Jordán mayuta tsimpayanqan
3
Tsaypitanami waraynin tuta tsaka tsakalla Josué y llapan Israel runakuna Sitimpita aywar Jordán mayu kuchunman chäyarqan. Mayuta manarä tsimparmi tsayllacho patsakuyarqan. 2 Tsaypita kimsa junaq päsaskiptinnami Israel autoridäkuna entëru campamentupa purir 3 niyarqan: “Tayta Diosnintsikpa Pactu Babulninta Leví trïbu sacerdötikuna apaykaqta rikar noqantsikpis qepallanta aywashun.† 4 Mayu tsimpan nänitaqa manami reqintsiktsu. Tsaynö kaptinqa mana pantakaykänantsikpä paykunapa karu qepallanta aywashun. Itsanqa apaykäyanqan babulmanqa ama alläpa witipäshuntsu. Tsaypa trokinqa juk waranqa (1,000) metrutanö qepanta aywashun”.5 Nirkurnami runakunata Josué nirqan: “Waray junaqmi rikaykashqa Tayta Dios milagruta ruranqa. Tsaynö kananpä kaykaptinqa purificakuyay”.
6 Tsaypita waraynin junaqnami sacerdötikunata Josué nirqan: “Tayta Diospa Pactu Babulninta runakunapa puntanta apayay”.
Tsaymi Josué ninqannö runakunapa puntanta babulta apayarqan.
7 Tsaypitanami Josuéta Tayta Dios nirqan: “Kanan junaqpitami Israel runakuna musyayanqa Moisésta yanapanqänölla qamtapis yanapaykanqäta. Tsaynö yanapaykanqäta tantiyarmi cäsukuyäshunki. 8 Qamnami Pactu Babulta apaykaq sacerdötikunata ninki Jordán mayuman yaykuskir ichïyänanpä”.
9 Tsaynö niptinmi Israel runakunata Josué nirqan: “Shäyämuy Tayta Diosnintsik imata nimanqantapis willanäpä”.
10 Qorikäyaptinmi nirqan: “Kanan junaqmi tantiyayanki imayyaqpis kawaq Tayta Dios noqantsikwan kaykanqanta. Paymi yanapamäshun wak tsimpacho taq runakunata ushakätsinantsikpä. Tsay runakunami kaykäyan cananeo runakuna, heteo runakuna, heveo runakuna, ferezeo runakuna, gergeseo runakuna, amorreo runakuna y jebuseo runakuna. 11 Tsaynöpis kay patsata munaynincho tsararaq munayyuq Tayta Diospa Pactu Babulnintami puntantsikta Jordán mayupa tsimpatsiyanqa. 12 Kanan akrayay chunka ishkay runakunata cada trïbupita jukta.† 13 Kay patsata munaynincho tsararaq Tayta Diospa Pactu Babulninta apaq sacerdötikuna yakuman yaykuskiyaptinmi ishkayman mayu rakikaskir takyaranqa tsakillapana päsanantsikpä”.
14 Tsaymi Jordán mayuta tsimpayänanpä Israel runakuna toldunkunata qoriskiyaptin Pactu Babulta umrushqa sacerdötikuna ñöpanta aywayarqan. 15 Cosëcha tiempu kaptinmi Jordán mayu püsarrä aywaykarqan. Tsaynö kaykaptinpis Pactu Babulta apaq sacerdötikuna Jordán mayuman yaykuyta qallaykuptinmi 16 Saretán particho kaykaq Adam markapita janamanpa yaku tsakirqan. Tsaynöllami tsay markapita uramanpapis Arabá Lamaryaq yaku tsakiskirqan. Arabá Lamarqa Kachi Lamarmi kaykan. Jordán mayu tsaynö tsakiskiptinnami Israel runakuna Jericó markaläpa tsimpayarqan. 17 Israel runakuna päsayanqanyaqmi Tayta Diospa Pactu Babulninta umrushqa sacerdötikuna tsakishqa mayu chawpincho ichiräyarqan. Tsaynömi Israel runakuna llapanpis tsakillapana tsimpayarqan.