Abdías
Edomita runakunata Tayta Dios castigananpä ninqan
1
Kaychömi qellqaraykan Edom nación runakunapä profëta Abdíasta Tayta Dios revelanqan.Tayta Diosmi nacionkunaman juk willakuqta kachashqa.
Tsay willakuqmi nikan:
“¡Aku aywashun edomita runakunata atacanantsikpä!”†
2 Edomita runakunatami Tayta Dios nin:
“Wakin nacionkunapitapis mas wallkalla kayänaykipämi castigayäshayki.
Tsaynöpami pasaypa penqakuyman churayäshayki.
3 Qamkunaqa qaqakunata uchkuykur wayikikunata rurashqa karmi allish tukuykäyanki.
Altunnin qaqakunacho tarmi pipis mana vinciyäshunaykipä kanqanta yarpaykäyanki.
Tsayman yärakurqa kikillaykikunami engañakuykäyanki.
4 Ankanö junishpa pajayaptikipis y qoyllurkuna kayanqancho punukuyänaykita rurayaptikipis tsaypitami jitarpayämushayki”.
Tayta Diosmi tsaynö nin.
5 “Paqaspa suwa yaykurpis ¿manaku tarinqan kaqllata apakun?
Üva pallaqkuna ¿manaku juk ishkay sarta üvakunata yurancho jaqiykuyanmanrä?
Noqami itsanqa chipyaq ushakätsiyäshayki.
6 Edomita runakuna, imaykaykikunatapis llapantami qechuyäshunki.
Allinnin kaqkunata pakaraykätsiptikipis ashi ashiykurmi apakuyanqa.
7 Llapan yanapashuqnikikunapis contrayki tikrarmi engañayäshunki.
Vinciyäshurnikimi nacionnikipitapis qarquyäshunki.
Amïguykikunapis contraykimi rikakuyanqa.
Paykunaman yärakuykaptikipis llullapaypami desgraciaman jitarpuyäshunki.
Edomita runakuna, ¡maytä musyaq yachaq kayanqayki!”
8 Tayta Diosmi edomita runakunata mastapis nin:
“Qamkunata castiganä junaq llapan musyaq runakunatami ushakätsishä.
Täyanqayki jirkakunacho manami ni jukllayllapis yachaq runakuna quëdayanqatsu.
9 Temáncho taq geniu runakunapis mantsarirninmi tsuktsukyäyanqarä.
Täyanqayki kaqchöqa chipyaqmi wanutsishqa kayanqa”.
Edomita runakunapa jutsan ima kanqanpis
10 “Qamkunaqa castayki kaykaptinmi Israel runakunata ñakatsiyashqayki y wanutsiyashqayki.
Tsaynö rurayanqaykipitami kikikikunapis penqakuypä pasaypa ushakäyanki.†
11 Karupita shamuq contran soldädukuna imaykakunatapis markapita apakuyaptin y Jerusalénpa punkunkunata pakir ushayaptin qamkunaqa tsay soldädukunatami yanapayarqayki.
Qechuyanqankunata rakipänakuyänanpä suertita jitayaptin tsay runakunanömi qamkunapis imaykankunata apakuyarqayki.
12 ¡Imanirtä kushipäyarqayki castaykikunata desgracia päsaptin!
¡Imanirtä kushipäyarqayki Judá nación raqällana rikakuptin!
¡Imanirtä asipäyarqayki kuyapaypä kaykaqta rikaykar!†
13 ¡Imanirtä desgracia päsaykaptin akranqä markaman yaykuyarqayki!
¡Imanirtä makillan tsoqpashqa waqaykäyaqta rikaykar kushipäyarqayki!
¡Imanirtä contrankuna vinciptin imaykankunatapis apakuyänaykipä yaykuyarqayki!
14 ¡Imanirtä qeshpiykaqkunata wanutsiyänaykipä tinkuq nänikunachöpis shuyaräyarqayki!
¡Imanirtä ayqikuykaqkunata tsari tsariykur entregayarqayki contrankunapa makinman!
Tayta Dios juzganan junaq kanqan
15 “Llapan nación runakunata juzganäpä kaq junaq wallkanami pishiykan.
Tsay junaqmi runakunata ñakatsiyanqaykinölla qamkunatapis ñakatsiyäshayki.
16 Sagrädu lömächo kuyanqä runakunata ñakatsiyanqaykinömi qamkunata y llapan nación runakunatapis ñakatsiyäshayki.
Castigaptïmi chipyaq illakäyanqa.
17 Kawaykar quëdaqkunami itsanqa Sión jirkanman amparakuyanqa.
Tsay jirkan sagrädu kaptinmi Jacobpita aywaraq runakuna salvakurnin herenciankunata qorikuyanqa.
18 Tsay witsanmi Jacobpita y Josépita aywaraq runakuna ninanö kayanqa.
Esaúpita aywaraq runakunanamia tsakishqa oqshanö kayanqa.
Edomita runakunata chipyaq ushakätsiptinmi ni jukllayllapis kawaykar quëdayanqatsu.
Noqa Tayta Diosmi tsaynö nï”.
Israel runakunata Tayta Dios yanapananpä ninqan
19 Tsaypitanami Neguevcho taq Israel runakuna Edom partita qechuyanqa.
Sefelacho taq Israel runakunami filisteo runakuna täyanqan partita qechuyanqa.
Wakin Israel runakunanami Efraín partita y Samaria partita qoriyanqa.
Benjamín trïbu kaq Israel runakunami Galaad partita qoriyanqa.
20 Juklä nacionpita atska Israel runakuna kutimurmi cananeo runakuna unay täyanqan partita qoriyanqa Sarepta markayaq.
Jerusalénpita Sefarad markaman prësu apayanqan runakuna kutimurmi Neguevcho kaq markakunata qoriyanqa.
21 Llapanta vinciskirnami Sión jirkanman witsäyanqa Esaúpita aywaraq runakunata juzgayänanpä.
Tayta Diospa makinchömi llapanpis kanqa.