2 Tayta Diosmi nimarqan: “Noqami unay Israel runakunawan pasaypa ajanarqä. 3 Kananqa Israel mayikikunata niy: ‘Llapanta mandaq Tayta Diosmi nin: ¡Noqaman kutiyämuy! Kutiyämuptikiqa yapaymi yanapayäshayki.^† 4 Unay castaykikunanö chukru shonqu ama kayaytsu. Paykunataqa profëtakunawanmi willakatsirqä jutsankunata kachaskir noqaman kutiyämunanpä. Tsaynö nikaptïpis manami cäsukayämarqantsu. Noqa Tayta Diosmi tsaynö nï.

5 “ ‘Tsay castaykikunapis y profëtakunapis ushakäyashqanami. 6 Sirvimaqnï profëtakunawan willakatsinqänöllami llapanpis päsashqa. Willakatsinqänö castigaptïmi jutsata ruranqanta jaqirir niyarqan: “Castigamänantsikpä ninqannöllami llapanta mandaq Tayta Diosqa mana cäsukunqantsikpita castigamashqantsik” ’ ”.

7 Rey Darío mandaq kanqan kimsa watata cumplinanpä juk killa pishiykaptinmi ishkay chunka chusku (24) junaqcho noqa profëta Zacaríasta Tayta Dios yapay parlapämarqan. Tsayqa Sebat killami karqan.^b

8 Juk tsakaymi revelacioncho rikarqä puka cawallun muntashqa runata. Tsay runaqa atska arrayán muntikuna kanqan raqrachömi kaykarqan. Qepanchömi kaykäyarqan puka, bäyu y yuraq cawallun muntashqa runakuna.^†

9 Tsay hörami juk ángel parlapämarqan. Paytami tapurqä: “Taytay, ¿pikunatä taqay muntashqa runakuna?” nir.

Tapuptïmi nimarqan: “Kanan willashayki pikuna kayanqantapis”.

10 Arrayán kanqancho kaykaq runanami nimarqan: “Paykunaqa kaykäyan entëru kay patsata rikapakuyänanpä Tayta Dios kachamunqanmi”.

11 Arrayán muntikunacho kaykaq runaqa Tayta Diospa angelninmi karqan. Tsaymi muntashqa kaykaqkuna tsay angelta niyarqan: “Maytsaypapis purirmi rikayashqä runakuna añaw kawaykäyaqta”.

12 Tsaymi Tayta Diospa angelnin nirqan: “Llapanta mandaq Tayta Dios, qanchis chunka (70) watana päsaykaptinpis^† ¿kanqallanku ajashqa kaykanki Jerusalén y Judá runakunawan?”

13 Tsaynö niptinmi noqawan parlaykaq angelta Tayta Dios alli shimillanpa parlaparqan. 14 Tsaymi willakunäpä tsay ángel nimarqan: “Llapanta mandaq Tayta Diosmi nin: ‘Jerusalénta y Sión jirkanta pasaypami kuyä. 15 Tsaymi atacaqnin nación runakuna añaw kawaykäyaqta rikar pasaypa ajanaykä. Israel runakunawan rabyashqa kar castigaptïmi paykunaqa alläpana ñakatsiyashqa. 16 Tsaymi noqa Tayta Dios nï: Kananqa Jerusalénta kuyapäshänami. Yapaymi wayïta y Jerusalén markatapis shäritsiyanqa. Noqa llapanta mandaq Tayta Diosmi tsaynö nï’ ”.

17 Tsaynöpis tsay angelmi nimarqan: “Mastapis willakuy: ‘Llapanta mandaq Tayta Diosmi nin: Noqami bendicionnïta churashä Judá markakunacho imaykapis atska kananpä. Sión jirkancho taq runakunatapis kuyapäshämi. Noqapa kananpämi Jerusalén markata yapay qorishä’ ”.

18 (2.1) Tsaypitanami revelacioncho rikarqä chusku waqrakunata. 19 (2.2) Tsaymi noqawan parlaykaq angelta tapurqä: “Tsay waqrakuna ¿imatä kaykan?” nir.

Tsaymi nimarqan: “Tsay waqrakunaqa kaykäyan Judá runakunata, Israel runakunata y Jerusalén runakunata maytsaypapis qarquq nacionkunami”.

20 (2.3) Tsaypitanami Tayta Dios rikatsimarqan chuskuq herrërukunata. 21 (2.4) Tsaymi angelta tapurqä: “¿Imaqtä kay herrërukuna shayämushqa?” nir.

Tsaymi nimarqan: “Paykuna shayämushqa tsay waqrakunata ushakätsiyänanpämi. Tsay waqrakunaqa kaykäyan Judá nación runakunata wakpa kaypa mashtaypa mashtar qarquq nación runakunami. Qarquyaptinmi Judá runakunaqa pasaypa penqakushqa rikakuyarqan”.