APOCALIPSIS
O REVELACION A SAN JUAN
Dios pacaska cajta Juanman ricuchin
1
Dioska yuyaskan Jesucristopi juntꞌacuskanta ricuchiyta munarka. Chay yuyaskantaj uskhayta juntꞌacunan tiyan. Ajinapi Jesucristota nerka, camachisninman sutꞌinchacunanta. Chayraycu Jesucristoka angelninta cachamorka camachin Juanman Diospa niskanta sutꞌinchananpaj. 2 Ajinapi Juanka Diospa niskan sutꞌinchacuskanta ricuspa chekanta kelkarka. Jesucristopis chay niskan cheka caskanta willallarkataj.3 Yuyaskanpa juntꞌacunan tiempoka ñapis chayamonkaña. Chayraycu cay sutꞌinchaska kelkaskata leejcuna, cayta uyarispataj casojcunapis may cusiskas cankancu.
Juan kelkan Diospa ajllacuskasninman
4 Juanka Asia jallpꞌapi caj Diospa ajllacuskasnin kanchis iglesiasman kelkan. Dios Tatamanta, Santo Espiritumanta, Jesucristomanta cꞌacha yanapaynin kancunawan cachun allillanpi causacunayquichejpaj. Dios Tataka cashanpuni, carkapuni, wiñaypajpunitaj canka. Santo Espiritoka Diospa ñaupakenmantaa tucuy niskasninta juntꞌanpunimin. 5 Jesucristopis cheka willajmin. Payka wañuymanta ñaupajta causarimojmin, cay pacha tucuy camachejcunaj Camachejnincutaj. Payka nokanchejta munacuwanchejpuni. Yawarninta jichꞌaspataj wañuyninwan juchasninchejmanta llimphuchawarkanchej. 6 Ajinapi Jesucristoka nokanchejta uj llajtatab ruwawarkanchej Dios Tatanman kayllaycuchejcuna cananchejpaj. Payka jatunchaska cachun. Wiñaypa wiñayninpajtaj atiywan ruwachun. Ajina cachun.
7 Payka phuyus chaupipi jamushan. Tucuy runacunataj payta riconkancu, payta ñacꞌarichejcunapis. Tucuy cay pachapi ayllucunaka payta ricuspa phutiywan wakankancu. Ajinata nerka, ajinataj cachun.
8 Tucuy atiyniyoj Señor Dioska nin: “Noka cani kallarejka, nokataj tucuchaj cani,”c nispa. Payka cashanpuni, carkapuni, wiñaypajpunitaj canka.
Juan Jesucristota ricun
9 Noka, Juan, hermanoyquichej cani. Kancunawan ujchaska llaquiycunata muchuni. Jesucristo tucuyta camachinancama paypi japꞌicoj-masiyquichejpis cani. Diospa niskanta Jesucristomanta willaraskayraycu Patmos niska jallpꞌapi casharkani. [Chay jallpꞌaka yacuwan muyuycuskamin.]d 10 Domingo pꞌunchaypi Santo Espiritoka atiyninman churawarka jamoj imasta sutꞌinchanawanpaj. Ajinapi uj cornetaj wakaynintajina uj khaparejta wasaypi uyarerkani. 11 Niwarka:
—Uj libropi kelkay imatachá ricunqui, chayta. Chaytataj Asia jallpꞌapi caj Diospa ajllacuskasnin kanchis iglesiasman apachiy. Paycunaka kanchis llajtaspi: Efeso, Esmirna, Pérgamo, Tiatira, Sardis, Filadelfia, Laodicea llajtaspi cancu, —nispa.
12 Uyarispa cutirerkani parlawajta ricunaypaj. Cutirispataj korimanta kanchis cꞌanchanasta ricorkani. 13 Chay cꞌanchanas chaupipitaj runaman rijchꞌacojta ricorkani. Payka khoysu pꞌachawan pꞌachalliska carka. Sonkon chekanpitaj kori chumpiwan chumpiska carka. 14 Umantaj yuraj ritꞌi millmajina carka. Ñawisnintaj ninajina laurashaj carka. 15 Chaquisnintaj broncejina ninapi ruphashajman rijchꞌacorka. Parlaskantataj jatun phajchajina sinchꞌita uyarerkani. 16 Payka paña maquinpi kanchis chꞌascasta japꞌisharka. Siminmantataj tꞌujsina espada llojsimusharka. Puraj filoyoj afilaska carka. Uyantaj cꞌanchasharka, sinchꞌita cꞌanchaj intijina.
17 Payta ricuspataj chaquisninman wañuskajina urmarkani. Payrí paña maquinta nokaman churaycuwaspa niwarka:
—Amaña manchachicuychu. Nokamin ñaupaj caj cani, nokataj khepa caj cani. 18 Causaj caj cani. Wañuska carkani, cunantaj wiñaypa wiñayninpaj causaj cani. Wañuyniywan juchata khechuskayraycu nokalla wañuytawan infiernotawan atiparkani.e [Atipaskayraycutaj wiñay causayta konaypaj atiyniyoj cani.]f 19 Chayraycu ricuskayquita kelkay, cunan cajcunatapis, khepanta jamushancuña, chaycunatapis. 20 Kanchis chꞌascasta paña maquiypi ricorkanqui. Kanchis kori cꞌanchanastapis ricorkanqui. Chay kanchis chꞌascaska chay kanchis iglesiaspa willajcunancu cancu. Chay korimanta kanchis cꞌanchanastaj Diospa ajllacuskasnin cancu, chay kanchis iglesias, —nerka chay parlamuwajka.