2 Ashqha quiquinchanaswan paycunata yachachisharka. Nerkataj:

3 —¡Uyariychej! Uj runa mujuta tꞌacaj llojserka. 4 Tꞌacashajtinri waquin mujoka ñan pataman urmarka. Pꞌiskostaj jamuspa pallacaporkancu. 5 Waquin mujutaj pisi jallpꞌayoj rumi pataman urmarka. Chay mujoka uskhayta pꞌuturamorka pisi jallpꞌa caskanraycu. 6 Mana sumaj saphiyoj caskanraycutaj inti ruphamojtin chꞌaquiporka. 7 Waquin mujutaj qhishcas chaupiman urmarka. Cusca wiñaycuytawantaj qhishcas trigota sipiycaporka. Chay mujoka manataj pokorkachu. 8 Waquin mujurí sumaj jallpꞌaman urmarka. Chay mujoka wiñaspa pokorka. Pokoynintaj sumaj carka. Waquin muju quinsa chuncata pokorka. Waquin sojta chuncata, waquintaj pachajta pokorka, —nispa.

9 Chaywanpis Jesús nillarkataj:

—¡Ningriyoj cajka sumajta uyarichun! —nispa.

10 Chay ashqha runas ripojtincu Jesuspa waquin khatejcunan chay chunca iscayniyoj cachasninwan payta taporkancu quiquinchanasmanta. 11 Jesustaj paycunaman sutꞌincharka:

—Imaynatachus Dios runasta camachin, chay yachachinaska pacaska carka. Cunanrí kancunallaman Dios chay imasta sutꞌinchashasunquichej. Waj runasmantaj cay imaska quiquinchanasnejta yachachiska cashan. 12 Chayraycu ricuncu manataj ricuskancuta entiendencuchu. Uyarincu manataj uyariskancuta reparancuchu. Ajinapi Diosman mana cutiriconkancuchu juchasnincupis khechuska cananpaj, —nispa.

13 Jesús paycunata nerka:

—Sichus cay quiquinchanata mana entiendenquichejchu chayka ¿imaynatataj reparanquichej tucuy chay waj quiquinchanasnejta yachachiskastarí? 14 Chay quiquinchanaka caymin cashan: Mujuta tarpojka Diospa niskanta willarajmin. 15 Waquin muju ñan pataman urmarka. Ajinallatataj runas Diospa niskanta uyarincu. Chay quiquinpachataj supay Satanás jamuspa Diospa niskanta sonkoncumanta orkhocapun. 16 Waquin mujutaj pisi jallpꞌayoj rumi pataman urmarka. Ajinallatataj waquinpis Diospa niskanta uyarispa cusiywan japꞌicuncu. 17 Sonkoncumanrí mana sumajta yaycunchu. Mana sumaj saphiyoj mujujina cancu. Chayraycu pisi ratullapaj Diospa niskanta creencu. Astawanrí llaquiycuna khatirishajtin chayrí Diospa niskanraycu muchojtincu, chincacapuncu. 18 Waquin mujutaj qhishca chaupiman urmarka. Ajinallatataj waquinpis Diospa niskanta uyarincu. 19 Chay uyarejcunataj anchataraj yuyashancu cay pacha imasmanta. Munashancu ancha khapaj capuyta pantachej cusiytawan. Cay pacha imasta munashancupuni. Tucuy chay imas sonkoncupi Diospa niskanta sipiycapun. Ajinamanta mana pokoyniyoj caspa causaynincupi Diosta mana cusichincuchu. 20 Waquin mujurí allin jallpꞌaman urmarka. Ajinallatataj waquin runaspis cꞌacha sonkowan sumajta Diospa niskanta uyarispa casuncu. Causaynincupitaj Diosta cusichincu. Paycunaka quinsa chuncata pokoj, sojta chuncata pokoj, pachajta pokoj mujusjina cancu, —nerka Jesús.

21 Chaywanpis Jesuska nerka:

—Runas uj cꞌanchata japꞌichispaka mana wichꞌi uraman churancuchu nitaj tiyana uramanpis. Astawanpis patanejman churancu.

22 Ajinallataj Diospa niskanwanpis cashan. Waquin runaspajka pacaska cashan. Nokarí reparanancupaj yachachispa Diospa niskanta sutꞌinchashani. 23 ¡Ningriyoj cajka sumajta uyarichun! —nispa.

24 Nerkataj:

—Sumajta khawacuychej imaynata uyariskayquichejta. Imaynatachus Diospa niskanta uyarispa casunquichej chaymanjinallataj niskanta kosonkachej. Astawanraj kosonkachejpis. 25 Diospa niskanta japꞌicojmanka astawan koska canka. Mana japꞌicojmantarí pisi japꞌicuskanpis khechuska canka, —nerka Jesús.

26 Nerkataj:

—Dios runaspa sonkoncupi camachejtin cayjinaman rijchꞌacun: Uj runa trigo mujuta jallpꞌaman tꞌacan. 27 Runari tuta puñun, pꞌunchaytaj jataricun. Manataj yachanchu imaynatachus mujoka llojsimuskanta wiñaskantapis. 28 Jallpꞌari payllamanta ñaupajta yurata riqhurichin. Chaymanta llullumun; khepantataj pokoyta tucuchan. 29 Trigo sumaj pokoskaña cajtintaj runaka ruthun, cosecha chayamuskanraycu, —nerka Jesús.

30 Nillarkataj:

—Dios runaspa sonkoncupi camachejtin ¿imamantaj rijchꞌacunman? ¿Imawantaj sutꞌinchasunman? 31 Muju tarpuskawan quiquinchasun. Cay jallpꞌapi caj aswan juchꞌuy mujitu^a 32 tarpucojtenka tucuy waj korasmanta aswan jatunta wiñan. Sumaj yurachacun. Pꞌiskospis llanthunpi thapacharicuncu, —nispa.

33 Ashqha cayjina quiquinchanaswan Diospa niskanta runasman Jesús parlasharka uyariyta atiskancumanjina. 34 Paycunamanka parlaj quiquinchanaswanpuni. Yachacojcunanmanrí paywan sapallancu cashajtincutaj tucuy imata sutꞌita reparacherka.

35 Chay pꞌunchay chꞌisiyaycojtinñataj yachacojcunanman Jesús nerka:

—Jacu rinachej cay kocha chimpaman, —nispa.

36 Chanta paycuna chay ashqha runasta cacharpayaspa Jesusta pusarkancu, casharka chay barcollapipuni. Wajcunapis barcosnincupi paycunawan cusca rillarkancutaj. 37 Rishaskancupi sinchꞌi wayra jatarerka kochapi. Wayraskanpitaj yacuta callpawan khallachimuspa barcoman juntꞌachisharkaña. 38 Jesusri puñucusharka barcoj khepannejpi saunanapi samaricuspa. Payta rijchꞌachispa nerkancu:

—¡Yachachejníy! ¡Chincaycushanchejña! ¡Manachu imapis kocusunqui chincaycunanchejmanta!

39 Paytaj rijchꞌarispa wayrata cꞌamerka kochatapis nerka:

—¡Chꞌin cay! ¡Jarcꞌaska cay! —nispa.

Manañataj wayrarkachu. Kochapis chꞌinyacaporka. 40 Nerkataj yachacojcunaman:

—¿Imaraycutaj mancharicunquichejrí? ¿Manarajchu Diospi japꞌicunquichej?

41 Paycunarí mayta manchachicuspa tꞌucorkancu. Ninacusharkancutaj:

—¿Ima runataj payrí? Wayrapis kochapis payta casuncu, —nispa.