Selusien koa helamu ten
1 Pita
?Isei mutis selusien koanik?
Pita koa vi eiloheh tai onen Iesu Kristo mutis leta koaneka en sua 63 AD (sua keil koa katau en avong Iesu avasi). Navong Iesu vise rohtoh en Pita, kei vi meatin talah mesauien ral min tunali koa Andru,b ka Iesu viles keilu lumai luvi meatin keil onen. Navong Iesu vesesal valokovein out netan, kei ling Pita vi houlu en eiloheh sav keil.c En tus ten ‘Umen onen eiloheh keil,’ houlu en selusien ten sapta 1-12 mul vit usil tounah koa Pita mumoni. Vesesal en keite ten moulien onen, Pita va en mari taon ten out Rom (koa vise suaini en Babilon) ka lesi keke, en out vasi, Kristin keil avotini keih veni akur sakvisien en hen kavmen, en hen me-Isrel sav keil koa asesein Iesu, ka en hen tiser taluvosien keil koa amul avisein keil en tounah houlu koa rovitei anatin. Sakini, Pita mutis leta koanik vahati lat rendemien onen Kristin keil.
?Isei vuli selusien koanik mulamu?
Pita mutis selusien koanek va min me-Isrel keil koa aling demkatien one en Iesu Kristo. Ka navong sakvisien keil mai keih imok en out Serusalem, houlu en Kristin keil alokovein out Serusalem ka uva suk en out savsav keil. Ka en out vasi koa uva ien, akur more longlongien usil Iesu Kristo ka meatin sav keil emun umai aling demkatien one en Iesu Kristo.
?Pita mutis selusien koanik vensa?
Pita en vati vasel kat Kristin keil availea keke Ahi rie lat keil avahi onen – Ahi rie lat Kristin keil avahi Eim Votut onen,d avahi pris keil onen,e ka avahi horetan ten kantri koa vi votut onen.f Ven koanek, aro en out netan suval avahi heou keil.g
Pita en vati vasel kat Kristin keil avahouhou min avat keil one en out netan – Pita kilea keke Kristin keil houlu amul avotini keih en hen koakeil ten kavmen. Ka avaseini, Pita sel kat Kristin keil keke ihouhou min keil.h
Pita en vati vasel kat Kristin keil avahouhou min keil eris – Pita sel kat slev keil um housil rendemien onen masta keil one,i ahin keil ihouhou min meatin keil one,j ka meahos keil ihouhou min ahin keil one.k
Pita en vati vasel kat Kristin keil avahikiti avoum vatahos – Avaseini keke amul akur mahien keil, Kristin keil umon tounah vasi hetal min rendemien koa heha netanl ka anasa kestei sakien keil koa tisa.m Veni mal keke meatin keil onen Kristo ikur mahien ven demkatien navong amum mal veni kei varei kur mahien.n
Pita en vati vasel kat koakeil ten sios avahouhou revi min elda keil one – Pita sel kat elda keil keke ilosil kat revi meatin keil onen Ahi,o ka sel kat Kristin keil ilong kat elda keil one ten sios.p
Mari rendemien tai ten selusien koanik mul en 1 Pita 4:12-13
Tuak onak eli keil en demkatien, minatimanintei en mahien takeih keil koa mimul mikuri keke vasak vis kami. Minandemtei minahit tounah keil enek irmaitei en kami. Vuo, kosa mihehilelau en sien veni mimul en vati sise ten mahien koa Iesu emun mul ien. Ka en keite ten sise koanik, en avong Iesu hehothot en hetetamenien onen, kami mihehilelau hehi houlu mun en sien.
?Asa mul en selusien koanik?
1. Ahi rie lat vangi meatin keil avahi onen keke avahi votut. (1:1–2:10)
2. Kristin keil ihouhou min meatin sav keil hetal min rendemien koa heha netan. (2:11–3:7)
3. Avaseini mahien keil koa akuri, Kristin keil ilomal hekeih navong amundem kat Iesu koa kur mahien ven keil. (3:8–4:19)
4. Kristin keil ihouhou min koakeil ten sios veni akilea keke Iesu hemai ris. (5:1-14)