2 Jesús barcomanta jallpꞌaman llojsiskantawancamataj uj millay supayniyoj runa paywan tincorka. Chay runaka panteonmanta llojsimorka, 3 chaypi tiyacuskanraycu. Manaña ni pi payta watayta aterkachu cadenaswanpis. 4 Ashqha cutitaña payta watarkancu fierro watanaswan fierro cadenaswanpis. Cadenastarí pꞌitiraj, watanastataj tꞌunaj. Ajinaka ni pi callpayojchu carka payta mansuyachinanpaj. 5 Tuta pꞌunchay panteonpi orkospipis khaparispa purej, rumiswan qhuchucuspa. 6 Carumanta Jesusta ricuspa supayniyoj runaka uskhayta jamorka, Jesuspa ñaupakenpitaj konkoricorka. 7 Jatunmanta khaparerka khaykeyaspa:

—¡Cꞌata Diospa Wawan Jesús, imaman chapucuwanqui! Diospa ñaupakenpi sumajta mañacuyqui ama ñacꞌarichinawayquita, —nispa.

8 Ajinata chay runa nerka Jesús camachishaskanraycu:

—¡Millay supay, llojsiy cay runamanta! —nispa.

9 Jesustaj payta taporka:

—¿Imataj sutiyqui?

Cuticherkataj:

—Sutiyka Legión, sojta waranka, ashqhas caskaycuraycu, —nispa.

10 Chay supaycunaka Jesusta mayta mañacusharkancu:

—Ama kharkowaycuchu cay jallpꞌamanta jawamanka, —nispa.

11 Lomas kayllapiri ashqha qhuchis korata miqhusharkancu. 12 Millay supaycunataj Jesusta mañacorkancu:

—Qhuchisman cachawaycu chaycunaman yaycunaycupaj, —nispa.

13 Jesús paycunata sakellarka. Runamanta llojsispataj millay supaycunaka qhuchisman yaycorkancu. Chanta chaypi caj iscay warankajina qhuchistaj, tucuynincu, lomamanta callpawan wijchꞌuycucuspa kakanejta kochaman chꞌulticorkancu. Jekꞌekaspataj wañurarkancu.

14 Chayta ricuspa qhuchi michejcunaka aykecorkancu. Paycuna llajta runasman ranchospi tiyacojcunamanpis chay imasmanta willamorkancu. Ajinamanta runas llojserkancu imachus carka, chayta ricunancupaj. 15 Jesusman chimpaspa chay ashqha supayniyoj carka, chay runata ricorkancu. Payka pꞌachalliska yuyayninpi tiyacusharka. Chayta ricuspa runaska mayta manchachicorkancu. 16 Chay ruwaskasta ricojcunarí willasharkancu imaynatachus chay runata supaycunamanta cacharichiskanta, imayna qhuchiswan caskantapis. 17 Ajinaka chayta uyarispa jamojcunaka mayta nisharkancu Jesusta jallpꞌancumanta ripunanta, anchata manchachicuskancuraycu.

18 Mañaskancumanjina Jesús ripunanpaj barcoman yaycushajtin, supaycunamanta cacharichiska runaka mayta nicusharka:

—Yachachejníy, sakellaway kanwan rinayta, —nispa.

19 Jesusrí payta mana sakerkachu paywan rinanta. Astawanpis nerka:

—Wasiyquiman cutipuy ayllusniyquejman. Paycunaman willamuypuni Dios ruwapususkanmanta pay qhuyasuskanmantawan, —nispa.

20 Ajinamanta payka Decápolis jallpꞌapi Jesuspa ruwaskanmanta willarayta kallarerka. Tucuytaj tꞌucorkancu.

21 Ujtawan Jesús barcopi kochata chimparka. Kocha cantopi cashajtintaj payman ashqha runas tantacamorkancu.

22 Chanta uj runa riqhurimorka, Jairo sutiyoj. Payka tantacuna-wasipi curajcunamanta carka. Jesusta ricuspa paypa ñaupakenpi konkoricorka, 23 maytataj niricorka:

—Warmi wawitay wañupunayashan. Jamuspa maquisniyquita payman churaycuripuway thañicapunanpaj causananpajtaj, —nispa.

24 Jesustaj paywan rerka. Rishajtintaj chay may ashqha runas khatisharkancu. Chaycunataj payman ñitꞌicamusharkancu.

25 Uj warmi carka chunca iscayniyoj watata yawar apaywan onkoska. 26 Ashqha medicoswan jampichicuspa anchata ñacꞌariska, tucuy capuynintapis tucuchiska. Chaywanpis mana allinyacorkachu. Manachayrí aswan onkoskallapuni casharka. 27 Chay warmeka Jesusmanta uyarispa chay ashqha runas chaupita jamorka. Jesuspa khepanman kayllacamuspataj pꞌachasninta japꞌiricorka. 28 Chayta ruwarka ajinata sonkonpi yuyaskanraycu: “Sichus pꞌachallantapis llanqharisaj chayka, thañiska casaj”. 29 Chay quiquinpacha yawar apaymanta thañicaporka. Payri onkoyninmanta thañichiskaña caskanta reparacorka. 30 Jesuska sonkonpi chay quiquinpacha repararka atiyninwan uj runata thañichiskanta. Chayraycu cutiricuspa chay ashqha runas chaupipi taporka:

—¿Pitaj pꞌachasniyta japꞌiricorka?

31 Yachacojcunanri payta nerkancu:

—Ricunqui cay qꞌisqui runas kanta ñitꞌimushasuskancuta. ¿Tapushanquitaj pi japꞌirisuskanta?

32 Jesustaj muyuyninta khawarerka payta japꞌirejta ricunanpaj. 33 Warmirí imaynapichus thañiska caskanta yachaspa, manchachicuywan qharcatitiywantaj paypa ñaupakenpi konkoricorka. Jesusmantaj tucuy imata chekata willarka. 34 Chanta Jesús warmita nerka:

—Diospi japꞌicuskayquiraycu thañiskaña canqui. Onkoyniyquimanta thañiska caspa cusiywan ripuy, —nispa.

35 Jesús parlashajtillanraj chay curaj runa Jairoj wasinmanta willaj jamorkancu:

—Ususiyqueka wañupunña. Amaña yachachejta molestaychu, —nispa.

36 Jesusri chay niskancuta uyarispa Jairoman nerka:

—Amaña manchachicuychu. Japꞌicushallaypuni Diospi, —nispa.

37 Jesuska ni pita sakerkachu paywan rejta manachayka Pedrota, Jacobota, chay Jacoboj wauken Juantawan. 38 Curajpa wasinman chayamuspari ashqha wakashajcunata ricorka phutiywan khaparejcunata ima. 39 Yaycuspataj paycunaman nerka:

—¿Imaraycutaj cay chꞌajwarí? Amaña wakaychejchu. Imillitaka mana wañuporkachu. Manachayrí puñushan, —nispa.

40 Paycunataj Jesusta asipayarkancu. Payrí tucuyta jawaman kharkorka. Imillitaj tatanta mamanta quinsa yachacojcunantawan pusaricorka. Imillita casharka, chaymantaj yaycorka. 41 Chanta imillitata maquinmanta japꞌispa nerka parlaynincupi:

—Talita, cumi, —nispa. Cayka niyta munan: Imillita, kanta niyqui, jatarimuy.

42 Chay quiquinpacha imillitaka jataricorka purerkataj. Chunca iscayniyoj watasniyojjina carka. Chaypi cajcunari manchayta tꞌucorkancu. 43 Jesustaj paycunata sinchꞌita camacherka, ama ni pi chay imasmanta yachananta. Nerkataj, imillitaman miqhunata konancuta.