Ruwaskaska munacuyllawan allinta wiñachin
13
Runacunaj parlaynincupi angelcunaj parlaynincupipis parlayman. Sitajchus Diosta runastataj mana munacuymanchu chayka, khasilla parlayman. Chꞌusaj fierro wakan ajina chayrí thanta lata, calan-calan, wakaskanmanjina tucuni. 2 Sichus willarajtaj cayman. Tucuy pacaska imasta sutꞌita entiendeyman. Diospa tucuy cheka cajnintapis yachayman. Sitajchus tucuy sonkoywan Diospi japꞌicuskay canman orkosta khepanta khepanta wajnejman okharichinaycama. Manataj munacuymanchu chayka, mana imapischu cani. 3 Sichus tucuy capuyniyta jaywaramuyman wajcha runasman. Quiquin cuerpoytapis jaywayman ruphachiska cananpaj. Manataj munacuymanchu chayka, tucuy ruwaskasniypis mana ni ima allinniypajchu.Munacojka cayjinata ruwan
4 Munacojka mana saycꞌuspa muchucun, cꞌacha cajtapuni ruwan. Mana envidiacunchu manataj jatunchacunchu, nitaj pay quiquinta curajpaj khawacunchu. 5 Munacojka ni piman pꞌenkay cajta ruwanchu; manataj payllapajchu mascꞌan; manataj phiñacunchu. Munacojka runa-masinpa sajra ruwaskanta mana sonkonpi wakaychanchu; 6 manataj juchanmanta cusipayanchu; astawanpis cꞌacha ruwaskasmanta cusicun. 7 Munacojka hermanonpa tucuy pantaskanta chꞌinllamanta muchucun; confianpuni suyanpunitaj hermanonta Dios yanapananta; tucuyta muchucun hermanonpa allinninpaj.
Munacuyka ni jaycꞌaj tucucunchu
8 Munacuyka ni jaycꞌaj tucucunchu. Espiritoka atiycunata cunan pꞌunchaycuna koshan ajllacuskasninta wiñachinanpaj. Willaraycuna canman, chaypis tucuconka; waj parlaycunapi parlay canman, chaypis chꞌinyaponka. Cheka cajta yachay canman, chaypis tucuconka. 9 Cunanka pisillata yachanchej pisillatataj sutꞌinchanchej. 10 Astawanrí jakay jamoj pꞌunchaypimin sumajta yachasun. Chaypacha pisi yachayninchej tucuconka.
11 Wawa cashaspaka wawajina parlaj cani, wawajina yuyaj cani, wawajina unanchaj cani. Runaña casparí wawajina ruwanastaka sakepuniña. 12 Ajinallatataj cunanpis ayphullata ricushanchej espejonejtajina. Jakay pꞌunchaypirí uya uyata Cristota ricusunchej. Cunanka pisillata yachani. Chanta sutꞌita yachasaj imaynatachus Diospis allinta rejsiwan ajinata. 13 Ajinaka Diospi japꞌicuywan, Diospi confiacuywan, munacuywanka ni jaycꞌaj tucuconkancuchu. Cay quinsamantarí curajka munacuymin.