Ndo Jesús juinchexruenꞌen ndo naa xi juaꞌi itji
2
Ko kuatsinga ikaxin nchakon ko tjumeꞌe ndo Jesús ikjan ndo tjajna Capernaum.
Ko konoꞌe na̱ ixi bakeꞌe ndo naa nchia ntiꞌa.
Marcos 2:1-12
2 Ko kueya chujni konchjiñeꞌe ngajin ndo Jesús ko kuitjaꞌi nchia kuixinꞌin na̱ ko kaxon tsango tsjé chujni jii nduja nchia.
Ko ndo Jesús banchekuenꞌen ndo na̱ chijnie ndo Dio.
3 Ko tjumeꞌe kui̱i̱ noó xi bikao xa naa xi juaꞌi nchetengi tutée.
4 Méxin,
juaꞌi konchjiñeꞌe xa ti jii ndo Jesús ixi kueya na̱ ste ntiꞌa.
Ko kuajinꞌin xa ngataꞌa nchia ko konxrato xa ngataꞌa nchia ko ntiꞌa juinchexingajinxin xa xi niꞌe jitaꞌa kania.
5 Ko ndo Jesús bikon ndo ixi xi meꞌe tsango chuntia xa ko ndache ndo xi niꞌe:
―Chjanꞌna,
ó tjáñana kain ti ndakoꞌa juincheꞌe.
6 Ko kaxin xi tjako ley ste xa ntiꞌa,
stexraxaon xa:
7 “¿Sonda jaña nichja xi jiꞌi?
Nichjangíꞌe xa ndo Dio.
Ixi xroꞌan ngisen sincheméꞌe ijie̱;
jeꞌo ndo Dio chao sincheméꞌe ndo ijie̱ chónda chujni”,
jaña stexraxaon xa.
8 Ko ndo Jesús ó noꞌe ndo ngeꞌe stexraxaon xa,
méxin ndachro ndo:
―¿Sonda jaña xraxaonnta?
9 ¿Ngeꞌe ti ícha tangiꞌa xrontatjan xi niꞌe?
¿Á ícha tangiꞌa xrontatjan xa ixi koméꞌe ti ndakoꞌa juincheꞌe xa,
o̱ tsingatjen xa ko xrotsé xa kanieꞌe xa ko tsaxi tsaji xa?
10 Méxin,
jai tsjakoꞌanta ixi janꞌan Chjenꞌen ndo Dio,
xjan jongíꞌe xranchi chujni,
chonda xjan juachaxin ngataꞌa inche ko tsantsje xjan ijie̱ chónda chujni.
Ko ndo Jesús ndache ndo xi niꞌe:
11 ―Janꞌan ntatjua tingatjen ko itsé kaniaꞌa ko satjia ndúya.
12 Ko stetsjeꞌe kain na̱ ixi tuinxin bingatjen xi niꞌe ko itsé xa kanieꞌe xa ko kuachrjexin xa nchia,
ko sakjui xa.
Ko kain ni ste ntiꞌa xronka na̱ ko kaxin na̱ kuajon na̱ juasie na̱ ngajin ndo Dio ko ndachro na̱:
―Naiꞌa bikona jaña konꞌen.
Ndo Jesús kuiyeꞌe ndo ndo Mateo
13 Ko tjumeꞌe ndo Jesús sakjui ndo ngandeꞌe inda ko itsjé chujni konchjiñeꞌe na̱ ti jii ndo ko jeꞌe ndo juinchekuenꞌen ndo na̱.
Marcos 2:13-28
14 Ko jitatsinga ndo ntiꞌa,
bikon ndo ndo Mateo,
chjenꞌen ndo Alfeo,
jii ndo ti xengaxin iꞌna̱ tomi tayéꞌe xi tjajna Roma ko ndo Jesús ndachro ndo:
―Ruaꞌna̱na.
Ko ndo Mateo bingatjen ndo ko tuinxin ruéꞌe ndo ndo Jesús.
15 Ko tjumeꞌe ndo Jesús bakeꞌe ndo ndoꞌa ndo Mateo,
ko kuajon sen ngeꞌe sine ndo.
Ko kaxon ste kueya xi xengeꞌe ꞌna̱ ko ikaxin ni chónda ijie̱ ko juinekao na̱ ndo Jesús ko kao sen teyuu chrikao ndo.
16 Ko kaxin xi tjako ley ko xi fariseo bikon xa ixi ndo Jesús jinekao ndo kain xi xengeꞌe ꞌna̱ ko ikaxin ni chónda ijie̱,
ko juanchangiꞌe xa sen teyuu chrikao ndo Jesús,
ko ndachro xa:
―¿Sonda xi tjakoꞌanta nekao xa ko tikao xa xi xengeꞌe ꞌna̱ ko ni chónda ijie̱?
17 Ko ndo Jesús kuinꞌen ndo ngeꞌe ndache xa sen teyuu chrikao ndo meꞌe ndachro ndo:
―Ni níeꞌa xrokondeꞌa na̱ xinchexruan.
Jeꞌo ni niꞌe xrokondeꞌe na̱ xinchexruan.
Juiꞌa janꞌan ixi tsiyaꞌa ni ndako ncheꞌe.
Juiꞌi ixi tsiyaꞌa ni chónda ijie̱.
Juanchangiꞌe sen ndo Jesús naa ngeꞌe
18 Naa nchakon sen chrikao ndo Juan Bautista ko xi fariseo juinchekatse ñao na̱ jinta nguixin nchakon,
ko kui̱i̱ kaxin na̱ nichjeꞌe na̱ ndo Jesús ko ndachro na̱:
―¿Sonda ni chrikao ndo Juan ko ni fariseo nchekatse ñao na̱ jinta ko ni chrjikoꞌa jaꞌa,
naꞌi?
19 Ko jaꞌin juatingíexin ndo Jesús:
―¿Á xrojuinchekatsé ñao na̱ jinta,
ni tsikiyeꞌe xi kuteꞌe nchakon tsiki̱i̱ na̱ kiée xa?
Naꞌi ixi xrastekao na̱ xa.
20 Ko tsi̱i̱ nchakon xrotsé na̱ xi tsikuteꞌe,
satsikao na̱ xa,
ko tjumeꞌe ni kuiyeꞌe xa sinchekatse ñao na̱ jinta.
21 ’Xroꞌan ngisen tonchrijin tuꞌo manta natjúá ko takeꞌe na̱ ti manta tsitje.
Siá jaña sincheꞌe na̱,
tsichje manta tsitje ko í xroꞌan tsonta manta natjúá.
22 Kaxon juaꞌi tsikia xran vino natjúá ngaya tjua̱nxra̱n nta̱xi,
ixi siá jaña tsonꞌen,
tsichje tjua̱nxra̱n meꞌe,
ko ixran ko tjua̱nxra̱n ndatsitjáña.
Méxin,
xran natjúá xrokonda tsikia xran naa tjua̱nxra̱n natjúá,
ko jaña kayui ngeꞌe tsitjáñaꞌi.
Konchrinjin sen noatrigo naa nchakon tjokéꞌe ni judío
23 Naa nchakon sábado tjokéꞌe ni judío,
ndo Jesús ko sen teyuu chrikao ndo kuatsinga sen tjenka naa ijngi tsikenga na̱ noatrigo ko sen teyuu chrikao ndo kuaxi sen konchrinjin sen kaxin iti̱n trigo.
24 Ko kaxin xi fariseo juanchangiꞌe xa ndo Jesús:
―¿Sonda sen chrjikoꞌa stencheꞌe sen naa ixra̱ tikinixinꞌa sincheꞌeni nchakon tjokéꞌeni?
25 Ko ndachro ndo Jesús:
―¿Á noaꞌinta ti ndachro xroon jitaxin chijnie ndo Dio chronga xranchi juincheꞌe ndo David ko sen bikao ndo,
naa nchakon kuenꞌen sen jinta?
26 Méxin,
nchakon bakeꞌe xi Abiatar,
xitaana tetuanꞌan,
jeꞌe ndo David kuixinꞌin ndo ndoꞌa ndo Dio ko juine ndo nutja tikinixinꞌen ndo Dio ko kaxon kuajon ndo nio juine kain sen bikao ndo.
Ko nutja meꞌe jeꞌo xitaana chónda xa juachaxin sine xa nio.
27 Kaxon ndachro ndo Jesús: