Salmo 149
Tayta Diosta alabanqan
1 ¡Aleluya!
Mushuq cantuta cantar Tayta Diosta alabayay.
Pay munanqannö kawaq runakuna qorikanqancho alabayay.
2 Israel runakuna, kamashuqniki Tayta Diosta alabayay.
Sión runakuna, Tayta Dios mandashuqniki rey kanqanpita kushikuyay.
3 Jutinta joqarir danzayay.
Arpakunatawan panderëtakunata tukayllapa alabayay.
4 Kuyanqan runakunata rikarmi Tayta Dios kushikun.
Alli kawayänanpämi llampu shonqukunata yanapan.
5 Tayta Diosman yärakuqkuna, llapayki kushikuyay.
Yanapayäshunqaykipita cämaykikunachöpis cantayay.
6 Ishkanläpa alli afilashqa espädata aptarkur† llapan shonquykikunawan Tayta Diosta alabayay.
7 Tsay espädawanmi mana cäsukuq nación runakunata Tayta Dios vincinqa.
8 Mandaqnin reykunatawan yanapaqninkunata prësu tsariskirmi fiërru cadënawan watanqa.
9 Tsaynöpami paykunapä qellqaranqanta Tayta Dios cumplinqa.
Cumpliptinmi Tayta Diosta sirviqkuna pasaypa kushikuyanqa.
¡Aleluya!