3 ‘Uj jatun curcujina kanpa jatun pantaskayquita mana reparacuspaka ¿imaynatataj uj ichhu kꞌopajina hermanoyquej juchꞌuy pantaskanta khawaranquirí? 4 Quiquin ñawiyquipitaj jatun curcu cashajtin ¿imaynatataj hermanoyquita atinqui niytarí: “Hermanóy, sakellaway ichhu kꞌopata ñawiyquimanta orkhosunayta?” nispa. 5 Puraj uya, chay curcutaraj ñawiyquimanta orkhonqui. Chanta aswan sutꞌita ricunqui juchꞌuy kꞌopata hermanoyquejpa ñawinmanta orkhonayquipajka.

6 ‘Dios kosuskayquichejtaka ama koychejchu phiña sajra alkosjina runasmanka, janchꞌojtincu kancunata ama qhanispa tucuchisunancupaj. Nitaj millay qhuchijina causaj runasmanka Dios kosuskayquichejtapis^a wijchꞌuychejchu ama saruycunancupaj mana cajtajina.

7 ‘Diosmanta mañacullaychejpuni, payka kosonkachejtaj. Mascꞌaychejpuni, Dioska tarichisonkachejtaj. Wajyallaychejpuni^b Diostaj puncuta kancunaman quicharisonkachej. 8 Chekamanta mana sakespa mañacojka japꞌenkapuni mascꞌajtaj tarenkapuni. Mana sakespa wajyajmanpis puncoka quichariconkapuni.

9 ‘Astawanpis, wawan tꞌantata mañacojtin ¿pitaj, kancuna tatasmanta, uj rumita jaywanman? 10 Chayrí wawan challwata mañacojtin ¿uj cataritachu jaywanman? 11 Kancuna juchasapa runaslla cashaspapis wawasniyquichejmanka allin imastapuni koyta yachanquichej. May astawanraj janaj pacha Dios Tatayquichejka sumaj imasta konka paymanta mañacojmanka.

12 ‘Chayraycu imaynatachá munanquichej runas kancunaman ruwanancuta ajinallatataj kancunapis paycunaman ruwaychej. Palabranpi^c Dioska chayta ruwananchejta camachin.

13-14 ‘Wiñay causayman chayrí wiñay wañuyman kancuna yaycuyta ajllanayquichej tiyan. Imaraycuchus wiñay wañuyman puncoka jatunmin, chayman chayaj ñanpis. Ashqhastaj chaynejta yaycuncu. Wiñay causayman yaycuchej puncurí cꞌullcumin, chayman chayanapaj ñanpis cꞌullcullataj. Pisistaj Diospa munayninta ruwaspa wiñay causayman yaycuncu. Chayraycu cꞌullcu puncunejta yaycuychej.

15 ‘Khawacuychej llulla yachachejcunamanta. Chaycunaka pantachisunayquichejpaj jamuncu. Paycunaka ovejaman rijchꞌacojjinalla cancu, sonkosnincupirí yarkhaska atojcunajina cancu. 16 Sachꞌastaka pokoynincumanta rejsinquichej. Ajinallatataj paycunataka ruwaskancumanta atinquichej rejsiyta. Ni jaycꞌaj uvaska qhishcarara sachꞌitamanta pallacunchu. Nitaj higoska pallacunchu qhishca sachꞌasmantapis. 17 Ajinata tucuy allin sachꞌaka sumaj pokoyta pokon. Uj mana allin sachꞌarí mana sumaj pokoyniyojllataj. 18 Allin sachꞌaka mana jayataka pokonchu. Nitaj mana allin sachꞌapis allin misqꞌitaka pokonchu. 19 Tucuy mana allinta pokoj sachꞌataka runas cꞌutuncu ninamantaj wijchꞌuncu. 20 Chayraycu kancunapis runastaka ruwaskasnincumanta^d rejsinquichej.

21 ‘Simillancuwan “Ay, Señorníy, Tatáy”, nejcuna Dios camachin, chayman mana yayconkancuchu. Manachayka janaj pachapi tiyacoj Dios Tataypa munayninta ruwajcunalla paypaman yayconkancu. 22 Cutimojtiy, chay pꞌunchay ashqhas niwankancu: “Ay, Señorníy, Tatáy ¿manachu willanasniyquita willararkaycu? ¿Manachu atiyniyquiwan runasmanta supaycunata kharkorkaycu? ¿Manachu ashqha tꞌucuna ruwanastapis atiyniyquiwan ruwarkaycu?” nispa. 23 Chantarí nokataj tucuypa ñaupakencupi paycunaman sutꞌinchasaj: “Kancunataka ni jaycꞌaj rejserkayquichejchu. Mana nokajpatachu canquichej. Kancuna, sajrata ruwajcuna ripuychej nokamanta”, nispa.

24 ‘Chayraycu cay niskasniyta uyarispa sumajta casojlla, nokapajka sumaj yuyayniyoj runajina cashan. Payka sinchꞌi rumi patapi wasichaj runajina cashan. 25 Paraka sinchꞌita jichꞌacamorka. Mayustaj ashqha yacuwan chayamorkancu. Wayrapis jatun callpawan wayraspa chay wasiman komorka. Wasiri mana urmarkachu sinchꞌi rumipi wasichaska caskanraycu. 26 Cay niskasniyta uyarispa tucuy mana casojrí nokapajka mana yuyayniyoj runajina cashan. Tꞌiyupi wasinta wasichaj runajina cashan. 27 Sinchꞌita paraka jichꞌacamorka. Mayustaj ashqha yacuwan chayamorkancu. Wayrapis may callpawan chay wasiman komorka. Wasitaj manchayta urmarka.

28 Jesús cay imasmanta parlayta tucorka. Ashqha runastaj paypa yachachiskanmanta mayta tꞌucorkancu. 29 Imaraycuchus pay Diospa atiyninwan yachachisharka, manataj paycunaj yachachejnincujinallachu.