Israel mayinkunawan mana pelyayänanpä Semaías willakunqan
11
Jerusalénman Roboam kutiykurmi Judá trïbu runakunapita y Benjamín trïbu runakunapita juk pachak puwaq chunka waranqa (180,000) allinnin soldädukunata qorirqan rakikaq Israel runakunata munayninman kutitsiyämunanpä. 2 Tsaymi profëta Semaíasta Tayta Dios parlapar nirqan: 3 “Salomónpa tsurin Judá nacionpa mandaqnin rey Roboamta, Judá trïbu runakunata y Benjamín trïbu runakunata willar ninki: 4 ‘Tayta Diosmi nin: Noqami Israel nacionta rakishqä ishkay nación kananpä. Tsaynö kaykaptinqa Israel mayikikunawan pelyaq ama aywayaytsu. Tsaypa trokinqa jukniki juknikikuna wayikikunapa kutikuyay’ ”.Tayta Diospa willakuqnin tsaynö niptinmi Jeroboamta atacaq aywayänanpa trokin wayinkunapana llapan kutikuyarqan.
Markakunata Roboam shumaq murallatsinqan
5 Jerusaléncho Roboam täkurninmi Judácho wakin markakunata rumiwan murallatsirqan soldädukuna atacaptin amparakur washäkuyänanpä. 6 Tsay markakunami kayarqan Belén, Etam, Tecoa, 7 Bet-sur, Soco, Adulam, 8 Gat, Maresa, Zif, 9 Adoraim, Laquis, Azeca, 10 Zora, Ajalón y Hebrón. Tsay murallatsinqan markakunaqa Judá trïbu y Benjamín trïbu runakuna täyanqanchömi karqan.
11 Tsay markakunata shumaq sigurarkatsirmi capitankunata churarqan tsaycho täpayänanpä. Tsaynöpis tsay markakunamanmi mikuykunata, aceitita y vïnuta churatsirqan. 12 Tsaynöllami escüdukunatapis lanzakunatapis tsay markakunaman churatsirqan soldädukuna tsaycho washäkuyänanpä. Tsaynöpami Judá trïbu y Benjamín trïbu runakuna täyanqan markakuna rey Roboampa munaynincho quëdarqan.
13-14 Israel nacionchönami tsurinkunawan rey Jeroboamqa sacerdötikunata sacerdöti kayninpita qarqurqan.† Tsaymi sacerdötikuna y levitakunapis uywa mitsikuyänankunatawan chakrankunata jaqiriykur maytsaypitapis Roboam mandanqan nacionman aywakuyarqan Jerusaléncho y Judá nacioncho kaykaq markakunachöna täyänanpä. 15 Jeroboam tsaynö qarqurqan juk casta runakunatana sacerdöti kayänanpä churarmi. Tsay sacerdötikunatami churarqan markakunacho kaq altarkunacho sacrificiukunata rupatsiyänanpä. Tsaynöpis sacrificiukunata rupatsiyarqan supaykunapä y ruratsinqan torïtukunapämi.† 16 Israel nacionpita Jerusalénman sacerdötikuna y levitakuna aywayanqannöllami Tayta Diosman llapan shonqunkunawan yärakuq runakunapis Israel nacionpita Jerusalénman aywakuyarqan unay castankuna yärakuyanqan Tayta Diosta adorar sacrificiukunata rupatsiyänanpä. 17 Tsaynöpami Judá nación mas jinchi rikakurqan. Tsay runakunami Davidnö y Salomónnö Tayta Diosta cäsukur kimsa wata Salomónpa tsurin rey Roboampa favornin kayarqan.†
18 Roboamqa Jerimotpa warmi tsurin Mahalatwanmi täkurqan. Mahalatpa taytan Jerimot Davidpa tsurinmi karqan. Mahalatpa mamanmi Eliabpa tsurin Abihail karqan. Mahalatpa awilunnami Isaí karqan. 19 Warmin Mahalatchömi Roboampa tsurinkuna Jehús, Semarías y Zaham kayarqan. 20 Roboamqa warmin jananmanmi juk warmita ashirqan Absalónpa warmi tsurin Maacata. Tsay warminchömi Roboampa tsurinkuna kayarqan Abías, Atai, Ziza y Selomit.
21 Roboampa warminkuna kayarqan chunka puwaqmi. Tsaynöpis concubïnankuna kayarqan soqta chunkami (60). Maacatami llapan warminkunapitapis mas kuyarqan. Roboampa ollqu tsurinkunami kayarqan ishkay chunka puwaq (28). Warmi tsurinkunanami kayarqan soqta chunka (60).
22 Maacapa wamran Abías rey kananta munarmi Roboamqa wawqinkunapa mandaqnin kananpä payta churarqan. 23 Shumaq yarpachakuskirmi wakin kaq tsurinkunata churarqan corralashqa markakunacho autoridä kayänanpä. Tsay markakunaqa Judá trïbu runakuna y Benjamín trïbu runakuna täyanqanchömi karqan. Tsay markakunamanmi mikuytapis atskata kamariparqan. Tsaynöpis atska warmikunatami tsurinkunapä ashiparqan.