2 Chanta fariseos Jesusman kayllamorkancu. Parlaskanpi pantachiyta munaspataj taporkancu:

—¿Camachiwaskanchejmanjina uj khari warminta wijchꞌupuyta atillanchu?

3 Payrí paycunaman nerka:

—¿Imatataj Moisés camachisorkachej?

4 Cuticherkancutaj:

—Moiseska kharita sakellarka warminta wijchꞌupuyta divorcio papelta jaywaspa, —nispa.

5 Jesusrí paycunaman nerka:

—Moisés chayta camacherka kancuna Diospa quiquin camachiskanta mana casuyta munaskayquichejraycu, rumi sonkoyoj runas caspa. 6 Kallariypi Dios tucuy imata ruwarka. Chaymantapacha kharita warmitapis churarka. 7 Chayraycu khareka sakenan tiyan tatanta mamantapis warminwan ujchaska cananpaj. 8 Iscaynincutaj ujchaska cankancu. Ajinaka manaña iscaychu cancu, manachayrí ujllaña. 9 Chayraycu Diospa ujchaskanta runaka ama tꞌakachunchu, —nerka Jesús.

10 Wasipiña cashaspa yachacojcunan ujtawan chay jawa Jesusta taporkancu. 11 Paycunaman nerkataj:

—Pillapis warminmanta tꞌakanacuspa waj warmiwantaj casaracun chayka, warminpa contranpi khenchachacun. 12 Sitajchus warmi kosanmanta tꞌakanacuspa waj khariwantaj casaracun chayka, khenchachacun, —nispa.

13 Uj cuti wawitasnincuta Jesusman pusamusharkancu maquisninta churaspa paycunapaj Diosmanta mañaripunanpaj. Yachacojcunataj pusamojcunata cꞌamerkancu. 14 Chayta ricuspa Jesús phiñacorka, yachacojcunanta nerkataj:

—Sakeychej wawitasta nokaman jamunancuta. Amañataj paycunata jarcꞌaychejchu. Dios paycunajinata munacuyninwan camachenka. 15 Chekata niyquichej: Waquin runas wawitajina Diosta japꞌincu Camachejnincupaj. Pillapis wawitajina mana japꞌejrí janaj pachaman^a yaycuyta manapuni atinchu, —nerka Jesús.

16 Paytaj wawitasta markꞌaricuspa sapa ujman munacuywan maquisninta churarka, paycunapaj Diosmanta mañaripuspa.

17 Jesús wasimanta llojsispa ñanpi cashajtinña uj runa correspa paypa ñaupakenpi konkoricorka. Taporkataj:

—Cꞌacha. Yachachejníy ¿imatataj ruwanay tiyan wiñay causay chayaketa japꞌinaypaj?

18 Jesustaj payman nerka:

—Dioslla cꞌachaka. Chanta kanka ¿imaynapitaj noka cꞌacha caskayta niwanquirí? 19 Yachanqui Diospa camachiskasninta: Ama khenchachacuychu; ama runata wañuchiychu; ama suwaychu; ama llullacuspa runamanta willaychu; ama pacaymanta runamanta imantapis khechuychu; tatayquita mamayquitapis casuy, —nispa.

20 Runarí nerka:

—Yachachejníy, tucuy cay Diospa camachiskasninta wawamantapacha casorkani, —nispa.

21 Jesustaj payta khawaycuspa munacorka. Paytataj nerka:

—Uj imallaña jarcꞌasunqui. Ripuy, tucuy capuyniyquita vendemuy, kolketataj wajcha runasman jaywaramuy. Ajinapi khapaj capuyniyqui janaj pachapi canka. Chanta nokawan jamuspa yachacojniy cay, —nerka Jesús.

22 Chay niskanmantari runaj uyanka ujjinayarka. Mayta phuticuspataj riporka, may khapaj caskanraycu.

23 Muyuyninta khawaspa Jesuska yachacojcunanman nerka:

—¡Khapaj runaska janaj pachaman^b wiñay causayniyoj canancupajka ñacꞌayta yaycuyta atenkancu! —nispa.

24 Yachacojcunaka chay niskanmanta tꞌucorkancu. Jesusrí ujtawan paycunata nerka:

—Wawasníy, khapaj capuynincupi sonkoncuta churajcunaka ñacꞌayta janaj pachaman^c yayconkancu. 25 Jatun camello uywaraj astawan atinman yaycuyta agujaj ningrinman, khapaj runa janaj pachaman^d yaycunanmantaka, —nispa.

26 Mayta tꞌucuspa yachacojcunapura tapunacusharkancu:

—Ajina cajtenka ¿pitaj janaj pachaman^e yaycuyta atinmanrí?

27 Jesusri paycunata allinta khawaycuspa nerka:

—Cayka runacunapaj mana aticunchu. Diospajrí aticun, Dioska tucuy atiyniyoj caskanraycu, —nispa.

28 Chaymanta Pedro nerka:

—Khaway, nokaycu ari, tucuy imaycuta sakespa kanta khatishaycu, —nispa.

29 Jesustaj cuticherka:

—Chekata niyquichej: Uj runa atinman sakeyta wasinta chayrí waukesninta chayrí panasninta chayrí mamanta chayrí tatanta chayrí wawasninta chayrí chajrasninta. Sichus cayta saken nokaraycu sumaj willanasraycupis chayka, 30 cay pꞌunchaycunapi sakeskanmanta, pachaj cutis astawan cutichiska payman canka. Ajinaka wasisniyoj, waukesniyoj, panasniyoj, mamasniyoj, wawasniyoj, chajrasniyoj canka. Payri muchuchiskapis canka nokaraycu. Jakay jamoj pꞌunchaycunapirí wiñay causayniyojmin canka. 31 Ashqha runas cay pacha imasraycu sumajpaj khawaska cajcunaka jakay pꞌunchaypi pisipaj khawaskas cankancu. Ashqha runas cunan pꞌunchaycunapi pisipaj khawaska cajcunarí, jatunpaj khawaskas cankancu, —nerka Jesús.

32 Ashqha runas Jesuspis Jerusalenman ñanta risharkancu. Jesús ñaupajta rishajtin yachacojcunanka khepanta tꞌucushaj khatisharkancu, ni imata paymanta yuyayta atispa. Wajcuna khaticushallarkancutaj, paycunapis manchachicuspa risharkancu. Ujtawantaj Jesús chunca iscayniyoj yachacojcunanta wajnejman pusarka. Chay jamoj pꞌunchaycunapi imachus paywan ruwacoj risharka, chayta paycunaman willarka:

33 —Khawaychej, Jerusalenman rishanchej. Chaypimin noka, Diospa cachaska Runan, yupaychana-wasimanta curajcunaman israel yachachejcunamanpis jaywaska canay tiyan. Nokata wañunaypaj juchachawankancu, waj llajtayoj runasmantaj jaywaycuwankancu. 34 Paycunaka nokata asipayawankancu. Nokaman thokaycuwankancu, jasutꞌiwankancu, wañuchiwankancutaj. Quinsa pꞌunchayninmantataj causarimpusaj, —nerka Jesús.

35 Chanta Zebedeoj wawasnin Jacobowan Juanwan Jesusman kayllaycorkancu. Nerkancutaj:

—Yachachejníy, munaycu ruwapunawaycuta imatachus mañacuskaycuta, —nispa.

36 Jesustaj nerka:

—¿Imata ruwapusunayquichejtataj munanquichejrí?

37 Paycunaka cuticherkancu:

—Atiyniyquiwan camachinayquipaj tiyaycuspa, kanwan cusca tiyaycuchiwaycu, ujniycuta paña ladoyquiman ujniycutataj llokꞌe ladoyquiman, —nispa.

38 Jesusrí cuticherka:

—Kancunaka mana yachanquichejchu imatachus mañacushaskayquichejta. Manchayta ñacꞌarinay tiyan. Chayka uj copapijina juntꞌaña. ¿Chayta ujyayta atiwajchejchu nokajina? ¿Atiwajchejchu ñacꞌariyman yaycuyta wañuycama nokajina?

39 Paycunaka nerkancu:

—Arí, atiycu, —nispa.

Jesustaj paycunata nerka:

—Juntꞌa copata ujyanquichej nokajina. Wañuycama ñacꞌariymantaj yaycunquichej nokajina. 40 Astawanrí camachinaypaj tiyaycuspa, paña ladoyman chayrí llokꞌe ladoyman tiyaycuchinayka, mana nokamantachu. Manachayrí picunapajchá waquicherka, chaycunataka Dioslla tiyaycuchenka, —nispa.

41 Chayta uyarispa chay waj chunca yachacojcunanka Jacobopaj Juanpajwan phiñacorkancu. 42 Jesusri paycunata wajyaspa nerka:

—Yachanquichejjina llajtasta camachejcunaka runasta llaquichispa camachiskancuta. Callpayojcunapis atiynincumanjina tucuy imapi runaswan casuchicuncu. 43 Kancuna uqhupeka mana ajinachu canka. Astawanrí kancunamanta pillapis atiyniyoj cayta munajka tucuy sonkowan yanapasojniyquichej canan tiyan. 44 Kancunamanta pillapis curajpaj khawaska cayta munajka tucuyta casoj canan tiyan. 45 Ajinallatataj noka, Diospa cachaska Runanpis, mana runas yanapanawancupajchu jamorkani. Manachayrí noka runasta yanapanaypaj jamorkani. Astawanpis paycuna wañunancumanta noka wañusaj juchancumanta cacharichinaypaj, —nerka Jesús.

46 Jesús yachacojcunanwan Jericó llajtaman chayarkancu. Chaymanta ashqha runaswan llojsishajtincutaj, Timeoj wawan Bartimeo chay ñannejpi tiyacusharka. Payka ciego caskanraycu runasmanta mañacoj. 47 Nazaret llajtayoj Jesús chaynejta rishaskanta uyarispataj khapariyta kallarerka:

—¡Jesús, Davidpa miraynin,^f qhuyacuway nokata! —nispa.

48 Chay ashqha runastaj payta cꞌamisharkancu:

—¡Chꞌin cay! —nispa.

Payri aswan sinchꞌita khaparerka:

—¡Davidpa miraynin,^g qhuyacuway! —nispa.

49 Jesusri chayta uyarispa sayarka, nerkataj:

—Payta wajyaychej, —nispa.

Chanta ciego runata wajyaspa nerkancu:

—¡Sonkochacuy, jataricuy! Kanta wajyashasunqui, —nispa.

50 Payri ponchonta wijchꞌuricorka aswan uskhayta rinanpaj. Phinquirispataj Jesusman chimparka. 51 Jesustaj payta taporka:

—¿Imatataj ruwasunayta munashanqui?

Ciegotaj cuticherka:

—¡Señorníy, ricuyta munani! —nispa.

52 Jesusri payta nerka:

—Ripullayña. Diospi japꞌicuskayquiraycu thañiskaña canqui, —nispa.

Chay quiquinpacha ciegoka ricuyta aterka. Ñantataj Jesusta khaticorka.