1 Samuel
Ana qolluq kanqan
1
Efraín jallqakunacho Ramá markapitami juk runa Zuf castapita Elcana jutiyuq karqan. Elcanaqa Jerohampa tsurin y Eliúpa willkanmi karqan. Eliúmi Tohupa tsurin karqan. Tohunami Zufpa tsurin karqan. Tsaynöpis Elcana karqan efrateo runami. 2 Payqa ishkay warmiyuqmi karqan. Jukaq warminpa jutinmi karqan Ana y jukaq warmipa jutinnami karqan Penina. Peninapa wamrankuna kaptinpis Anapaqa manami wamran karqantsu.3 Cada watami Silo markaman Elcana aywaq llapanta mandaq Tayta Diosta adorar sacrificiuta rupatsinanpä. Tsaychömi sacerdöti Elípa tsurinkuna Ofni y Finees kaykäyarqan. Paykunapis sacerdötimi kayarqan.
4 Sacrificiupä uywata pishtarmi warmin Peninata wamrankunawan mikuyänanpä Elcana rakipaq. 5 Anatami itsanqa qolluq kaptinpis pasaypa kuyarnin mas allinnin kaqta rakipaq. 6 Qolluq kananpä Tayta Dios destinashqa kaptinmi Peninaqa Anata kushipar ajätsiq. 7 Cada watami Tayta Diospa wayinman aywayaptin Anata tsaynö ajanätsiq. Tsaymi Anaqa waqarnin ni mikuytapis munaqtsu. 8 Tsaynami Elcana nirqan: “Ana, ¿imanirtä waqaykanki? ¿Imanirtä mikunkitsu? ¿Imanirtä pasaypa llakishqa kaykanki? Noqaqa chunka ollqu wamraykipitapis masmi rikanäpä kaykä”.
Tayta Diosta Ana mañakunqan
9 Juk kutinami Silucho mikuyta upuyta ushaskir Tayta Diosta mañakunanpä Ana aywarqan. Sacerdöti Elínami Tinkuna Toldu punku läduncho jamaraykarqan. 10 Anaqa pasaypa llakikur yakulla tamyalla waqarmi Tayta Diosta mañakur 11 nirqan: “Llapanta mandaq Tayta Dios, wamrä mana kaptinmi pasaypa llakishqa kaykä. Ollqu wamrata qaraykamaptikiqa makillaykimanmi churaykamushä. Tsaymi munaynikicho kanqanta musyakänanpä aqtsanta imaypis rututsinqatsu”.†
12 Tayta Diosta unayyaq Ana mañakuptinmi shimillan kuyuqta Elí rikarqan. 13 Shonqullancho mañakuptin imatapis parlanqanta mana wiyarmi Ana machashqa kanqanta Elí yarparqan. 14 Tsaymi nirqan: “¿Imay hörayaqtä machashqa tsaycho kanki? ¡Machanqaykiyaqqa vïnuta ama upunkimantsu!”
15 Tsaynö niptinmi Ana nirqan: “Taytay, manami machashqatsu kaykä. Vïnuta ni ima machätsikuqtapis manami upushqätsu, tsaypa rantinqa pasaypa llakishqa kaykanqätami Tayta Diosta willaykä. 16 Machaq warmi kanqäta ama yarpaykullaytsu. Noqaqa pasaypa llakishqa karmi Tayta Diosta kay hörayaq mañakushqä”.
17 Tsaymi Elí nirqan: “Mañakunqaykinö kuyapäkuq Tayta Dios yanapaykulläshuy. Kananqa kushishqa kutikuy”.
18 Tsaynö niptinmi Anaqa nirqan: “Päkillä, taytay”. Tsaypitanami patsaranqanman kutiykur kushishqa mikurqan. Tsay junaqpitaqa mananami llakikurqannatsu.
Samuel yurinqan
19 Waraynin tutanami Tayta Diosta yapay adoraskir Ramácho wayinkunaman kutikuyarqan. Tsaypitanami runan Elcanawan punur Tayta Dios bendisaptin Anaqa qeshyaq rikakurqan. 20 Killan tinkuskiptinnami ollqu wamranta qeshyakurqan. Tayta Diosta mañakunqanpita ollqu wamran yuriptinmi jutinta churarqan Samuel kananpä.a
21 Elcanaqa Tayta Diostami awnishqa karqan cada wata Siluman aywar tsaycho adorananpä. Tsaymi tsurinkunawan y warmin Peninawan Silo markaman yapay aywayarqan. 22 Anami itsanqa aywayta mana munar runanta nirqan: “Wamräta manarä wasqirqa manami aywashätsu. Wasqiskiptinrämi payta apakurkur Tayta Diospa makinman churanäpä aywashä. Tsaychönami imayyaqpis payta sirvinqa”.
23 Tsaynö niptinmi Elcana nirqan: “Tsaynö kaptinqa wamrantsik wasqinqanyaq ama aywaytsu. Tayta Dios yanapaykulläshuy awninqaykita cumplinaykipä”.
Runanwan tsaynö willanakuskirmi Anaqa wamranta wasqinqanyaq aywarqantsu.
Tinkuna Tolduman Samuelta Ana apanqan
24 Samuel wasqiskiptinnami pishillarä kaykaptin Silupa aywar Tayta Diospa wayinman aparqan. Tsaynöllami aparqan kimsa watayuq juk torïtuta, ishkay arröba jarinata y vïnu puritsikunan qarawan vïnutapis. 25 Tsay apanqan torïtuta sacrificiupä altarcho rupaskatsirmi Elíman Samuelta pusharqan paypa makincho jaqinanpä. 26 Elí kaqman chaykurnami Ana nirqan: “Taytay, noqami kaycho Tayta Diosta ñöpata mañakur kaykarqä. 27 Tsay hörami Tayta Diosta mañakurqä wamrayuq kanäpä. Tsaynö mañakunqäta wiyamaptinmi kananqa wamrayuqna kaykä. 28 Tsaymi wamräta apamushqä Tayta Diospa makinman churanäpä. Paymi wanunqanyaq Tayta Diosta sirvinqa”.
Tsaynö niptinmi Elíqa urkunpis patsaman töpanqanyaq qonqurikuykur Tayta Diosta adorarqan.