3 Jaywaycoj Judaska Jesusta juchachaska caskanta ricorka. Chayraycu payka sonkonpi mayta phuticorka. Chaymantataj chay jatun tantacuyman rispa quinsa chunca kolkesta cutiycuchiporka. 4 Payri nerka:

—Mana juchayoj runata wañunanpaj jaywaycuspa juchallicuni, —nispa.

Paycunataj nerkancu:

—¿Nokaycu ima ruwanaycu tiyanrí? Kanmantachá chayka.

5 Judastaj yupaychana-wasiman kolketa wijchꞌuycaporka. Chaymantataj rispa sipirpayacamorka.

6 Yupaychana-wasimanta curajcuna chay kolketa okharispa nerkancu:

—Camachiskanchejmanjina chay kolketa yupaychana-wasipaj mana churayta atinchejchu. Imaraycuchus uj runa wañunanpaj kolke carka, —nispa.

7 Chanta parlanacuspa chay kolkewan yuyarkancu cꞌanalleroj jallpꞌanta rantiyta. Chay jallpꞌa forasterocuna pꞌampacunancupaj canan carka. 8 Chayraycu chay jallpꞌaka uj runaj wañuyninwan rantiska sutichaska carka. Cunan pꞌunchaycama ajina sutichaska cashan. 9 Ajinapi unay willaj Jeremiaspa niskanka juntꞌacorka. Payri Diospa palabranpi nerka: “Israelcuna quinsa chunca kolkesta japꞌerkancu. Chay kolketa israelcuna uj yuyayman churacuspa korkancu Jesús jaywaska cananpaj. 10 Chay kolkewantaj uj cꞌanalleroj jallpꞌanta ranterkancu. Chayka Diospa camachiwaskanmanjinamin”.

11 Jesustari camachej Pilatoj ñaupakenman aparkancu. Paytaj Jesusta taporka:

—¿Kanchu israelcunaj camachejnincu canqui?

Jesusri nerka:

—Kan ninqui, ajinamin, —nispa.

12 Jatun tantacuy runas mayta Jesuspa contranpi willasharkancu. Payri ni imata cutichicorkachu. 13 Chayraycu Pilatoka nerka:

—¿Imaymanata kanpa contrayquipi willacushancu? ¿Manachu uyarinqui?

14 Jesusri ni uj simitapis payman cuticherkachu. Chayraycu Pilatoka mayta tꞌucorka.

15 Sapa wata camachejka chay jatun pꞌunchaycunapi uj wiskꞌaska runata cacharejpuni caj. Chaymanjinataj mañaskancuta uj wiskꞌaska runata paycunapaj cacharipunan caj. 16 Chaypachataj uj mana allinpaj rejsiska runa wiskꞌaska casharka. Barrabás sutiyoj. 17 Ashqha runas tantaska cashajtincu Pilatoka nerka:

—¿Maykentataj cacharipuskayquichej? ¿Barrabastachu chayrí Cristo niska Jesustachu?

18 Imaraycuchus yacharka israelcuna envidiamanta Jesusta payman jaywaycuskancuta.

19 Jesusmanta yuyashajtintaj Pilatoj warmin uj runata cachamorka ninanpaj: “Ama juchachaychu chay chekan runata. Khaway, cunan chꞌisi moskoyniypi paynejta sinchꞌita muchorkani”.

20 Tantacuypi tucuy curajcuna chay runasta yachaycucherkancu. Nerkancutaj: “Barrabasta cacharipunanta mañaychej. Jesustataj wañuchiska cananta niychej”.

21 Pilatotaj paycunata taporka:

—Cay iscay runasmanta ¿maykentataj cacharipuskayquichej?

Paycunataj cuticherkancu:

—Barrabasta cacharipuwaycu.

22 Pilatori paycunaman nerka:

—Cristo niska, chay Jesusta ¿imanasajtajrí?

Tucuynincu cuticherkancu:

—¡Chacataska cachun payka!

23 Pilatotaj nerka:

—¿Imaraycutaj? ¿Ima mana allintataj ruwarkarí?

Paycunataj astawan sinchꞌiwan khaparerkancu:

—¡Chacataycuy paytaka!

24 Pilatoka repararka chay runasta mana chꞌin yachiyta atinanta. Astawan astawan chꞌajwa canayashaskanraycutaj yacuta apachimorka. Chaymantataj runaspa ñaupakencupi maquisninta mayllacorka. Nerkataj:

—Cay runaj wañuyninmanta mana juchayojchu cani. Kancuna imanamuychejpis.

25 Tucuynincu chay runaska cuticherkancu:

—¡Chay runaj wañuyninmanta nokaycu wawasniy cuwanpacha juchayoj casajcu!

26 Chanta Pilatoka Barrabasta cachariporka paycunapaj. Jesustataj jasutꞌichispa chay runasman jaywaycorka chacataska cananpaj.

27 Chanta camachejpa soldadosnenka Jesusta apaycorkancu camachejpa tiyacuna-wasinman. Chaymantataj paycunaj masisnincu tantaycucorkancu Jesusta muyuycuspa. 28 Ajinaspataj Jesuspa pꞌachasninta lluchꞌorkancu. Chanta camachejtajina puca pꞌachawan pꞌachalliycucherkancu. 29 Pilluta qhishcamanta simpꞌaspataj Jesuspa umanman churaycorkancu. Asicunancupajtaj paña maquinman camachejmanjina uj sokosta churarkancu. Paypa ñaupakenman konkoricuspa nerkancu:

—¡Viva israelcunaj camachejnincu!

30 Payta thokaycorkancu. Paymanta sokosta japꞌispataj umanpi wajtasharkancu. 31 Payta asipayaytawanka chay puca pꞌachata lluchꞌorkancu. Chaymantataj pꞌachasninta pꞌachalliycuchipuspa pusarkancu paytaka chacatanapaj.

32 Soldados llajtamanta llojsishaspaka uj Cirene llajtayoj runawan tincorkancu. Paypa sutinri Simón carka. Paytataj camacherkancu Jesuspa cruzninta kꞌepinanta. 33 Ajinaspa tꞌojlu caskan, chay Gólgota lugarman chayarkancu. 34 Chaypitaj vinota jayakꞌewan chajruycuspa payta korkancu ujyananpaj. Jesusri mallirispa mana ujyarkachu.

35 Soldadostaj Jesusta chacatarkancu. Chanta suerteta chokarkancu yachanancupaj pipajchus Jesuspa pꞌachasnin cananta. Ajinapi unay willajpa niskanka Jesusmanta juntꞌacorka: “Suertesta chokaspa pꞌachasniyta partinacorkancu”. 36 Chaypi soldadoska tiyaycucuspa sumajta khawasharkancu. 37 Jesuspa umanpa patannejpitaj uj kelkaskata churarkancu imamantachus chacataska caskanta willanancupaj. Chaytaj nin: “Caymin Jesuska, israelcunaj camachejnin”.

38 Chaypitaj Jesuswan iscay runa wañuchi suwas chacataskas casharkancu. Uj suwaka paypa pañannejpi, uj caj suwataj llokꞌennejpi casharka. 39 Chayninta purejcunataj millayta cꞌamisharkancu payta. Umancuta qhiwirispa asipayanancupaj 40 nisharkancu:

—¡Kanka, yupaychana-wasita urmachej, chaymanta quinsa pꞌunchaypitaj watejmanta sayarkochej, quiquiyquita cacharichicuy! Diospa Wawan canqui chayka, chay cruzmanta uraycamuy, —nispa.

41 Ajinallataj yupaychana-wasimanta curajcunawan, israel yachachejcunawan, waj curajcunawan asipayasharkancu Jesusta. Ninacusharkancutaj:

42 —Cay runaka wajcunata cacharicherka. Pay quiquinrí nitaj atinchu cacharichicuyta. Israelcunaj camachejnincu canman chayka, cruzmanta uraycamuchun cunitan. Chayta ricuspataj nokaycupis creesajcu pay Camachej caskanta. 43 Diospi payka atinicorka, “Diospa Wawan cani”, nispa. Chayraycu cunitan payta cruzmanta cacharichichun, sichus chekamanta Dios payta munacun chayka, —nispa.

44 Paywan cusca chacataska suwaspis quiquillantataj payta cꞌamisharkancu.

45 Chaupi pꞌunchaymanta chaupi tardecama tucuy jallpꞌa lakhayaycorka. 46 Chaupi tardetajinataj Jesuska sinchꞌita khaparicorka:

—¿Elí, Elí lama sabactani? Khapariskan niyta munan: Diosníy, Diosníy, ¿imaraycutaj sakerpariwanquirí?

47 Waquin chaypi cajcunamanta chayta uyarispa nerkancu:

—Cayka unay willaj Eliasta wajyacushan, —nispa.

48 Chay quiquinpacha ujnincu paycunamanta uskhayta rispa uj esponjata japꞌerka. Chayta cꞌallcu ujyanaman chhaporka. Chaytataj uj sokosman churaspa Jesusman jaywarka chꞌonkananpaj. 49 Waquinrí nisharkancu:

—Suyay. A ver, ricusunchej, Elías jamonkachus payta cruzmanta cacharichej.

50 Jesús watejmanta sinchꞌita khaparicorka. Causayninta tatanpa maquisninman jaywaycuspataj tucucaporka. 51 Yupaychana-wasipi warqhuska caj khatanaka patamanta uracama iscayman lliqꞌicorka. Jallpꞌataj qharcatiterka. Rumispis quichacorkancu. 52 Pꞌampanas quicharicorkancu. Diospi japꞌicuspa wañuska cajcunajta ashqhaspata ayasnincu causarichiskas carkancu. 53 Paycunaka pꞌampanasmanta llojsiporkancu. Jesús causarimuskanmantataj Jerusalén llajtaman jamorkancu. Chaypitaj ashqha runasman riqhurerkancu.

54 Romano camachej, soldadosninwan, Jesusta wakaychasharkancu. Paycunataj jallpꞌa qharcatitishajta chay waj imas ruwacushajtawan ricorkancu. Chayraycu mayta manchachicuspa nisharkancu:

—Chekamanta cay runaka Diospa Wawan carka, —nispa.

55 Chaypi casharkancu ashqha warmis caritullamanta khawacamusharkancu. Paycunari Jesusta Galilea jallpꞌamanta khatimoj carkancu payta yanapanancupaj. 56 Paycuna uqhu carkancu Magdala llajtayoj María, Jacobojta Josejtawan mamancu, waj Mariapiwan. Chaywanpis Zebedeoj wawasninpa mamancupis paycuna uqhupi carka.

57 Chꞌisiyaycojtinña uj khapaj runa, José sutiyoj, jamorka Arimatea ranchonmanta. Paypis Jesusta khaticojcunamanta carka. 58 Payka Jesuspa cuerponta mañaj Pilatoman rerka. Chanta Pilatoka camacherka soldadosta Joseman jaywanancuta. 59 Josetaj cuerponta apacapuspa okharerka. Linomanta uj llimphu awaskawan maytꞌorka. 60 Paypata carka uj mosoj aya pꞌampana. Chaytaka pay uj jatun kakapi unayña ruwachicorka. Chayman Jesuspa cuerponta churaycorka. Chaymantataj chay puncuman uj jatun pꞌalta rumita muyuchispa wiskꞌaycorka. Ajinaspataj riporka. 61 Chaypitaj casharkancu María Magdalenawan chay uj caj Mariapiwan. Paycunaka chay pꞌampanaj chimpannejpi tiyaycusharkancu.

62 Israelcunaj samacuna pꞌunchaynincupaj waquichicunancu caj. Samacuna pꞌunchaypitaj yupaychana-wasimanta curajcunawan fariseo partepiwan tantaycucorkancu. Chaymantataj Pilatojman rispa 63 nerkancu:

—Señor, chay pantachej runaka causashaspallaraj, “Wañuskaymanta quinsa pꞌunchaymanta causarimpusaj”, niskanta yuyaricuycu. 64 Chayraycu camachiy pꞌampananta sumajta wakaychanancuta quinsa pꞌunchaycamallapis. Yachacojcunanpis cuerponta suwaj jamushancumanchá. Paycunaka suwaytawan runasman nincuman: “Wañuskacunamanta causarimporka”, nispa. Cay pantachiyka chay ñaupaj pantachiymanta aswan mana allinchu canman.

65 Pilatoka paycunata nerka:

—Cay soldadosta pusacuychej. Riychej. Atiskayquichejta pꞌampananta sumajta wakaychamuychej, —nispa.

66 Ajina paycunaka rerkancu. Pꞌampana rumita sumajta wiskꞌarkancu ama ni pi tꞌojpinanpaj. Soldadostataj wakaychanancupaj churarkancu.