Selusien koa helamu ten
Mak
?Isei mutis selusien koanik?
Meatin koa mutis selusien koanik, isen Sion Mak. Kei rovitei tai en meatin teindan elu (12) onen Iesu. Meatin houlu amundemi keke Mak vi litetai koa lohosai navong meatin tavaeen keil umai keke avahuli kat Iesu en out Ketsemani en sua 33 AD (sua keil koa katau en avong Iesu avasi).a Katau suk, en sua 46 AD, Mak musil Pol keilu Banabas en ualien rohtoh onealu keke luvahitehiten more longlongien min meatin keil. Ka Sion Mak lokovein keilu en sise ka va ris Serusalem.b Evus, en 50 AD, Mak musil Banabas luva en out Saepras.c Rokilea keke navong Pol mul en eim takeih, Mak mai ro ral mini ka san kataunien mini.d
Mak mutis tus koanek navong ro en out Rom vesesal en sua 56 AD. Ka vahesa Pita ro ral mini en avong koanik veni selusien houlu koa mutisi ka ven tunien keil onen Pita. Amundemi keke Mak mutis tus koanik usil moulien ka umen onen Iesu mulamu en tus keitel koa Matiu, Luk ka Sion telmutisi.
?Isei vuli selusien koanik mulamu?
Mak mutis selusien keil enek en out Rom keke vahit kilea min Kristin keil ekonek keke Iesu vi Natin Ahi anatin ka vi Mesaea koa Ahi vat kati keke hesani hemai. Sakini, mutis selusien houlu usil merikel keil koa Iesu mumoni vatie lati keke kei ka en out nesa anatin.
?Mak mutis selusien koanik vensa?
Mak en vati vatie lat anatinien keke Iesu vi Natin Ahi – Merikel keil koa Mak mutis lati avi houlu mok mulin asa koa mul en tus sav keil en Tus Votut. Iesu rie lati keke kur keihoen mulin mesaien,e ninin tisa keil,f tounah keil ten out netan,g ka matien emun.h Merikel keil enek arie lat anatinien keke Iesu vi Natin Ahi koa kur keihoen.
Mak en vati vatie lati keke Iesu sel kat avat keil onen Siu keil ka alei seseini – Mak rie lati mukave Iesu sak visi vahisein revi avat keil onen Siu keil en anatinien usili keke vi Natin Ahi ka Mesaea one. Ka sak visi vasel kat keil keke avahiles ran tisaen one ka usil kat Ahi en sakien koa mal. Ka avaseini, keil alei seseini ka amumon sise keke avou vini.i
Mak en vati vatie lati keke more longlongien usil Iesu Kristo mul va min Siu keil ka min koakeil emun arvitei Siu – Anatin keke navong Iesu mul en out netan, mum houlu ral min Siu keil. Ka Mak mul rie lati keke Iesu va mum ral min koakeil emun arvitei Siu.j Mak mutisi emun keke Iesu meng kat meatin keil onen keke ika vasi out ka ihitehiten more longlongien min meatin vasi keil ten out netan keke ikur moulien hau heka ien.k
Mari rendemien tai ten selusien koanik mul en Mak 10:45 koa Iesu viteni vit,
“Natin Meatin romaitei keke meatin keil avakatauni. Vuo, kei mai vakataun meatin vasi, ka vasan moulien onen vahul lat keil ran keihoen ten tisaen.”
?Asa mul en selusien koanik?
1. Tounah koa sak mesein Iesu keke voumon umen onen. (1:1-13)
2. Selusien ka umen onen Iesu. (1:14–13:37)
a. Iesu mum en out keil en provins ten out Kaleli. (1:14–7:23)
b. Iesu mum en out savsav keil. (7:24–10:52)
c. Iesu mum en taon ten out Serusalem. (11:1–13:37)
3. Iesu mat ka moul eris ran matien. (14:1–16:20)