—Jamuy, —nispa.

2 Ricorkanitaj uj yuraj caballota. Chay caballopi llokꞌaska cajtaj maquinpi uj flechana arcoyoj carka. Atipaskanmanta uj pillu umanpaj payman koska carka. Atipaspataj llojserka astawan atipananpaj.

3 Chay iscay caj sellota quicharejtin uyarerkani chay iscay caj causajta nejta:

—Jamuy, —nispa.

4 Uj puca caballotaj llojsimorka. Chay caballopi llokꞌaska cajmantaj atiy koska carka. Chay atiywan cay pacha runas manaña allinpi causanancupaj llojsimun. Chayraycu runaspura wañuchinaconkancu. Chaywanpis caballopi cajmanka jatun tꞌujsina espada koska carka makanacunanpaj.

5 Chay quinsa caj sellota quicharejtin uyarerkani chay quinsa caj causajta nejta:

—Jamuy, —nispa.

Ricorkanitaj uj yana caballota. Chay caballopi llokꞌaska cajtaj maquinpi pesanayoj carka. 6 Uyarerkanitaj chay tawa causajcuna chaupipi nejta:

—Uj kilo trigota rantinapaj uj pꞌunchay llancꞌana canka. Quinsa kilo cebadata rantinapaj uj pꞌunchay llancꞌana canka. Aceiteta vinotataj ama imananquichu, —nispa.

7 Chay tawa caj sellota quicharejtin uyarerkani chay tawa caj causajta nejta:

—Jamuy, —nispa.

8 Ricorkanitaj uj kꞌellu caballota. Chay caballopi llokꞌaska cajtaj Wañuy sutiyoj carka. Infierno sutichaska cajtaj paypa khepanta jamorka. Paycunaman atiy koska carka cay pacha runasmanta tawa caj parteta wañurachinancupaj. Guerraswan, yarkhaywan, onkoywan, cay pacha fiero animaleswanpis wañurachenkancu.

9 Chay phishka caj sellota quicharejtintaj Diospa runasninpa almasnincuta ricorkani. Paycunaka jaywana altar urapi casharkancu. Runas paycunata wañuchiskancu Diospa niskanta willaraskancuraycu paypi japꞌicuskancuta willacuskancuraycupis. 10 Paycunataj sinchꞌiwan khaparerkancu:

—Tucuyta camachej santo cheka Diosniycu ¿maycꞌajcamataj suyanquirí? ¿Maycꞌajtaj nokaycuta wañuchej cay pacha sajra runasta juchachanquirí?

11 Paycunaman yuraj khoysu pꞌachas koska carka sapa ujman. Nillarkataj:

—Pisi tiempotawan samarinallayquichej tiyan. Diosta casoj-masisniyquichej hermanosniyquichejpis kancunajina wañuchiskasllataj cankancu. May chhicachá canayquichej tiyan, chayman juntꞌacunancama suyaychej, —nispa.

12 Ricorkanitaj chay sojta caj sellota quicharishajta. Cay pachataj sinchꞌita qharcatiterka, intipis yanayaycorka mana cꞌanchananpaj, quillapis tucuynin yawarjina tucuporka. 13 Patamanta chꞌascacunapis jallpꞌaman urmaramorkancu. Sinchꞌi wayrawan cuyuchiska higueraj pokoyninjina urmaramorkancu. 14 Cielo lliqꞌiska chincachiskataj, uj kelka cꞌuyujina cꞌuyuycuska carka. Tucuy orkos tucuy yacuwan muyuycuska jallpꞌaspis lugarnincumanta cuyuchiskas carkancu. 15 Cay pacha camachejcunaka, curajcunapis, capitancunapis, khapajcunapis, callpayojcunapis, tucuy runacunaka, camachispis, mana camachispis mancharicuywan pacacamorkancu. Paycunaka orko juscꞌusman, kakasman pacacamorkancu. 16 Orkosta kakasta nerkancutaj:

—¡Pꞌampaycuwaycu! ¡Pacaycuwaycu tucuyta Camachej tiyanapi tiyacojmanta Corderoj phiñacuyninmantawan! 17 Diospa cꞌajaj phiñacuynin pꞌunchay chayamunña. ¡Manaña pipis causayta atinmanchu! —nispa.