—Viudasniycuman chay hebreo parlajcuna sapa pꞌunchay jaywaranapi mana allintachu jaywarancu, —nispa.

2 Chanta chunca iscayniyoj cachas Jesuspi tucuy japꞌicojcunata wajyarkancu tantacunancupaj. Nerkancutaj:

—Nokaycoka Diospa niskanta willaranaycu tiyan. Mana allinchu pisichicojcunaman jaywaspa Diospa niskanta willarayta sakepunaycoka. 3 Hermanosníy, chayraycu kancunamanta ajllaychej kanchis runasta cay ruwanapi yanapanancupaj. Cachuncu sumajpaj khawaskas, Dios Espirituwan juntꞌa, sumaj yuyayniyoj runas. Paycunata churasunchej cay ruwaypi khawanancupaj. 4 Nokaycutaj tucuy sonkowan Diosmanta mañacuspapuni casajcu. Camachiskas caskaycumanjina Diospa niskantapis yachachillasajcupunitaj, —nispa.

5 Chay niskancoka tucuynincupaj allin carka. Ajllarkancutaj Estebanta. Payka Jesuscristopi chekamanta japꞌicoj runa carka, Santo Espirituwan juntꞌa. Ajllallarkancutaj Felipeta, Procorota, Nicanorta, Timonta, Parmenasta, Nicolastawan. Cay Nicolaska Antioquía llajtamanta carka. Ñaupajpi payka Diosta casoj runaman tijracaporka. 6 Chanta tantacojcunaka chay kanchis ajllaskancuta pusarkancu Jesuspa cachasninpa ñaupakencuman. Cachastaj Diosmanta mañapuspa maquisnincuta umancuman churarkancu Dios sumajta callpachananpaj ruwaynincupi.

7 Ajinamanta astawan astawanraj runas Diospa palabranta uyarerkancu Jerusalén llajtapi. Jesucristopi japꞌicojcunataj mayta yapacamoj cancu. Paycunataj Diosta casusharkancu. Yupaychana-wasipi ruwanayoj runaspis ashqhas, Jesuspi japꞌicuspa palabranta casorkancu.

8 Santo Espíritu Estebanman atiyta kospa sumajta yanaparka. Jesuspi japꞌicuspataj may jatuchej tꞌucunasta ricuchinastawan ruwaj runas chaupipi. 9 Chanta tantacuna-wasimanta waquin cachariska camachis niskacuna jatarerkancu. Chaycunawan Cirene llajtamanta carkancu Alejandría llajtamanta, Cilicia jallpꞌamanta, Asia jallpꞌamantapis. Chay runasmanta waquincuna Estebanwan churanacuyta kallarerkancu. 10 Espiritunnejta Dios sumaj yachayta Estebanman korka parlananpaj. Chayraycu payta mana aterkancuchu atipayta parlaskasnincuwan. 11 Chanta paycuna waquin runasman lluqꞌiycorkancu llullacunancupaj:

—Cay Esteban Moisespa camachiskasninmanta sajrata parlajta uyariycu, Diospa contranpipis, —nispa.

12 Ajinamanta runasta, curajcunata, yachachejcunatawan okharicherkancu chꞌajwanancupaj. Ujllata phawaycuspataj Estebanta japꞌiycorkancu. Phiñaskas pusarkancutaj jatun tantacuyman. 13 Llulla parlajcunatataj churarkancu. Llullacojcunataj paypa contranpi churaycucuspa nerkancu:

—Cay runa Diosta yupaychana-wasipaj sajrata rimashallanpuni, Moisespa camachiskasninmantapis. 14 Cay runamanta uyarillaycutaj Nazaret llajtayoj Jesús chay yupaychana-wasita urmachinanta. Moisés yachachiwaskanchejtapis wijchꞌuspa waj yachachinaswan Jesús tijrayta munaskanta, nerka cay runaka, —nispa.

15 7.8 Chaymanta curaj tantacuypi cajcuna tucuynincu allinta khawarkancu Estebanta. Uyantataj lliphipishajta ricorkancu janaj pachamanta uj willajpa^a uyantajina.