꞌāpī ꞌina he hopeꞌa raꞌa vaꞌai e te ꞌAtua,
ꞌe e rahi rō ꞌana tōꞌoku koa ꞌo tuꞌu ai mai ꞌi muri i a au”.
29 »E te taina,
ko ꞌite tahi ꞌā a tātou:
te tātou tupuna ko Tāvita ko mate ꞌā,
ꞌe ꞌi muri i a tātou tōꞌona kona tanu.
30 A Tāvita he perofeta;
ko ꞌite era ꞌana e ia ko hōrea ꞌā e te ꞌAtua e haka ꞌariki rō e tahi taŋata o roto o tōꞌona hakaara.
31 ꞌE ko ꞌite takoꞌa ꞌā a ia pē nei ē:
te Kiritō e ora haka ꞌou rō mai te mate.
ꞌO ira a Tāvita i pāpaꞌi ai i te vānaŋa nei:
e ko haka rē i tōꞌona vārua ꞌi muri i te nuꞌu mate ꞌe e ko haꞌatiꞌa mo piro o tōꞌona hakari.
32 »Te ꞌAtua ko haka ora ꞌā i a Ietū mai te mate ꞌe he mataꞌite a mātou taꞌatoꞌa o rā meꞌe.
33 Ko maꞌu ꞌā te ꞌAtua i a Ietū ko haka noho ꞌana ꞌi tōꞌona pāꞌiŋa mataꞌu mo haka tere ararua,
ꞌe ko vaꞌai ꞌā ki a ia i te Vārua Maitai hōrea e ia e te Matuꞌa.
ꞌE a Ietū ko haka topa mai ꞌā i te Vārua Maitai ki ruŋa i a mātou,
he meꞌe ŋaroꞌa ꞌe takeꞌa ena e kōrua.
34 »Taꞌe ko Tāvita rā meꞌe iri era ki te raŋi;
ꞌāꞌana mau ꞌā,
paꞌi,
i kī:
“A Iehoha te ꞌAtua i kī rō ki tōꞌoku Pūꞌoko Haka Tere:
‘Ka noho mai koe ꞌi tōꞌoku pāꞌiŋa mataꞌu,
35 ꞌātā ka haka riro rō e au i te nuꞌu taꞌe haŋa atu ki a koe he meꞌe raŋo o tuꞌu vaꞌe’”.
36 »E te taŋata o Itaraera,
e ꞌite riva-riva kōrua:
a Ietū,
veo era e kōrua ꞌi ruŋa i te tātaurō,
ko haka Pūꞌoko Haka Tere ꞌā e te ꞌAtua o te meꞌe taꞌatoꞌa ꞌe ko haka Kiritō ꞌā».
37 I ŋaroꞌa era i rā meꞌe e te nuꞌu taka-taka ꞌi tū kona era,
he oꞌo te mamae ki roto i te māhatu,
ꞌe he ꞌui ki a Pētero ꞌe ki te tētahi ꞌāpōtoro:
—E kuā taina,
¿he aha te mātou meꞌe mo aŋa?
38 He pāhono e Pētero:
—Ka huri te kōrua manaꞌu ki te ꞌAtua,
ka haka tapa mai roto i te hara ꞌe ꞌai ka haka papatito rō hai ꞌīŋoa o Ietū Kiritō mo haka ꞌite ko haka moe ꞌā i te manaꞌu ꞌi ruŋa i a Ietū,
ki haka kore ai e te ꞌAtua i te kōrua hara.
Pē ira he vaꞌai atu e ia i te Vārua Maitai.
39 Te hōrea era o ruŋa o te Vārua Maitai mo kōrua,
mo te kōrua ŋā poki,
ꞌe mo te nuꞌu e roa rō ꞌana,
te auraꞌa,
mo te nuꞌu taꞌatoꞌa kī e te ꞌAtua mo oho ki a ia.
40 Hai ŋā vānaŋa nei ꞌe hai vānaŋa haka ꞌou atu i hāpī ai ꞌe i hatu ai e Pētero ki te taŋata:
«¡E haka tapa kōrua mai muri i te nuꞌu aŋa i te meꞌe taꞌe tano ꞌo haka ūtuꞌa takoꞌa atu te ꞌAtua i a kōrua!».
41 Te nuꞌu i haka roŋo hai māhatu ki tū ŋā meꞌe kī era e Pētero ꞌe i haka moe i te manaꞌu ꞌi ruŋa,
he haka papatito i a rāua.
Pē ira,
ꞌi rā mahana mau ꞌā,
i ꞌata rahi ai te nūnaꞌa taŋata haka moe i te manaꞌu ꞌi ruŋa i a Ietū e toru taꞌutini haka ꞌou taŋata.
42 ꞌE a rāua e maꞌu e oho nō ꞌana i te meꞌe taꞌatoꞌa hāpī e te ꞌāpōtoro,
ꞌe te aŋa takoꞌa he haka taka-taka mo pure ꞌe mo mo-more i te haraoa mo manaꞌu i te mate iŋa o Ietū.
He nuꞌu kiritiano raꞌe
43 He māere te taꞌatoꞌa ꞌi te rahi o te mana ꞌe o te meꞌe nui-nui haka aŋa e te ꞌAtua ki te ꞌāpōtoro.
44 Te nuꞌu taꞌatoꞌa haka moe i te manaꞌu ꞌi ruŋa i a Ietū,
e here rō ꞌā ꞌe e tuhaꞌa rō ꞌana ꞌi roto i a rāua i te rāua meꞌe ai.
45 He hoꞌo i te henua ꞌe i te meꞌe taꞌatoꞌa o rāua,
ꞌe ꞌai ka tuhaꞌa i te moni ki te nuꞌu e hape rō ꞌana te rāua meꞌe.
46 Paurō te mahana e haka taka-taka era ꞌi te Kona Haꞌamuri ꞌAtua.
ꞌE ꞌi te rāua hare e mo-more era i te haraoa ꞌe hai koa ꞌe hai māhatu riva-riva e ka-kai era.
47 E haꞌahana-hana rō ꞌana ki te ꞌAtua,
ꞌe e haŋa rahi rō ꞌana e te nuꞌu.
Te mahana te mahana e ꞌata haka rahi era e te ꞌAtua i tū nūnaꞌa taŋata era hai nuꞌu eꞌa mai roto i te ūtuꞌa o te hara ꞌe ravaꞌa i te ora ꞌāpī ꞌina he hopeꞌa raꞌa.