—¡Señorninchejta pꞌampanamanta apacapuskancu! Manataj yachaycuchu maymanchus payta churamuskancuta, —nispa.

3 Chayraycu Pedroka chay waj yachacojwan pꞌampanaman rinancupaj llojserkancu. 4 Chanta correspa iscaynincu rerkancu. Chay waj yachacojri aswan uskhayta rispa Pedrota atiparka. Ñaupajta pꞌampanaman chayaspa 5 khawaycurispataj chaypi caj maytꞌunasta ricorka, manataj yaycorkachu. 6 Chaymanta Simón Pedroka paypa khepanta chayamorka. Pꞌampanamantaj yaycorka. Maytꞌunastari sakeskata ricorka. 7 Umanpi churaska maytꞌunatataj manaña cay waj maytꞌunaswan cuscatachu ricorka. Manachayka wajnejpi ricorka, imayna maytꞌuskachus carka ajinata. 8 Chanta ñaupaj jamoj yachacojpis pꞌampanaman yaycuspa ricullarkataj, creeytataj kallarerka. 9 Paycunaka manaraj entienderkancuchu Jesusmanta cayjina kelkaska caskanta, pay wañuymanta causarimunan tiyan. 10 Chayraycu yachacojcunataj wasincuman cutiporkancu.

11 Mariaka pꞌampana juscꞌu jawapi wakaspa sayacusharka. Wakashaspataj pꞌampana uqhuta khawaycorka. 12 Chaypitaj iscay angelesta yuraj lliphipej pꞌachasniyojta tiyashajta ricorka. Jesús churaska carka, chaypi paycunata tiyashajta ricorka. Ujninta cabeceranpi, ujnintataj jaytꞌananpi ricorka. 13 Angelestaj nerkancu:

—Doña ¿imaraycutaj wakashanquirí?

Mariataj nerka:

—Señorniyta apacapuskancu. Manataj yachanichu maymanchus payta churamuskancuta, —nispa.

14 Chayta niytawan khepaman cutiricuspa, Jesusta sayashajta ricorka manataj yacharkachu Jesús caskanta. 15 Jesusri payta nerka:

—Doña ¿imaraycutaj wakashanquirí? ¿Pitataj mascꞌashanquirí?

Mariaka hortelano caskanta yuyaspa payman nerka:

—Señor, kan payta apacaporkanqui chayka, willaway maymanchus churamuskayquita, nokataj apacapusaj, —nispa.

16 Jesusri payta nerka:

—¡María! —nispa.

Paytaj cutirimuspa kayllaycorka nerkataj:

—¡Yachachejníy!

17 Jesustaj nerka:

—Amaña japꞌiwaychu. Pisillataña kancunawan casaj, manaraj Tatayman wicharishaskayraycu. Kanrí riy hermanosniyman nimuy paycunaman: Wicharipushani Tataypaman, Tatayquichejpaman; Diosniyman, Diosniyquichejman, —nispa.

18 Magdala llajtayoj Mariataj rerka yachacojcunaman willamoj:

—¡Señorninchejta ricuni! —nispa.

Willallarkataj imatachus payman niskantapis.

19 Quiquin Domingo pꞌunchaypi chꞌisiyayta yachacojcunanka tantacorkancu. Israel curajcunata manchachicuskancuraycu sumajta puncusta wiskꞌaycucorkancu. Jesusri yaycumorka paycunaj chaupincupitaj sayaycorka. Napaycorkataj:

—Kancunapaj cꞌacha causay cachun, —nispa.

20 Chayta niskanmanta maquisninta wajtantawan paycunaman ricuchicorka. Chayraycu yachacojcunan Señornincuta ricuspa mayta cusicorkancu. 21 Ujtawantaj paycunaman nerka:

—Kancunapaj cꞌacha causay cachun. Dios Tatay nokata cachamuwarka, ajinallatataj nokapis kancunata cachayquichej, —nispa.

22 Chayta niytawan paycunaman phucuycorka nerkataj:

—Santo Espirituta koshayquichej, japꞌicuychej. 23 Ajinaka pimantapis juchasninta khechunquichej chayka, juchasnenka khechuskaña. Pitapis juchasninpi sakenquichej chayka, juchasnenka wiñaypaj apan, —nispa.

24 Mellizo niska Tomasrí chunca iscayniyoj yachacojcunanmanta uj carka. Payka Jesús jamorka, chay chꞌisi mana chaypichu carka paycunawan. 25 Chayraycu chay waj yachacojcunaka payman nisharkancu:

—Señorninchejta ricorkaycu, —nispa.

Payrí nerka:

—Sichus maquisninpi clavo juscꞌusta mana ricuymanchu, nitaj dedoyta chay clavo juscꞌusman churaycuymanchu, maquiytapis mana wajtanman churaycuymanchu chayka, ni jaycꞌaj creesajchu pay causashaskantaka, —nispa.

26 Khepan Domingo ujtawan yachacojcuna chayllapitaj tantacorkancu. Tomaspis paycunawan casharka. Puncustaj sumaj wiskꞌaskas carkancu. Jesusri yaycumorka, paycunaj chaupincupitaj sayaycorka. Napaycorkataj:

—Kancunapaj cꞌacha causay cachun, —nispa.

27 Tomastataj nerka:

—Dedoyquita apamuy khawaytaj maquisniyta. Maquiyquita apamuy wajtayman churaycuy. Amañataj mana japꞌicojka caychu. Manachayrí nokapi japꞌicuy, —nispa.

28 Tomastaj cutichispa nerka:

—¡Señorníy, Diosníy! —nispa.

29 Jesustaj payman nerka:

—Ricuskayquiraycu nokapi japꞌicunqui. Waquinrí mana cayjinata riconkancuchu chaywanpis nokapi japꞌicuwankancu. Paycunaka may cusiskas cankancu, —nispa.

30 Jesuska yachacojcunanpa ñaupakencupi ashqha waj ricuchinastaraj ruwarka. Chaycunaka mana cay libropi kelkaskachu cancu. 31 Manachayrí cay waquin ricuchinaslla cay libropi kelkaskas cancu. Ajinapi chayta leespa yachanquichej Jesuska jamunan carka chay Cristo, Diospa Wawan, caskanta. Chayta creespa paypi japꞌicuspataj wiñay causayniyoj canayquichejpaj cay libroka kelkaska carka.