Salmo 64 (63)
Chikiqninkunapita tsapänanpaq Diosta mañakunqan
(1) Cantaqkunapa mandakuqninpaqmi. David qellqanqan.
1 (2) Dios Yayallä, llakikur rugakunqaqta wiyaykallämay.
Mantsaypaq chikimaqnïkunapita tsapaykallämay.
2 (3) Mana alli runakuna atacayämänanpaq willanakuyaptin pakaykallämay.
Conträ shäriyänanpaq willanakuqkunapita libraykallämay.
3 (4) Conträ parlayanqanmi fïlu espädanöraq shonqüman chan.
Venënuyuq flëchawan flëchaqnömi mana allikunata niyäman.
4 (5) Jutsannaqtam manakaqkunata culpatsayan.
Pipitapis mana mantsakurmi llutalla tumpayan.
5 (6) Mana allikunata rurayänanpaqmi kikinkunapura willanakur animatsinakuyan.
Pitapis trampaman ishkitsiyänanpaqmi willanakuyan.
Paykunaqa pipis mana rikäyanqantam yarpäyan.
6 (7) Tsaynöllam yarpäyan pipis mana taripunanpaq kanqanta.
¡Paykunaqa alläpa mana allitam yarpäyan!
7 (8) Dios Yayam flëchanwan flëchanqa.
Paykunatam illaqpita castiganqa.
8 (9) Kikinkunapa shiminkunallapitam chikishqa kayanqa.
Tsaynö kaykaqta rikarmi pïmaypis asipäyanqa.
9 (10) Dios Yaya castiganqanta musyarmi llapan mantsakuyanqa.
Tsaymi Dios Yaya ima rurayanqantapis willakuyanqa.
Dios Yaya llapan ruranqantam musyayanqa.
10 (11) Alli ruraq runam Dios Yaya yanapaptin kushikunqa.
Imaykapita tsapänanpaqmi payllaman confiakun.
Dios Yaya munanqannö kawaqkunam kushikuyanqa.