—Juchaman urmachejka canpunimin. ¡Phutiy, ari, juchaman urmachej runapajka! 2 Cay juchꞌuycitus nokapi japꞌicojcunamanta ujninta juchaman urmachejpajka phutiy, ari. Aswan allin canman paypaj wañupunan. Allin canman runas jatun kochaman payta wijchꞌuycunancu jatun molino rumita cuncanman warqhuycuspa. 3 Sumajta khawacuychej kancuna quiquiyquichejta. Sichus hermanoyqui juchallicunman chayka, munacuywan cꞌamiy. Sitajchus juchanta saken chayka, juchanta konkapuy. 4 Uj pꞌunchaypi kanchis cutitapis contrayquipi juchallicunman. Kanchis cutitataj phuticuspa cutimusunquiman. Nisunquimantaj: “Mana ujtawan ajinata ruwasajchu”, nispa chayka, juchanta kꞌalata konkapuy.

5 Cachasnintaj Señorta nerkancu:

—Yanapawaycu Diospi astawan japꞌicunaycupaj, —nispa.

6 Señortaj cuticherka:

—Uj mostaza mujitujina pisillatapis Diospi japꞌicuwajchej chayka, uj jatun sachꞌata niyta atiwajchej: “Saphintin tꞌiracuspa jatun kochaman saphichaycucuy”, nispa. Chekamanta casusunquichejmantaj.

7 ‘Kancunamanta ujniyquichej uj camachiyoj caspa, cayta ruwan. Pꞌunchaynintin camachin paypaj llancꞌapun chayrí uywata michipun. Patronka camachinta llancꞌaskanmanta cutimojtin mana ninchu: “Uskhayta tiyaricuspa miqhuy”, nispaka. 8 Manachayka nin: “Waquichiy miqhunayta. Miqhunayta ujyanaytawan jaywallawaypuni sajsanaycama. Chaymanta khepata kan miqhullanqui”, nispa. 9 Nitaj camachinta, “Agradeceyqui”, ninchu patronnenka camachiskanta ruwajtinpis. Chay imastaka camacheka ruwananpuni carka. 10 Ajinallataj kancunapis Diospa tucuy camachiskasninta ruwaspa niychej: “Mana allin camachislla caycu. Ruwanaycu carka, chayllata ruwarkaycu”, —nispa.

11 Jesuska Jerusalenman rishaspa Samaria jallpꞌawan Galilea jallpꞌawan tincuynejta purerka. 12 Uj ranchoman kayllashajtintaj chunca lepra onkoyniyoj runas paynejman jamorkancu. 13 Carullapitaj sayarkancu. Khaparimorkancu:

—¡Yachachej Jesús, qhuyawaycu! ¡Thañichiwaycu! —nispa.

14 Jesustaj paycunata ricuspa nerka:

—Riychej Jerusalenman. Yupaychana-wasipi ruwanayojcunawan khawachicamuychej, —nispa.

Yupaychana-wasiman ñanta rishajtincu onkoynincumanta thañiskasña carkancu. 15 Paycunamanta ujnincurí thañiskaña caskanta ricucuspa cutirimorka Jesusman. Khaparispataj Diosta yupaycharka. 16 Jesuspa ñaupakenpi konkoricuspataj mayta agradececorka. Payka samaritano carka. 17 Jesusrí nerka:

—Chuncantincu thañichiskaska carkancu. Chanta ¿maypitaj chay iskꞌonrí? 18 ¿Imaraycutaj Diosta yupaychaj mana cutirimorkancuchu? Cay sapan waj llajtayoj runalla cutirimun, —nispa.

19 Runatari nerka:

—Jataricuy, ripuy. Diospi japꞌicuskayquiraycu thañiska canqui, —nispa.

20 Waquin fariseos Jesusta taporkancu:

—¿Maycꞌajtaj camachenka Dios?

Jesustaj paycunaman cuticherka:

—Dios camachin, chayka mana ricunapajjinachu. 21 Manallataj runas nenkancuchu: “Caypi cashan”, chayrí, “Jakaypi cashan”, nispa. Imaraycuchus, Dios chaupiyquichejpiña cashan camachinanpaj, —nispa.

22 Yachacojcunanmanri nerka:

—Jamoj pꞌunchaycunapi noka, Diospa cachaska Runan, cutimuspa kancunawan canayta mayta munanquichej. Uj pꞌunchayllatapis ricuwayta munanquichej. Manaraj munaskayquichejka cankachu. 23 Nisonkachejtaj: “¡Khaway! Jesús jakaypi cashan”, chayrí, “Caypi cashan”, nispa. Ama ruwanasniyquichejta sakeychejchu. Amataj paycunata khatiychejchu. 24 Lliuj-lliojka cꞌancharichin cieloj uj ladonmanta ujnin ladoncama. Ajinallatataj noka, Diospa cachaska Runanka, lliuj-lliujjinamin cutimusaj. 25 Astawanpis ñaupajtaka anchataraj ñacꞌarinay tiyan. Cay pꞌunchay runaspaj khesachaskancupis canay tiyan.

26 ‘Noka, Diospa cachaska Runan, cutimojtiyka Noepa tiemponpijinamin canka. 27 Chay pꞌunchaypi runaska miqhusharkancu, ujyasharkancu casaracusharkancutaj. Ajinata causasharkancu Noé barcojina arcaman yaycupunancama. Uj jatun para jamorka. Yacutaj tucuy chay runasta kꞌalata tucucherka.

28 ‘Quiquillantaj carka Lot causashajtinpis. Miqhusharkancu, ujyasharkancu, rantisharkancu, vendesharkancu, tarpusharkancu, wasichasharkancutaj. 29 Lot Sodoma llajtamanta llojsiporka. Chay pꞌunchaypitaj Dioska ninata azufretawan parachimorka janaj pachamanta. Tucuy chaypi cajcunata kꞌalata tucucherka. 30 Quiquillantajmin canka noka, Diospa cachaska Runan, ricuchiska canay, chay pꞌunchaypeka.

31 ‘Chay pꞌunchaypi pillapis wasimanta jawapi^a cashanman capuynintaj uqhupi, chay capuyninta okharicoj ama yaycuchunchu. Chajrapi cajpis amallataj cutirichunchu. 32 Lotpa warminwan imayna caskanmanta yuyaricuychej. 33 Causayninta payllapaj wakaychacuyta munajka mana wiñay causayniyojchu canka. Cay pachapi causayninta mana wakaychacojrí wiñay causaypaj wakaychaconka.

34 ‘Niyquichejtaj: Noka cutimusaj, chay tutapi iscay runas uj puñunapi cashankancu. Paycunamanta ujnin nokawan cusca pusaska canka. Ujninrí sakeska canka. 35 Iscay warmis cusca maranllapi cutashankancu. Paycunamanta ujnin nokawan cusca pusaska canka. Ujninrí sakeska canka. 36 Iscay runas chajrapi cashankancu. Paycunamanta ujnin nokawan cusca pusaska canka. Ujninrí sakeska canka, —nerka Jesús.

37 Cayta uyarispataj Jesusta taporkancu:

—Señor ¿maypitaj ajina cankarí?

Paytaj paycunaman cuticherka:

—Maypicha aya cashan chayman alkamaris tantaconkancu, —nispa.