Éxodo
Egiptucho Israel runakuna mirayanqan
1
Egiptuman Jacob aywakuptinmi llapan tsurinkunapis warmintin tsurintin aywayarqan. Jacobpa tsurinkunapa jutinkunami kayarqan 2 Rubén, Simeón, Leví, Judá, 3 Isacar, Zabulón, Benjamín, 4 Dan, Neftalí, Gad y Aser. 5 Tsurinkunawan y willkankunawanmi Jacobqa Egiptuman qanchis chunka (70) chäyarqan.a Tsurin Josémi itsanqa Egiptuchöna kaykarqan.†6 Tsaychömi Josépis, wawqinkunapis y paykunawan aywaqkunapis wanuyarqan. 7 Paykunapita aywaraqkunami tsaytsika kayarqan.
Egiptucho Israel runakuna ñakayanqan
8 Tsaypitanami Egiptucho rey kananpä jukna yaykurqan. Payqa mananami musyarqantsu José pï kanqantapis. Tsaymi Egipto runakunata nirqan: 9 “Taytakuna, tantiyakushun. Israel runakuna pasaypa mirarmi noqantsikpitapis mas munayyuq kaykäyan. 10 Tsaynö mana mirayänanpä imallatapis rurashun. Tsaynölla mirarqa contrantsikkunawan takukaykur tikrapämashqa vinciyta manami kamäpakushuntsu. Vinciskamarnintsikmi kaypita aywakuyanqa”.†
11 Tsaynö willanakuskirmi mas yärakuyanqan capatazkunata churayarqan Israel runakunata maqa maqarkur arutsiyänanpä. Tsaynö arutsirmi Pitón y Ramesés markakunata sharkatsiyarqan. Tsay markakunachömi Faraónpab mikuy churakunan tröjakuna karqan. 12 Pasaypa ñakatsiyaptinpis Israel runakunaqa masmi mirayarqan. Tsaynö mirayaptinmi Egipto runakuna pasaypa mantsariyarqan. 13 Tsaymi mas aja aruykunachöna arutsiyarqan. 14 Mitutapis jarutsir, adöbitapis sutatsir y chakrankunachöpis arutsirmi pasaypa ñakatsiyarqan. Llapan aruychöpis Israel runakunata pasaypami ñakatsiyarqan.
15 Tsaynöllami Egipto nacionpa mandaqnin rey qayatsirqan Sifratawan Fúata. Paykunaqa hebrea warmikunata qeshpikatsiqmi kayarqan. Qayaykatsirmi nirqan: 16 “Hebrea warmikuna qeshyakuyaptin qeshpikatsiq aywar rikayanki wamran ollqu kanqanta o warmi kanqantapis. Ollqu kaptinqa juklla wanutsiyanki. Warmi kaptinqa ama wanutsiyankitsu”.
17 Tsaynö nikaptinpis partërakunaqa Tayta Diospita mantsapakur manami Egipto nacionpa mandaqnin rey ninqanta cäsuyarqantsu. Tsaymi ollqu yuriptinpis wanutsiyarqantsu. 18 Tsayta musyarmi Egipto nacionpa mandaqnin rey yapay qayaykatsir partërakunata nirqan: “¿Imanirtä ollqu yuriqkunata wanutsiyankitsu?”
19 Tsaynö niptinmi niyarqan: “Taytay, hebrea warmikunaqa manami Egipto warmikunanötsu. Tsay warmikunaqa mas fuerti karmi manarä chäyaptï qeshyakuskiyan”.
20 Tsaynöpami Israel runakuna mas atskaman mirarnin mantsariypä rikakuyarqan. 21 Tayta Diospita mantsapakur ollqu yuriqkunata mana wanutsiyanqanpitami partërakunapa castankuna atskaman mirayänanpä Tayta Dios shumaq rikarqan.
22 Tsaymi llapan Egipto runakunata Faraón nirqan: “Hebreo runakunapa ollqu tsurin yuriptinqa llapanta mayuman jitarpuyanki. Warmi yuriptinqa ama wanutsiyankitsu”.†