—Yachachiskasniyquipis ruwaskayquita khawanancupaj rillayña caymanta Judea jallpꞌaman. 4 Ni pipis pacayllata ruwanchu ricuchicuyta munaspaka. Chayraycu caycunata ruwashaspaka tucuy runasman ricuchicuy, —nispa.

5 Waukesninpis pay Diospa cachamuskan caskanta mana creerkancuchu. 6 Jesustaj paycunaman nerka:

—Rinay pꞌunchayka manaraj chayamushanchu. Kancunapajrí pꞌunchayka waquichiskallapuni cashan. 7 Cay pacha runaska mana kancunata chejnisunquichejmanchu. Nokatarí chejniwancu ruwaskasnincu mana allin caskanta reparachiskayraycu. 8 Kancunalla riychej cay jatun pꞌunchaycunapajka. Nokaj ricuchicunay pꞌunchayka manaraj chayamushanchu. Chayraycu mana risajchu cay jatun pꞌunchaypi ricuchicojka, —nispa.

9 Chayta niytawan payka Galilea jallpꞌallapi cacorka.

10 Waukesnin Jerusalenman jatun pꞌunchaypaj riskancutawancama chaymanta paypis rillarkataj. Mana ricuchicuspa pacayllata rerka. 11 Israel curajcunataj chay jatun pꞌunchaypi payta mascꞌasharkancu. Nisharkancutaj:

—¿Maypitaj chay runarí? —nispa.

12 Jatun pꞌunchaypaj chay ashqha jamojcunataj Jesusmanta mayta chhichinacusharkancu. Ujcuna nisharkancu: “Payka cꞌacha runa”, nispa. Waquinrí nisharkancu: “Mana cꞌachachu. Runasta pantachejmin payka”, nispa.

13 Israel curajcunata manchachicuskancuraycu ni pi Jesusmanta sutꞌita parlajchu runaspa ñaupakencupeka.

14 Chay jatun pꞌunchaycunamanta tawa pꞌunchayña carka. Jesuska yupaychana-wasiman rerka chaypitaj yachachiyta kallarerka. 15 Israel curajcunataj payta uyarispa tꞌucorkancu nerkancutaj:

—Cay runaka Diospa palabranmanta ni jaycꞌaj nokaycuwan yachachiskachu carka. ¿Imaynapitaj cayjinata yachanrí?

16 Chayraycu Jesuska chay ashqha runaspa ñaupakencupi nerka:

—Cay yachachinayka mana nokajtachu, manachayka cachamuwajniypatamin. 17 Pillapis Diospa munayninta ruwayta ajllajka cay yachachinamanta yachanka parlaskayka Diosmantachus chayrí nokallamantachus caskanta. 18 Payllamanta parlajka payllata jatunchacuyta munan. Cachamojninpa jatunchayninta munajrí cheka yachachejmin. Nitaj paypi pantayka canchu.

19 ‘Camachiskasta Moisés kosuskayquichejta yachanquichej. Astawanpis kancunamanta ni pi chay camachiskasta casunchu. Nokatapis wañuchiwaytaraj munashanquichej, —nerka Jesús.

20 Chay ashqha runas jatun pꞌunchaypaj jamojcuna nerkancu:

—¡Locochu cawaj! ¿Pitaj wañuchisuyta munanrí?

21 Jesusri paycunaman nerka:

—Samacuna pꞌunchaypi uj runallata thañicherkani. Chaymanta tucuy manchariskas cashanquichej. 22 Diosman tꞌakaska caskanta ricuchinapaj khari wawata cuerponpi señalta ruwanayquichejta Moisés camachisorkachej. Chay circuncidayka mana Moisesllamantachu. Manachayka ñaupa tatasniyquichejmantapacha cashan. Samacuna pꞌunchay cashajtinpis pusaj pꞌunchayniyoj wawapaj chay juchꞌuy ruwayta ruwanquichejpuni. 23 Chayta ruwanquichej Moisespa camachiskasninta casunayquichejpaj. Chanta ¿imaraycutaj nokapaj phiñacunquichej samacuna pꞌunchaypi uj runata tucuy cuerponta onkoyninmanta thañichiskayraycu? 24 Amaña jawa imallataka khawaychejchu. Manachayrí cheka yuyaywan sumajta reparaychej, —nerka Jesús israel curajcunaman.

25 Jerusalén llajtayojcunamanta waquinrí nisharkancu:

—¿Manachu wañuchinancupaj mascꞌasharkancu chay runa, cayka? 26 ¡Khaway, mana manchachicuspa tucuypa ñaupakencupi parlacushan! Nitaj payta imanancuchu. ¿Cunanri curaj camachejcunapis chekachá jamoj ajllaska Cristo caskanta rejsincuman? 27 Nokanchejpis yachanchej cay runaka maymantachus caskanta. Cristo jamojtenka ni pi yachankachu maymanta caskantapis, —nisharkancu.

28 Yupaychana-wasi patiopi yachachispa tucuy uyarinancupajjina Jesús cayta nerka:

—¡Arí! Kancuna nokata rejsiwaspa maymantachus jamuskaytapis yachaskayquichejta yuyanquichej. Astawanrí mana nokallamantachu jamuni, manachayka cachamuwajniy Diosmanta. Payka chekamin. Kancunarí mana payta rejsinquichejchu. 29 Nokarí payta rejsini paywan cusca caskayraycu. Paytaj nokata cachamuwarka, —nispa.

30 Chayraycu payta japꞌiycuyta munasharkancu. Nitaj pipis payta imanarkachu manaraj wañunan horachu caskanraycu. 31 Jatun pꞌunchaypaj jamojcunamantataj ashqhas Jesuspi japꞌicorkancu. Nisharkancutaj:

—¿Jamoj Cristoka cay runamanta aswan jatuchej ricuchinastachu ruwanman?

32 Ashqha runas Jesusmanta chhichiskancuta fariseos uyarerkancu. Chayraycu yupaychana-wasimanta curajcuna fariseospiwan yanapajnincuta cachamorkancu payta japꞌiycunancupaj. 33 Chayraycu Jesús paycunaman nerka:

—Pisi pꞌunchaycunatawanraj casaj kancunawan. Chaymanta ujtawan ripusaj cachamuwajniypaman. 34 Jamoj pꞌunchaycunapi mascꞌawanquichej manataj tariwanquichejchu. Noka cashani, chaymantaj kancuna mana atinquichejchu jamuyta, —nispa.

35 Israel curajcunataj paycunapura asicuspa ninacusharkancu:

—Cay runaka ¿maymantaj ripunman mana payta tarinanchejpaj? ¿Waj llajtayojcuna chaupipi tiyacoj israelcunamanchu rinman? Chayrí ¿chay waj llajtayojcunatachu yachachimunman? 36 ¿Imaynataj cay niskanrí? “Jamoj pꞌunchaycunapi mascꞌawanquichej manataj tariwanquichejchu”. ¿Chaywanpis? “Noka cashani, chaymantaj kancuna mana atinquichejchu jamuyta”. —nerkancu israel curajcuna.

37 Tucuy chay jatun pꞌunchaycunamanta khepa caj pꞌunchayka aswan sumaj carka. Chay pꞌunchaypitaj Jesuska tucuypa ñaupakencupi sayaricuspa nerka:

—Chꞌaquichicoj runajina wiñay causayta munajka nokaman jamuchun wiñay causayta japꞌinanpaj. 38 Dios palabranpipis nin: [“Nokapi japꞌicojka cꞌacha yanapayniywan sajsaskamin. Paymantaka chay cꞌacha yanapaynintaj jatun mayusjina llojsenka paynejta waj runasmanpis wiñay causayta japꞌinancupaj”,]^b —nerka Jesús.

39 Chaytarí nerka Santo Espiritumanta. Dios paypi japꞌicojcunaman Espirituta cachamunan carka. Yachacojcunaman Santo Espíritoj jatun atiynenka manaraj koskachu carka, Jesús atiyninwan manaraj jatunchaska caskanraycu.

40 Ashqha runas Jesuspa niskanta uyarejcunamanta waquin nisharkancu:

—Chekatapuni cayka Diosmanta jamoj willaj, —nispa.

41 Waquintaj nisharkancu:

—Diospa ajllaskan Cristo payka, —nispa.

Ujcunarí nisharkancu:

—Cristoka mana Galileamantaka jamunmanchu. Chayraycu mana Cristochu payka. 42 Dios palabranpipis cayta nin: “Davidpa mirayninmanta jamunan tiyan”. Davidpa llajtan Belenpitaj nacecunan tiyan Cristoka, —nisharkancu.

43 Chay jawataj churanacuy jatarerka Jesusmanta chay ashqha runas chaupipi. 44 Waquin paycunamanta Jesusta japꞌiycuyta munasharkancu. Astawanpis ni pi payta imanarkachu.

45 Chay cachaska yanapajcunari yupaychana-wasimanta curajcunaman fariseocunamanpis cutimuspa mana Jesusta pusamuspalla cutimorkancu. Chayraycu chay curajcuna paycunaman nerkancu:

—¿Imaraycutaj payta mana pusamunquichejchu?

46 Yanapajcunataj paycunaman cuticherkancu:

—Ni pipis ni jaycꞌajpis parlarkachu chay runajinaka, —nispa.

47 Fariseocunataj phiñacuywan paycunaman nerkancu:

—¿Kancunapis paywan engañachicunquichejchu? 48 Ni pi curajcunamanta nitaj fariseocunamantapis paypi japꞌicunchu. 49 ¡Chay ashqha campo runasrí camachiskasta mana yachaspa Diosmanta juchachaskas cachuncu! —nerkancu.

50 Nicodemopis paycunamanta carka. Payka ñaupajpi Jesusman jamoj carka. Payri paycunata reparachinanpaj nerka:

51 —¿Camachiskasninchejmanjina uj runata juchachayta aticunmanchu manaraj payta uyarishaspa nitaj ruwaskanta sumajta yachashaspapis?

52 Paycunataj phiñacuywan cuticherkancu:

—¿Kanka Galilea jallpꞌamantachu canquirí? Riy, sumajta librospi mascꞌamuy. Galileamanta Diosmanta willajnin mana canchu, —nispa.

53 Sapa ujtaj wasinman riporka.