Salmo 63 (62)
Dios Yayata ashinqan
(1) David qellqanqan salmu. Judá nacionpa tsunyanchö kanqanta yarparmi kay salmuta qellqarqan.†
1 (2) ¡Dios Yayallä, qamllam Diosnï kanki!
Atsik atsikllanam qamta ashiq.
Yakunaqnöraqmi puntaykichö kayta munä.
Wañuyparaqmi qamwan kawayta munä.
Alläpa tsaki arenïlla chakranömi kaykä.†
2 (3) Templuykichö revelamänaykitam munä.
Poderösu kanqaykitam tantiyayta munä.
3 (4) Kuyamanqaykim kawaynïpitapis mas alli.
Tsaymi llapan shonqüwan imaypis alabashayki.
4 (5) Kawanqäyaqmi imaypis agradëcikushayki.
Makïta pallarkamurmi mañakamushaq.
5 (6) Llapan shonqüwan kushishqa alabarnikim contentakushaq.
Imayka alli mikuyta mikur kushikunqänömi kushikushaq.
6 (7) Cämächöpis qamllapaqmi yarparaykä.
Mana puñuyta puëdirpis qamllapaqmi shonqü yarparan.
7 (8) Llapan imaykachömi yanapamashkanki.
Riprayki qopinchö tsapämaptikim kushikü.†
8 (9) Llapan shonqüwanmi qamman creyikamü.
Derëcha kaq makikiwanmi imaypis jancharämanki.
9 (10) Wañutsiyämayta munaqkunam kikillankuna puntata ushakäyanqa.
10 (11) Paykunatam espädawan wañutsiyanqa.
Ayankunatapis chacalkunam mikuyanqa.
11 (12) Peru Dios Yaya yanapanqanpitam rey kushikunqa.
Dios Yayaman confiakuqkunam kushishqa alabayanqa.
Llullakuqkunam sïqa ni ima niyta puëdiyanqatsu.