Tsaynö aywarmi Rahab^† warmipa wayinman char tsayllacho patsakuyarqan. Rahabqa prostitüta warmimi karqan.

2 Rikapakuqkuna Rahabpa wayinman chäyanqanta rikaykurmi Jericó markapa mandaqnin reyta juk runa willar nirqan: “Kanan tardimi Israel runakuna markantsikman chäyämushqa imanö atacamänantsikpäpis rikapakuq”.

3 Tsaynö willaptinmi Rahab kaqman runakunata kacharqan niyänanpä: “Wayikiman patsakamuq runakunata qarqamuy. Paykunaqa markantsikta rikapakuqmi shäyämushqa”.

4 Rey kachanqan runakuna chäyänanpäqa maynami rikapakuq runakunata Rahab pakaykushqana karqan. Tsaymi paykunata nirqan: “Rasunpaypami runakuna näqa chäyämushqa. Itsanqa maypita kayanqantapis manami musyätsu. 5 Patsa tsakaykaptinna marka yaykuna sawan punkuta wichqananpäna kaykaptinmi aywakuyashqa. Manami musyätsu maypa aywayanqantapis. Juklla qatiparqa taripäyankimi”.

6 Tsaynö nirpis Rahabqa altuscho qoturaykaq lïnu päja rurinchömi tsay ishkay runakunata pakarätsirqan.

7 Rahab ninqanta criyirmi rey kachanqan runakunaqa taripayta yarpar Jordán mayu väduyaq aywayarqan. Yarquskiyaptillannami Jericó markaman yaykuna sawan punkuta wichqaskiyarqan.

8 Nirkurnami ishkay rikapakuq runakuna manarä punukäyaptin pakaraykäyanqan kaqman witsaskir Rahab nirqan: 9 “Shamuykäyanqaykita musyarmi kaycho taq runakuna pasaypa mantsariywan tullunkunapis tsuktsukyäyanrä. Tsaymi musyä kay markata y wakin markakunatapis Tayta Dios entregaykuyäshunaykipä kanqanta. 10 Musyayämi Egiptupita yarqayämuptiki Puka Lamarta päsayämunaykipä Tayta Dios tsakitsinqanta.^† Tsaynöpis musyayämi Jordán mayu tsimpan amorreo runakunapa mandaqnin reykuna Sehónta y Ogta soldädunkunatawan wanutsiyanqaykita.^† 11 Tayta Diosnintsikqa ciëluchöpis kay patsachöpis llapanpä munayyuqmi kaykan. Pay yanapayäshunqaykita musyarmi mantsayäshurniki pipis qamkunawan pelyayta valurantsu.

12 “Tsaymi rugakullä: Tayta Diospa jutincho awniyämay qamkunata alli rikanqänölla llapan castäkunatawan alli rikaykayämänaykipä. Kuyapäyämänaykipä kanqanta awnimarqa ima señalllatapis willayämay. 13 Taytäta, mamäta, turïkunata, ñañäkunata y paykunawan kaykaqkunataqa ama wanuykatsiyaytsu”.

14 Tsaynö rugakuptinmi niyarqan: “Kay parlanqantsikta pitapis mana willaptikiqa noqakunapis qamkunata tsapäyäshaykimi. Kay markakunata Tayta Dios makïkunaman churamuptinqa imaypis allimi rikayäshayki”.

15 Tsaynö willanakuskirmi Rahabqa ishkay rikapakuq aywaqkunata waskawan ventänanpa urätsirqan. Tsaynö urätsirqan marka murälla janancho wayin kaptinmi. 16 Manarä urätsirmi paykunata nirqan: “Ashiyäshuqniki runakuna mana tariyäshunaykipä jallqakunaman aywaykur paykuna kutiyämunqanyaq kimsa junaq pakaräyanki. Tsaypitaqa aywakuyanki”.

17 Tsaynö niptinmi niyarqan: “Noqakunaqa llapan awniyanqätami cumpliyäshä. 18 Jericó markaman Israel runakuna yaykayämunqan junaq urätsimanqayki ventänaman kay puka waskata watanki. Tsay junaq wayikiman qorikäyanki taytaykiwan, mamaykiwan, turikikunawan y llapan castaykikunawanpis. 19 Wayikicho kaqkunataqa manami mayqantapis wanutsiyanqatsu. Wayikipita yarquq kaqmi itsanqa wanutsiyänanpä kikin jutsayuq kanqa. Kay wayikicho kaykaqta pitapis wanutsiyaptinqa noqakunami jutsayuq kayäshä. 20 Kanan parlanqantsikta pitapis willaptikimi itsanqa kay awniyanqäta cumpliyäshätsu”.

21 Tsaymi Rahabqa nirqan: “Taytakuna, niyanqaykinöchi kanqa”.

Tsaynö willanakuskirmi paykuna despidikur aywakuyarqan. Aywakuyaptinnami tsay puka waskata ventänaman juklla watarqan.

22 Nirkurnami tsay ishkay rikapakuq aywaqkuna jallqakunaman aywaykur kimsa junaq pakaräyarqan. Pakaräyaptin ashiqnin runakuna maytsaypa ashirpis mana tarirmi Jericóman kutikuyarqan. 23 Tsaynami ishkan rikapakuq aywaqkuna jallqakunapita urämur Jordán mayuta tsimpayarqan. Josué kaqman kutiykurnami ima päsanqantapis willar 24 niyarqan: “Tayta Diosmi tsay markakunata makintsikman churamushqa. Yaykunantsikpä kanqanta musyarmi maytsaycho taq runakunapis pasaypa mantsarirnin tsuktsukyäyan”.