Cristopi japꞌicojka sajra cajta atipan
5
Dios ajllarka Jesusta camachinanpaj. Chayta tucuy japꞌicojcunaka Diospa cheka wawasninmin. Dios Tatata tucuy munacojcunaka Diospa wawasnintapis munacun. 2 Diosta munacuspa camachiwaskanchejtataj casuspa yachanchej paypa wawasninta munacuskanchejta. 3 Paypa camachiskanta ruwaskanchejwan Diosta munacuskanchejta atinchej ricuchiyta. Camachiskasnintaj mana ancha sinchꞌichu cancu ruwananchejpaj. 4 Imaraycuchus Diospa cheka wawasnenka cay pachaj sajra cajninta atipancu. Jesucristo Diospa Wawan caskanta japꞌicuspa juchata atipanchej. 5 Arí, Jesús Diospa Wawan caskanta japꞌicojlla sajra cajta atipan.Diospa Wawanmanta willajcuna
6 Jesucristoka jamorka Diosmanta munayninta ruwananpaj yacunejta yawarnejtawan. Santo Espiritutaj chay imasmanta sutꞌita willan cheka caj caskanraycu. 7 Imaraycuchus janaj pachapi quinsa willancu: Tatawan, Niskanwan, Santo Espirituwan. Chay quinsantincoka ujllamin. 8 Cay pachapi quinsa willajcuna callancutaj: Santo Espírituwan, yacuwan, yawarwan. Quinsantincutaj uj quiquillanta willancu. 9 Runaspa willaskancuta uyarispa japꞌinchej. Diospa willaskanrí aswan curajmin cashan pay quiquin willaskanraycu. Paytaj sutꞌita willan Jesucristo Wawan caskanta. 10 Jesucristopi japꞌicojka yachan sonkonpi pay Diospa Wawan caskanta. Imaraycuchus japꞌicojpa sonkonpi Dios chayta reparachin. Diospi mana japꞌicojrí payta llullatajina khawan Wawan Jesucristomanta Diospa willaskanta mana japꞌicuskanraycu. 11 Dios willan wiñay causayta kowaskanchejta paypi japꞌicojcunaman. Cay causaytaj Wawan Jesucristomanta jamun. 12 Diospa Wawanwan ujchaska cajka wiñay causayniyojmin. Diospa Wawanwan mana ujchaska cajrí manallataj wiñay causayniyojchu.
Yachanayquichej wiñay causayniyoj caskayquichejta
13 Kancuna, Diospa Wawan Cristopi japꞌicojcunaman cayta kelkamuyquichej. Munani chekatapuni yachanayquichejta cunan wiñay causayniyojña caskayquichejta.
Yuyaychanas
14 Arí, mana manchachicuspa Diosman atinchej kayllaycuyta. Imallatapis munayninmanjina mañacojtinchej pay munacuywan uyariwanchej. 15 Yachanchej mañacuskanchejta Dios uyariwaskanchejta. Ajinapi yachallanchejtaj paymanta mañacuskanchejta japꞌiskanchejtapis.
16 Uj hermanota juchallishajta ricuwajchej chayka, Diosmanta mañapuychej. Diosta mana casuspa paypuni juchallejka wañuyman wijchꞌuska canka. Noka mana niyquichejchu chay juchallejpajka mañapunayquichejta. Mana paypuni juchallejrí Diosmanta mañapuskayquichejraycu causayta atin japꞌiyta. 17 Diospa cheka wawasnin mana allin cajta ruwaspa juchallicuncu. Juchanta sakespa Diospi japꞌicojka mana wañuyman wijchꞌuskachu canka.
18 Yachanchej Diospa wawasnenka manaña juchapajchu causashaskancuta. Diospa Wawan, Cristorí payta wakaychan. Ajinapi supay Satanaska mana imananchu Diospa wawanta.
19 Yachanchej Jesucristopi tucuy japꞌicojcuna Diospa cheka wawasnin caskanchejta. Cay pachapi tucuy waj runasrí chay supaypa camachisnin cancu.
20 Yachanchejtaj Jesucristo, Diospa Wawanka, Tatanpa munayninta ruwananpaj cay pachaman jamuskanta. Chaywanpis kowarkanchej yuyayta astawan astawanraj rejsinanchejpaj cheka cajta. Nokanchejka uj sonkolla causacunchej chay cheka caj Dioswan, Wawan Jesucristonejta. Payka cheka Diospunimin. Paynejtataj wiñay causayniyoj canchej. 21 Munaska wawasníy, tucuy sonkowan Diosta munacuychej. Waj dioscunata manapuni yupaychaychejchu [nitaj chaycunapi yuyallaychejpischu].a Ajina cachun.