—¿Imaynatataj tꞌantata rantisunman paycuna miqhunancupaj?

6 Felipej yuyaskanta yachanallanpaj chayta nerka. Payka yacharka runasman tꞌantata konanta. 7 Feliperi cuticherka:

—Uj wata llancꞌaska kolkewan tꞌantata rantisunman chaypis, niraj sapa uj pisillatapis japꞌincumanchu, —nispa.

8 Yachacojninmanta Simón Pedroj wauken, Andrés, Jesusman nerka:

9 —Uj wawa caypi cashan. Paypata capushan phishka cebada tꞌantas iscay challwitaswan. Cayllaka ni imapischu chay ashqha runaspajka, —nispa.

10 Jesusri yachacojcunaman nerka:

—Chay ashqha runasta tiyaycuchiychej, —nispa.

Chaynejpi ashqha pasto carka. Runastaj tiyaycorkancu. Kharislla yupaska carkancu phishka warankajina. 11 Jesustaj tꞌantasta okharispa Diosman graciasta korka. Chay tiyacushaj runasmantaj jaywaramorka. Ajinallatataj challwitaswanpis ruwarka tucuy munaskancuta kospa. 12 Runas sajsacojtincutaj yachacojcunanman Jesús nerka:

—Tucuy puchojta okhariychej ama usuchiska cananpaj, —nispa.

13 Ajinatataj miqhuskancumanta puchojta okharerkancu chunca iscayniyoj canasta juntꞌata. Chayka puchorka chay phishka cebada tꞌantasmanta. 14 Chay jatun ricuchinata ricuskancumantataj runas nisharkancu:

—Ciertopuni cay runaka cay pachaman Diosmanta jamunan carka chay willajmin, —nispa.

15 Chay runas camachejnincupaj payta japꞌiyta munarkancu. Chayraycu Jesuska paycunaj yuyaskancuta allinta yachaspa chay ashqha runata cacharpayaporka. Chaymanta payka sapallan orkoman riporka.

16 Chꞌisiyajtinña yachacojcunan kochaman uraycamorkancu. 17 Barcoman yaycuspataj kochanejta Capernaum llajtaman riyta kallarerkancu. Tutayaskaña carka Jesustaj manaraj paycunaman cutimorkachu. 18 Yacutaj sinchꞌi wayramanta mayta okharicusharka. 19 Uj leguatajinaña barcowan riskancupi Jesusta ricorkancu yacu patata purishajta. Pay barcoman kayllaycamushajtintaj mancharicorkancu.

20 Payrí paycunaman nerka:

—Noka cani. Amaña manchachicuychejchu, —nispa.

21 Chayraycu paycuna mayta munarkancu Jesús barcoman yaycunanta. Barcotaj ujllata Capernaumman chayarka.

22 Astawanrí chay chꞌin pampapi waquenka chay ashqha runasmanta khepacorkancu. Chꞌisiyayta uj barcolla chaypi caskanta ricorkancu. Ricorkancutaj Jesusta barcoman mana yaycuskantapis, yachacojcunallan ripuskancutapis. Runaska tutapi khepacuspa, khepan pꞌunchay tutamanta quiquin lugarpi Jesusta mascꞌasharkancuraj. 23 Paycunaka Jesús runasman miqhuchiska, Diosman graciasta kospa, chaypi mascꞌasharkancu. Chaycamari Tiberias llajtamanta waj juchꞌuy barcos jamorkancu chaynejman. 24 Ajinallatataj Jesús manaña chaypichu caskanta ricuspa nitaj yachacojcunanpis, runaska chay juchꞌuy barcosman yaycorkancu. Capernaummantaj rerkancu Jesusta mascꞌaspa.

25 Taripaspataj payta nerkancu:

—Yachachejníy ¿maycꞌajtaj chayamorkanqui?

26 Jesustaj paycunaman nerka:

—Chekatapuni niyquichej: Mana chay Diospa atiyninmanta ricuchinasta khawaskayquichejraycuchu mascꞌashawanquichej. Manachayrí chay tꞌantata miqhuspa sajsacuskayquichejrayculla mascꞌashawanquichej. 27 Ama tucucoj miqhunallapajka llancꞌaychejchu. Astawanrí wiñay causayta koj miqhunata mascꞌaychej. Chay miqhunata noka, Diospa cachaska Runan, koskayquichej. Noka Dios Tataypa ajllaskan caskayta chekata pay ricucherka, —nispa.

28 Chaymanta payta nerkancu:

—¿Imatataj ruwanaycu tiyan Diospa munayninmanjina ruwanaycupajrí?

29 Jesús paycunaman cuticherka:

—Diospa munayninta ruwanayquichejpajka paypa cachamuskanpi japꞌicunayquichej tiyan, —nispa.

30 Paytataj nerkancu:

—Astawan jatun ricuchinata ruwanayqui tiyan, chayta ricuspa kanpi japꞌicunaycupaj. Atiyniyquita ricuchinawaycupaj ¿imatataj ruwashanquirí? 31 Ñaupa tatasninchej chꞌin pampapi tꞌantatajina, maná sutiyojta, miqhorkancu. Ajinatataj Diospa palabranpipis nin: Payka janaj pachamanta tꞌantata paycunaman korka”, —nispa.

32 Chay niskancumanta Jesuska nerka:

—Chekatapuni niyquichej: Mana Moiseschu kancunaman chay janaj pachamanta tꞌantata kosorkachej, manachayrí Tatay. Cunantaj payka kosunquichej chekata uraycamojta, janaj pacha miqhunata. 33 Chay miqhunaka janaj pachamanta uraycamojmin runasmantaj causayta kon, —nispa.

34 Chayraycu paycuna nerkancu:

—Señorníy, chay miqhunata kollawaycupuni, —nispa.

35 Jesusrí paycunaman nerka:

—Noka cani chay causayta koj miqhunaka. Nokaman jamojka ni jaycꞌaj yarkhachiconkachu. Nokapi japꞌicojka nitaj jaycꞌajpis chꞌaquichiconkachu. 36 Nerkayquichejña: “Ricushawaspa kancunarí mana nokapi japꞌicuwanquichejchu.” 37 Tataypa tucuy kowaskan runaka nokaman jamun. Nokaman jamojtarí ni jaycꞌaj khesachanichu. 38 Janaj pachamantataj uraycamorkani mana munayniyta ruwanaypajchu, manachayrí cachamuwajniypa munayninta ruwanaypaj. 39 Cachamuwajniypa munaynenka, tucuy kowaskan runasmanta ni uj chincapunan; manachayrí khepa pꞌunchaypi paycunata causarichimunay. 40 Tatay munan tucuy runa Wawan caskayta reparaspa nokapi japꞌicunanta. Nokapi japꞌicunanta munan wiñay causayniyoj cananpaj. Chaywanpis munan nokapi japꞌicojta khepa pꞌunchaypi causarichimunayta, —nerka Jesús.

41 Israel runas Jesusmanta thutusharkancu, “Noka Diosmanta uraycamoj miqhuna cani” niskanmanta. 42 Nisharkancutaj:

—¿Cayka manachu Joséj wawan Jesús? Nokanchej rejsinchej tatanta mamantapis. ¿Imaynatataj cunan nin, Diosmanta uraycamuskanta?

43 Jesustaj paycunaman nerka:

—Amaña kancunapura thutuychejchu. 44 Ni pi nokaman jamuyta atinchu sichus cachamuwajniy Tatay payta mana pusamunchu chayka. Nokaman jamojtari khepa pꞌunchaypi causarichimusaj. 45 Diospa unay willajcunanpa kelkaskasnincupipis nin: “Tucuy runasninta Dios yachachenka”. Chayraycu tucuy runa Dios Tatata sonkonwan uyarispa yachachiska caspataj nokaman jamun. 46 Mana ninichu, runa Dios Tatata ricuskantaka. Noka paymanta jamojlla Tataytaka ricorkani.

47 ‘Chekatapuni niyquichej: Nokapi japꞌicojka wiñay causayniyojmin. 48 Noka cani chay causayta koj miqhuna. 49 Unay tatasniyquichej chay maná tꞌantata chꞌin pampapi miqhorkancu. Chaywanpis wañuporkancu. 50 Nokarí Diosmanta uraycamoj miqhuna cani. [Manamin maná tꞌantajinachu cani.]^a Astawanpis nokamanta miqhojka mana wañuponkachu. 51 Noka cani chay wiñay causaj miqhuna Diosmanta jamoj. Ajinallataj wiñay causayniyoj canayquichejpaj nokamanta miqhunayquichej tiyan. Cay pacha runas wiñay causayniyoj canancupaj cuerpoyta koni, —nerka Jesús.

52 Israel curajcuna paycunapura phiñacuywan churanacusharkancu:

—¿Imaynatataj cay runaka cuerponta koyta atinman miqhunanchejpajrí?

53 Jesustaj paycunaman nerka:

—Chekatapuni niyquichej: Sichus nokamanta mana miqhunquichejchu nitaj yawarniymanta ujyanquichejchu chayka, mana wiñay causayniyojchu canquichej. 54 Nokamanta miqhojka yawarniymantapis ujyajka wiñay causayniyojmin. Nokataj payta khepa pꞌunchaypi causarichimusaj. 55 Nokamanta miqhojka yawarniymanta ujyajpis cheka miqhunayoj cheka ujyanayojtaj canka. 56 Chay cheka miqhunayoj ujyanayoj runaka nokawan ujchaskamin. Causaynintaj nokamanta jamun sonkonpi tiyacuskayraycu. 57 Causayniyoj Dios Tata cachamuwarka nokataj paynejta causani. Ajinallatataj nokamanta miqhojka nokaraycu causan. 58 Noka cani chay Diosmanta jamoj miqhuna. Ñaupa tatasniyquichej manáta miqhuspapis wañuporkancu. Mana chayjina miqhunachu cani. Astawanpis nokamanta miqhojka wiñaypaj causanka, —nerka Jesús.

59 Capernaumpi tantacuna-wasipi yachachishaspa chayta nerka.

60 Ashqhas khaticojcunanmanta Jesuspa niskanta uyarispa nerkancu:

—Chay niskanka manchay sinchꞌi japꞌinapajka. ¿Pitaj chayta khatiyta atinman?

61 Khaticojcunaj thutuskancuta Jesús sonkonpi reparaspa paycunaman nerka:

—¿Cay niskaychu kancunata sinchꞌita urmachisunquichej? 62 Noka, Diospa cachaska Runanta, ujtawan janaj pachaman wicharishajta ricuspa ¿imatataj yuyawajchej? 63 Diospa Espiritullan causayta kon, manamin runaka atiyniyojchu chayta ruwananpajka. Cay palabras noka kancunaman niskayrí Santo Espiritumantamin. Chayraycu niskasniy causayta kon. 64 Astawanrí waquin kancunamanta nokapi mana japꞌicunquichejchu, —nispa.

Paypi mana japꞌicojcunamanta payta jaywaycojmantapis Jesuska yacharkapuni. Chayraycu chayta nerka. 65 Chaywanpis nillarkataj:

—Chayraycu nerkayquichej, ni pi nokaman jamuwayta atinchu sichus Dios Tata atiyta mana konchu chayka, —nispa.

66 Ajinaka chay khatejcunamanta ashqhas khepaman cutiporkancu manañataj paywan purerkancuchu. 67 Jesustaj chay chunca iscayniyoj yachacojcunanman nerka:

—¿Kancunapis ripullaytatajchu munanquichej?

68 Simón Pedrori payman cuticherka:

—Señorníy ¿pimantaj riycuman? Kanpa niskayquimin wiñay causayta kojka. 69 Nokaycupis kanpi japꞌicuycuña sumajtataj yachaycu kanka Diospa cheka^b cachamuskan caskayquita, —nispa.

70 Jesús payman nerka:

—Noka kancunata, chunca iscayniyojta ajllacorkayquichej. Kancunamantari ujka supay Satanaspa casojninmin, —nispa.

71 Judas Iscariote Simonpa wawanmanta chayta nerka. Payka Jesusta jaywaycoj risharka. Judasri chunca iscayniyoj yachacojcunanmanta ujnin carka.