—Chekata niyquichej: Waquin cunan caypi cajcunamanta mana wañonkancuchu Dios atiyninwan camachinanpaj jamuskanta ricunancucama, —nispa.

2 Sojta pꞌunchaymantataj Jesuska Pedrota, Jacobota, Juantawan sapallancuta pusarka uj alto orkoman. Paycunaj ñaupakencupitaj Jesuspa rijchꞌacuynenka wajjinaman tucorka. 3 Pꞌachasninpis sumaj yuraj lliphipej ritꞌijinaman tucorkancu. Chayjinata yurajyachiytaka cay pachapi ni pi tꞌajsajpis atinmanchu. 4 Eliaswan Moiseswan riqhurimuspataj Jesuswan parlanacusharkancu. 5 Pedrotaj payta nerka:

—Yachachejníy, sumajta caypi cashanchej. Ruwaycuman quinsa chꞌujllasta, ujta kanpaj, ujta Moisespaj, ujtataj Eliaspaj, —nispa.

6 Pedroka chayta nerka mana yachaspa imatachus parlananta. Chay yachacojcunanka maytamin manchachicusharkancu.

7 Chanta uj phuyu riqhurimuspa paycunaman uraycamorka. Phuyumantataj parlamushajta uyarerkancu:

—Caymin cꞌata munaska Wawayka. Payta uyariychej, —nispa.

8 Chay quiquinpacha muyuynincuta khawarispa manaña ni pita ricorkancuchu. Manachayrí Jesús sapallanña paycunawan casharka.

9 Orkomanta uraycamushaskancupitaj Jesús yachacojcunanta camacherka:

—Chay ricuskayquichejta ama ni piman willaychejchu noka, Diospa cachaska Runan, wañuymanta causarimpunaycama, —nispa.

10 Ajinaka ni piman chay imasmanta willarkancuchu. Paycunapurarí tapunacusharkancu:

—“Wañuymanta causarimpunay” ¿imatataj niyta munan cay niskanwanrí?

11 Jesusta Eliasmanta tapuspa nerkancu:

—Yachachejcunanchejka nincu, Cristomanta ñaupajta Elías jamunanta. ¿Imaynataj chayrí?

12-13 Jesusri nerka:

—Chaytaka allinta nincu Diospa palabranmanjina. Chekata Eliaska jamun tucuy imata allinyachinanpaj. Astawanrí niyquichej: Eliaska jamorkaña. Bautizaj Juan Eliasjina jamorka ñaupakeyta. Runastaj payman sajrata ruwarkancu imatachus munaskancuta. Chaywanpis Diospa palabranpi ajinallatataj nin, Diospa cachaska Runanka ashqha imasta ñacꞌarinanta, manacajpaj khawaska canantawan, —nerka Jesús.

14 Jesuska paywan cajcunawan cutimuspa yachacojcunanta israel yachachejcunatawan tariparka. Paycunatataj ashqha runa chaupipi churanacushajta ricorka. 15 Chay ashqha runasri mana yuyaymanta Jesusta ricorkancu. Correspa payta napaycorkancu. 16 Jesustaj israel yachachejcunata taporka:

—¿Imamantataj churanacusharkanquichej paycunawanrí?

17 Chay ashqha runasmantari uj runa payman cuticherka:

—Yachachejníy, wawayta pusamorkayqui upayachej supayniyoj caskanraycu. 18 Maypichá payta japꞌin chayka pampaman wijchꞌun. Phosokotajina llausata suruchin siminmanta, quirusninta cꞌaruchispa wañuskatajina ruwan. Ñapis yachacojcunayquita nicorkaniña wawaymanta supayta kharkonancuta, manataj aterkancuchu, —nispa.

19 Jesustaj nerka:

—¡Ay, Diospi mana japꞌicoj runas! ¡Maycꞌajcamataj kancunawan casaj! ¡Maycꞌajcamataj kancunata muchuskayquichej! Cayman waynata pusamuwaychej, —nispa.

20 Waynata payman pusamorkancutaj. Chay supayka Jesusta ricuspa waynata tꞌucuwan japꞌiycucherka. Waynataj pampaman urmarka. Chokaycachacuspataj siminmanta phosokota ajtorka. 21 Jesús waynaj tatanta taporka:

—¿Maycꞌajmantañataj cayjina cashanrí?

Tatantaj cuticherka:

—Wawitamantapacha. 22 Ashqha cutis payta ninaman yacumanpis chokaycun wañuchinanpaj. Kanrí, Señorníy, sichus imata atinqui chayka, qhuyacuspa yanapariwaycu, —nispa.

23 Jesusrí payta nerka:

—Kan ninqui: “Sichus atinqui”, nispa. Noka niyqui, Diospi japꞌicojpajka tucuy ima aticun, —nispa.

24 Niskantawancamataj waynaj tatanka khaparispa nerka:

—¡Diospi japꞌicuni! ¡Yanapaway astawan japꞌicunaypaj! —nispa.

25 Astawan ashqha runa tantacamojta ricuspa Jesuska chay quiquinpacha millay supayta camacherka:

—Noka camachiyqui, upa jokꞌara supay: ¡Llojsiy paymanta, amataj ni jaycꞌaj ujtawan payman yaycuychu! —nispa.

26 Supayri waynata khaparichispa sinchꞌita tꞌucuchispataj paymanta llojserka. Waynataj wañuskajina carka. Chayraycu ashqhas nisharkancu, wañupuskanta. 27 Jesusrí maquinmanta japꞌispa jataricherka. Waynataj sayaricorka.

28 Jesús wasiman yaycojtin yachacojcunan sapallancupi taporkancu:

—¿Imaraycutaj nokaycu mana aterkaycuchu chay millay supayta kharkoytarí?

29 Paycunaman cuticherkataj:

—Cay layata kharkoyka mana aticunchu manachayrí tucuy sonkowan Diosmanta mañacuyllawan, —nispa.

30 Chaynejmanta llojsispataj Galilea jallpꞌanejta rerkancu. Jesuska yachacojcunanta yachachishaskanraycu, riskanmanta ni pi yachananta munarkachu. 31 Paycunata nisharkataj:

—Noka, Diospa cachaska Runan, sajra runaspa maquisnincuman jaywaska casaj, wañuchiwankancutaj. Quinsa pꞌunchaymantari causarimpusaj, —nispa.

32 Yachacojcunari mana yacharkancuchu Jesuspa niskanka imatachus niyta munaskanta. Chaywanpis manchachicorkancu niskanmanta payta tapuyta.

33 Capernaum llajtaman chayarkancu. Wasipi cashaspataj Jesuska yachacojcunanta taporka:

—¿Imamantataj tapunacusharkanquichej ñanta jamushasparí?

34 Chꞌinllataj carkancu. Ñanta jamushaspa paycunaka churanacorkancu maykennincuchus aswan curaj caskanmanta. Chayraycu tapojtenka ni imata nerkancuchu. 35 Chanta tiyaycuspa chay chunca iscayniyojta wajyaytawan paycunaman nerka:

—Pillapis curajpaj khawaska cayta munajka, tucuy runasmanta pisipaj churacunan tiyan. Tucuypa yanapajnincutaj canan tiyan, —nispa.

36 Ajinapi uj wawata chaupincupi sayacherka. Markꞌaricuspataj yachacojcunanta nerka:

37 —Nokapi japꞌicojka cayjina wawata, “Walejta jamunqui”, niyta atinman. Chaywanka noka quiquiyta nishawan. Sichus nokata, “Walejta jamunqui”, niwan chayka, mana nokallatachu nishawan. Manachayrí cachamuwajniytapis nishallantaj, —nerka Jesús.

38 Chanta Juan Jesusta nerka:

—Yachachejníy, uj runata ricorkaycu atiyniyoj sutiyquiwan supaycunata kharkoshajta. Mana kanta nokaycujina khatej caskanraycu payta jarcꞌayta kallarerkaycu, —nispa.

39 Jesús nerka:

—Ama payta jarcꞌaychejchu. Sutiypi uj jatun tꞌucuna ruwanata ruwajka, manamin chay khepanpachallataj nokamanta sajrata parlanmanchu. 40 Mana contranchejpi cajka nokanchejpa allinninchejpaj cashan. 41 Chekata niyquichej: Pillapis ujyanapaj yacuta kosunquichejman Cristoj yachacojcunan caskayquichejraycu chayka, payman Dios cutichiponka, —nispa.

42 Nillarkataj:

—Cay juchꞌuycitus nokapi japꞌicojcunamanta ujninta, pillapis juchaman urmachinman chayka ¡ay phutiy, ari, chay runapajka! Paypajka aswan allin canman wañupunan. Allin canman paypaj jatun molino rumita cuncanman warqhuycuspa, runas jatun kochaman payta wijchꞌuycunancu. 43 Sichus maquiyqui juchaman urmachisunquiman chayka, qhuchurpacuy. Chꞌulla maquiyojpis wiñay causayman yaycuyta atinqui. Chayka aswan allinpuni cashan iscaynin maquisniyoj uqhu pacha ninaman wijchꞌuycuska canayquimantaka. Chay ninaka ni jaycꞌaj wañunchu. 44 Chaypitaj wiñay wañuypi ñacꞌarenkancu. 45 Sichus chaquiyqui juchaman urmachisunquiman chayka, qhuchurpacuy. Chꞌulla chaquiyojpis wiñay causayman yaycuyta atinqui. Chayka aswan allinpuni cashan iscaynin chaquisniyoj uqhu pacha ninaman wijchꞌuycuska canayquimantaka. 46 Chaypitaj wiñay wañuypi ñacꞌarenkancu. 47 Sitajchus ñawiyqui juchaman urmachisunquiman chayka, siqꞌirpacuy. Chꞌulla ñawiyojpis janaj pachaman^a yaycuyta atinqui. Chayka aswan allinpuni cashan iscaynin ñawisniyoj uqhu pacha ninaman wijchꞌuycuska canayquimantaka. 48 Chaypitaj wiñay wañuypi nacꞌarenkancu.

49 [‘Chayraycu sajra munayniyquichejta atipaychej. Llaquiycunata muchuspa chay munayniyquichejta atipanquichej. Llaquiyka ninajinamin. Niskasniyta casuytaj cachijinamin. 50 Ajinata niskasniyta casuspa llaquiycunata muchuwajchej chayka, wiñay cusiskas canquichej. Mana urmachiskas canayquichejpaj niskasniyta casuychejpuni.]^b Kancunapurapis allillanpi causacuychej, —nerka Jesús.