—¡Viva, israelcunaj camachejnin! —nispa.

Payta lakꞌasharkancutaj.

4 Watejmanta Pilatoka jawaman llojsimorka paycunamantaj nerka:

—¡Khawaychej, jawaman payta pusamuyquichej ni ima juchata paypi tariskayta yachanayquichejpaj! —nispa.

5 Jesusri llojsimorka umanpi qhishca pilluwan churaska chay culli-puca pꞌachawan pꞌachalliskataj. Pilatoka paycunaman nerka:

—¡Cay chay runaka! —nispa.

6 Yupaychana-wasimanta curajcunarí yanapajcunapiwan Jesusta ricuspa mayta khaparerkancu:

—¡Chacataycuy, chacataycuy! —nispa.

Pilatori nerka:

—Kancuna japꞌiychejpis, chacataychejpis, imanaychejpis. Nokaka mana paypi juchata tarinichu, —nispa.

7 Israel curajcunaka cuticherkancu:

—Nokaycojta leyniycu capuwaycu. Chaymanjinataj chay runaka wañunan tiyan Diospa Wawan ruwacapuskanraycu, —nispa.

8 Chay niskancuta uyariskanmanta Pilatoka astawan manchachicaporka. 9 Ujtawan wasiman yaycuspataj Jesusta taporka:

—¿Maymantataj canquirí?

Jesusrí ni imata cuticherkachu.

10 Chayraycu Pilatoka taporka:

—¿Manachu nokaman parlawanqui? ¿Manachu yachanqui atiyniyoj caskayta cacharisunaypaj chayrí chacatasunaypajpis?

11 Jesustaj cuticherka:

—Manachus Dios atiyta kosunquiman chayka, ni imata atiwajchu nokawan ruwayta. Chayraycu nokata kanman jaywawajka aswan juchayoj cashan, —nispa.

12 Chayta niskanraycutaj Pilatoka mascꞌasharka imaynapipis payta cacharipuyta. Israel curajcunarí khaparishallarkancupuni:

—Sichus cay runata cacharipunqui chayka, mana Roma camachej Cesarpa amigonchu canqui. Pillapis pay quiquin camachejpaj ruwacojka Cesarpa contranpi churacun, —nispa.

13 Chayta uyarispa Pilatoka jawaman pusacherka Jesusta. Chaypiri autoridad tiyaycunanpaj uj jatun tiyana churaska carka. Chay lugartaj, Gabata sutiyoj, rumiwan cꞌachitu ruwaska plazajina carka. Pilatotaj chay tiyanapi tiyaycucorka. 14 Chay pꞌunchaytaj carka pascua waquichicuna, pakarin. Pilatori israel curajcunaman nerka:

—¡Cayka camachejniyquichejka! —nispa.

15 Chayraycu paycunaka khaparerkancu:

—¡Wijchꞌuy, wijchꞌuy! ¡Chacataska cachun! —nispa.

Pilatotaj paycunaman nerka:

—¿Imayna? ¿Camachejniyquichejtachu chacatasaj?

Yupaychana-wasimanta curajcunataj cuticherkancu:

—¡Cesarlla camachejniycoka! ¡Mana wajka canchu! —nispa.

16 Chayraycu Pilatoka paycunaman Jesusta jaywarka chacataska cananpaj. Paycunataj Jesuswan munaynincumanjina ruwarkancu.

17 Jesusri cruzninta apaspa llojserka Tꞌojlu sutichaska lugarman. Hebreo parlaypi nej cancu, Gólgota. 18 Chaypitaj payta chacatarkancu waj iscay runastawan ladosninpi. Jesustaj chaupi caj cruzpi carka. 19 Pilatoka uj kelkaskata ruwachispa cruznin patapi churacherka. Kelkaskaka nerka: “Cayka Nazaret llajtayoj Jesús, israelcunaj camachejnin”, nispa. 20 Jesús chacataska chay lugarka llajta kayllapi carka. Ajinapi israelcunamanta ashqhas chay kelkaskata leerkancu. Chaytaj hebreo, latín, griego parlaycunapi kelkaska carka. 21 Chayraycu yupaychana-wasimanta curajcunaka Pilatoman nerkancu:

—Ama kelkaychu, “Israelcunaj camachejnintaka”. Manachayrí, “Chay runa nerka, ‘Noka cani israelcunaj camachejnin’ ”. Ajinata kelkaycuy, —nispa.

22 Pilatotaj cuticherka:

—Kelkaskayka, kelkaskaña, —nispa.

23 Soldadoska Jesusta chacataskancumanta khepata pꞌachasninta japꞌispa tawaman parterkancu sapa ujnincupaj. Ujnin pꞌachantaj patamantapacha uj awaskalla carka, mana sirayniyoj. 24 Chayraycu soldadoska ninacusharkancu:

—Ama lliqꞌinachu caytaka, manachayka suertepi yachacuchun pipajchus cananta, —nispa.

Chay ruwaskancuwan Diospa palabranpi cay kelkaska juntꞌacorka: “Suertesta chokaspa pꞌachasniyta partinacorkancu”. Ajinatataj chay soldadoska ruwarkancu.

25 Jesuspa cruzninnejpi sayasharkancu maman, Cleofaspa warmin María (payka mamanpa hermanan), Magdala llajtayoj Mariapiwan. 26 Jesuska mamanta munaska yachacojnintawan cusca sayashajta ricuspa, mamanman nerka:

—Mamáy, caymin wawayqueka, —nispa.

27 Chay yachacojninmantaj nerka:

—Caymin mamayqueka, —nispa.

Chaymantapachataj chay yachacojka Jesuspa mamanta wasinman wajyacaporka.

28 Chaymantataj Jesús tucuy imas paymanta tucuskaña caskanta yachaspa Diospa palabranmanjina nerka:

—Chꞌaquiwan, —nispa.

29 Uj yuru juntꞌa cꞌarcu ujyana chaypi carka. Uj esponjata chay ujyanaman chhapuspa hisopo cꞌaspiman churarkancu. Chaywantaj Jesuspa simincama taripacherkancu. 30 Chay ujyanata chꞌonkaricorka. Chaymantataj nerka:

—Ruwanayta tucuniña, —nispa.

Umanta cꞌumuycuspataj causayninta Diosman jaywacorka.

31 Chayka samacuna pꞌunchaypaj waquichicunapi carka. Israel curajcunaka munarkancu ayas chacatanasmanta uraycuchiskas canancuta manaraj samacuna pꞌunchayta. Chay samacuna pꞌunchay may jatun caskanraycu ajinata munarkancu. Ajinapi Pilatoman nerkancu, cruzpi cajcunaj chaquisnincuta soldados pꞌaquiranancuta aswan uskhayta wañunancupaj. 32 Chayraycu soldados Jesuswan chacataska cajcunamanta ujman chimpaspa chaquisninta pꞌaquerkancu. Ujnintapis quiquillantataj ruwarkancu. 33 Jesusman chimpamusparí paytaka wañuskataña tariparkancu. Chayraycu paypa chaquisnintaka mana pꞌaquerkancuchu.

34 Astawanrí chay soldadosmanta ujnenka espadanwan Jesuspa wajtanta tꞌujsiycorka. Chay quiquinpacha yawarwan yacuwan uqhunmanta llojsimorka.

35 Noka chayta ricuspa willarkayquichejña. Willaskaytaj chekamin. Niskay cheka caskantataj Dios yachan. Chaytataj willarkayquichej Jesuspipuni japꞌicunayquichejpaj. 36 Chay imasnejtamin Diospa palabran juntꞌacorka: “Ni uj tullunpis pꞌaquiskachu canka”. 37 Wajnejpitaj palabranka cayta nin: “Tꞌujsiskancu runata paycuna khawankancu”.

38 Chay imasmanta khepata Arimatea llajtayoj José Pilatoman rerka ayata mañaj. Chay Joseka Jesuspa khaticojnin carka. Payka pacayllamanta khaticorka israel curajcunata manchachicuskanraycu. Pilatomanta mañajtintaj Pilatoka, “Apacapullay”, nerka. Chayraycu payka jamuspa Jesusta apacaporka. 39 Nicodemopis jamullarkataj. Ñaupajpi Jesusman tuta jamoj runa, payka. Apamorka sumaj kꞌapayniyoj jampita mirrawan aloeswan chajruskata. Chay apamuskanka quintaljina carka. 40 Paycunaka Jesusta okharispataj maytꞌunaswan chay sumaj kꞌapayniyoj jampitawanpis churaycuspa maytꞌuycorkancu. Chayta ruwarkancu israelcunaj pꞌampana costumbrencumanjina. 41 Chacataska carka chaynejpi uj huerta carka. Chay huertapitaj uj mosoj pꞌampana ruwaska carka. Chay pꞌampanapi ni uj ayapis churaskarajchu carka. 42 Israelcunaj waquichicuna pꞌunchaynincu caskanraycu, kayllitapi chay pꞌampana caskanraycupis, Jesusta chayman churarkancu.