—Cay runaka juchasapasta wajyacun paycunawantaj miqhun, —nispa.

3 Chanta Jesús fariseosman yachachejcunamanpis cay quiquinchanawan parlarka. Nerkataj:

4 —Kancunamanta pachaj ovejasniyoj runa ujnin ovejanta chincachicuspa ¿imatataj ruwanman? Iskꞌon chunca iskꞌonniyoj ovejasninta chꞌinnej canchapi saken. Mascꞌaj rintaj chincaska ovejanta taricampunancama. 5 Ovejanta tarispa may cusiska lijraricampun. 6 Wasinman chayamuspataj amigosninta llajta-masisnintawan wajyan tantacamunancupaj. Paycunata nintaj: “Cusicuychej nokawan. Ovejay chincaska carka, chayta taricampuni”, nispa. 7 Niyquichej: Ajinallatataj cay pachapi uj juchasapa runa juchasninta sakespa Diosman cutirejtin, Dios anchata cusicun. Astawan cusicun paymantaka chay iskꞌon chunca iskꞌonniyoj chekan ruwajcunamanta niskaka. Paycuna ruwanasnincuta mana sakenancuchu tiyan, —nispa.

8 Jesús nillarkataj:

—Chunca dracma kolkesniyoj warmipis ujnin kolkenta chincachispa ¿imatataj ruwan? Cꞌanchayta japꞌichin. Wasin uqhuta pichan. Sumajta khawaspa mascꞌan chincaska kolkenta taricapunancama. 9 Tarispataj amigasninta llajta-masisnintawan wajyan tantacamunancupaj. Paycunata nin: “Cusicuychej nokawan. Kolkeyta chincacherkani, chayta taricampuni”, nispa. 10 Chekatapuni niyquichej. Ajinallatataj Diospa angelesnin mayta cusiconkancu uj juchasapa juchasninta sakespa Diosman cutiriskanraycu, —nispa.

11 Jesús nillarkataj:

—Uj runa iscay khari wawasniyoj carka. 12 Sullcꞌa cajka tatanta nerka: “Tatáy, sakenawaycumanta chayakeyta, cunan koripuway”, nispa. Chaymanta tatancu iscayninman chayakencuta koporka. 13 Pisi pꞌunchaycunamantari sullcꞌa wawanka tucuy chayakenta venderka. Kolkewantaj wasinmanta riporka caru llajtaman. Jakaypi kolkenta wayrachimorka munayninmanjina causaspa. 14 Tucuynin kolkenta usuchejtinña manchay yarkhay tucuy jakay jallpꞌapi carka. Paytaj yarkhayninwan ñacꞌariyta kallarerka. 15 Chanta jakaypi uj llajtayojman mañaricorka: “Llancꞌarichillaway”, nispataj cꞌascacorka. Llajtayojri jallpꞌanman qhuchisninta michimunanpaj payta cacharka. 16 Thakoj pokoyninta qhuchis miqhoj cancu. Chay pokoywantaj sullcꞌaka yarkhaymanta sajsacuyta munasharka. Ni pipis ni ima miqhuyta payman korejchu. 17 Chaymantarí chekan yuyayninman cutirispa sonkonpi nerka: “Tataypa wasinpi ashqha llancꞌajcuna cashancu. Tucuynincoj miqhunancu puchunpuni. Nokarí caypi yarkhaymanta wañunayashaniña. 18 Jataricuspa tatayman cutipusaj. Nisajtaj: ‘Tatáy, juchallicuni Diospa contranta kanpa contrayquitapis. 19 Chayraycu manaña wawayqui ninapajjinañachu cani. Ujnin llancꞌaj runayquitajinallapis japꞌicuway’ ”, nispa tanteyacorka. 20 Chanta jatarispa quiquin tatanman cutiporka.

‘Carullapiraj cashajtin, tatan paytaka ricorkaña. Ricuspataj tucuy sonkonwan qhuyarka. Uskhayta kayllaycuspa wawantaka abrazaycuspa may munacuywan muchꞌaycorka. 21 Wawanri nerka: “Tatáy, juchallicuni Diospa contranta kanpa contrayquitapis. Chayraycu manaña wawayqui ninapajjinañachu cani”, nispa. 22 Tatanrí camachisninta nerka: “Aswan sumaj pꞌachata uskhayta orkhomuspa payta pꞌachallichiychej. Sortejata maquinman churaychej. Chaquisninmantaj zapatosta churaychej. 23 Wira caj waca uñata apamuspa ñacꞌaychej. Miqhuspataj mayta cusiracusunchej. 24 Cay wawayka wañuskajina carka cunantaj causarimpunña. Chincaska carka taricapuniñataj”, nerka tatan. Chaymanta kallarerkancu cusiracuyta.

25 ‘Chaycamarí curaj caj wawanka chajrapi casharka. Cutimuspa chayamorka wasin kayllaman. Uyarerka sicurista tusojtawan. 26 Chanta ujnin camachita wajyaspa taporka: “¿Imaraycu tucuy cay chꞌajwarí?” 27 Cuticherka: “Waukeyqui cutimpun. Tatayquitaj wira caj waca uñata ñacꞌachin waukeyqui allillanta payman cutimpuskanraycu”, nispa. 28 Curajrí phiñacuspa mana munarkachu wasiman yaycuyta. Chaymanta tatan wajyamoj llojsimuspa payta nerka: “Wawáy, yaycumullay”, nispa. 29 Payrí tatanman cuticherka: “Khaway, cay chhica watastaña llancꞌashani camachiyquijina. Camachiwaskayquitapis ni jaycꞌaj sakespa ruwashanipuni. Kanrí ni jaycꞌaj uj cabritollatapis kowanquichu amigosniywan cusicunaypaj. 30 Cunan cay wawayqueka capuyniyquita sajra warmiswan kꞌalata tucuycuspaña jamun. Jamojtintaj cay wawayquipajka wira caj waca uñata ñacꞌachinqui”, nispa. 31 Tatantaj munacuywan nerka: “Wawáy, kan nokawan cuscapuni cashanqui. Tucuy nokajta cajka kanpatapuni. 32 Cunanrí cusiracunanchej tiyan. Cay waukeyqueka wañuskajinamin carka, causarimpunña. Payka chincaska carka taricapuniñataj”, nispa nerka tatan.