1 เฌาพรา ปี วี ต็อห, “ฆางหราว มูห มาลาง โอว. กาดาย บอ มูห กาโช็ง โดง เบลห โอว เปลา โอว. เซ เบ ดี โบง กาง โอว, ดี เหมา เบ ดี ซัม? ดี เหมา เบ ดี แตห โอว ดีเหลา?

2 แคะ มึห โตต ดอน โมยว, อึณ มูห โอว อี โบง. โอว บอ อึง เฆ อี มึห น็อห โฆม น็อห เตียม, บอ เฆ อี กาปลูะ น็อห, อี โยว โอว บอ โทม โฆรห โอว.

3 อาเซ ง็อห ยัม มามัก, แฮะ ปี อัน ง็อห ยัม ดูอี. อาเซ ดึห หลู ฆอน มาบู, แฮะ ปี อัน แดบ ฆีณ มาโซว. อาเซ ดึห หลู แบน โมยว แบน โมยว, อึณ บอ ปี ดูอี อี หลู หนาม มาเลต. อาเซ ดึห กาณัน เลโบน โดะ แคง เงา, อึณ บอ ปี ดูอี อี ม็องการา ดัว ดี อารึบ ราง. ดูอี เฆ ตี, เฆ แฮะ ร็อห ดี โดบ ปี อึง เฆ. น็อห เฆ บอ โบยว บอ อึง ดี โดบ อี หมึอม กาอีห แบน โมยว แบน โมยว.

4 ปาย ตี โอว มืร ดี ปี วาณาก ดี เฆ, แตห เฆ คัม แคะ ปี โบง เฆ ดอน โมยว. โอว ดี โบง ปาย ตี โคว, ดอ แดะ โอว ดี เฆ, อาว มึห อาเซ อี อึร โฆรห โอว. ดอ กาลาง โอว โฆรห, อาว มึห อี โทม คอ อู วี. เฆ ดืน ตู โทม โฆรห โอว. เฆ บอ วี โบง อี ตู ล็อะ น็อห โอว.”

5 อึย เบ อี แฮะ ดีเยณ ดี โยว โกบ โฆรห เฌาพรา. แตห เบ โทม เฌาพรา แฮะ ต็อห, “โกบ แฮะ หณึม เบ ดี โอว, เฆ บีนอง วอแว เบ วี ฌ็อง เบ บอ โฮว เตา เบ. เฆ บอ วี แนนัะ เบ ต็อห, ‘แตห เฌาพรา บยัะ อาพูง ดังโคว อัน.’ เฆ ปี บอ ต็อห ปาย ตี มืร, เฆ ยี ดี โลว ซาย อี. อี มูห เบ, อัน เฌา ดี แตห เบ โคย ดาคึย.

6 แตห เบ โทม ฆรัณ อี ซีนัน ซีนืง แคง มืง อี เลห ตัห โดง กอย โฮว เฌาพรา. อึณ บอ มูห ฆรัณ เฌาพรา โกบ แฮะ โบง เวียะ อัน ดี รันซู อัน.

7 มืง ตี แฮะ ปี อีบึณ อี ฆึอด ฆอน ดอ เหมา ดอ อัน. อาต คัม อัน วัต เซา, ฆอน แฮะ ฮอต ฆึอด.

8 อาเซ แฮะ ดึอม ยึร ลอง อัน ตี? มืง กามาย ตู นับ ดี โบว แบน กานัร อู ซีแง. บอ อาโมยว ดูอี อี กามาย ตู ปึอน โบว แบน ดอ เหมา ดอ อัน. อี มูห มืง ฌีโอน, อึณ ยี ปี อีบึณ อี ตู โลว คัม เหลณ เซา ดี ฆอน. อัน ปึอน ฆึอด ดอ เหมา ดอ อัน.”

9 เฌาพรา ปี วี ต็อห, “เซ โอว แตห อึณ มึห อีบึณ อี กาตัด ดี ฆึอด ฆอน, โอว ดี บอ จอย แตห อัน ฆึอด. เซ อึณ มึห อีบึณ อี ตู อัห, โอว ตู แคร อัน ฆึอด.”

10 อึย เบ อี ร็อก มืง เยรูซาแลม, แตห เบ โบยว ดาคึย โกบ มืง ตี. แตห เบ โบยว ดาคึย โดบ เฆ อี กอย แคง มืง ตี. เบ อี มึห น็อห กลึร น็อห ลึร โกบ เฆ, แตห เบ วี โคย ดาคึย ดอ ตี นี.

11 เบ ดี บอ ปึอน ดี โบยว ดาคึย ปี ฆอน ดีแตด อี แฮะ แพ ปู. เฆ ดี ฆยามซา โกบ แฮะ วี มึห เฌะฌูง เบ ดอน โมยว.”

12 โคว, เฌาพรา แฮะ ฮอต ดึอม กาลาง อูน ต็อห, “โอว ดี แตห เบ กอย ฆัด เฆียด, แตห อึณ ปี อึม แบลง อี แหล เซเซ. เบ ดี บอ ปึอน แคะ กอย โกรวกราม เฆ ดูอี อาโมยว เฮา, แตห อึณ ปี อึม แบลง อี ตู ฮีด ดอ เหมา. เบ ดี บอ ปี ฆอน ดีแตด ปี ยอด ลึมลา ซีคยา มา อัน. อึณ ปี มา อัน ดี บอ โจะ เงียะ อัน, บอ เบลห อัน แดง บึม, วี ดีลาว ดี อัน.

13 โอว ดี วี เหลา น็อห เฆ, ปี มา นับ ดี เหลา ฆอน อัน. ปาย ตี น็อห เบ ดี บอ ดาคึย ฆยามซา ดอ กอย เบ แคง มืง เยรูซาแลม.

14 เซ อึณ โบว แบน ปาย ตี, น็อห เบ มืร ดี บอ ดาคึย กาเซา. เบ ดี บอ วี มึห โปลม มึห แฮณ ปี เปต อึณจัม. ดอ อัน ตี เฆ ดูอี ปี ซูต ปี จัร เฌาพรา เฆ ดี บอ วี นับ ลอง ปี โบง เฌาพรา ดอน โมยว. เฆ อี มูห รันซู เฌาพรา, เฆ ยี นับ แคะ รู เฌาพรา.”

15 เซ เฌาพรา ฮี ตัห, อึณ ดี บอ มึห เงา ตัห โดบ อัน. อัน เฌา ดี บอ ป็อะ ลักเลา, แตห อึณ ปี คูน ลาง ตัห, แตห อัน ปึอน ดี บยัะ แคะ รู อัน. แปละ เงา อัน มืร ตัห, แตห อัน ปึอน ดี มาโนว กาเซา อี.

16 เฌาพรา ดี โฆ็ง ตัห เงา เฆ มาปัวะ ลาง อัน, ดัม หมาบ ดี ดูอี บอกาเฆลียด. เฆ ดูอี ปี ง็อห ยัม อัน แฮะ กืน กาเซา.

17 เฌาพรา วี ต็อห, “แฮะ ฮอต ฌัม อาคราว ดี ลึร ชึม เฆ ดูอี อี โบง แตห โดว เฆ ซีงา อาดา เฌาพรา ปี กรึบ อี เฮา. บอ เฆ อี โบง แตห โดว เฆ ซีงา แคง กาปึม บอ โดบ ดี ปัน ดูอี อู วี กาแต เฆ, บอ เฆ อี โฮม ยัง มาเลต เฆ ยัง มาหนาย บอ โฮม บอ เดียง อี หมึอม กาอีห แบน โมยว แบน โมยว, เฆ อี โบง ฌึร ตี ดอน โมยว, เฆ ดี ลึร ชึม โตต.

18 โคว, โอว แฮะ ฮอต นับ ปี คราม เฆ บอ ปี โบง เฆ. โอว ดี ตัห แดะ กาฌูะ ดูอี บอกาเฆลียด บอ ดูอี อี กาลาง โฆรห ดอน โมยว. ดอ กาโดบ ตัห เฆ ตี, เฆ ดี บอ ยึร ปี ปาย อาพูง ดังโคว โอว.

19 มาแล, โอว ดี บอ ดึห เฆ มัง อี, อี แฮะ ลอด, วี จัร เฆ ฮาว โดง กอย ดูอี อาโมยว เฮา, แตห เฆ ฮาว บอ แคง มืง ทาซีด, มืง บูลัะ, มืง ลูด อี มูห โดง กอย เฆ ดูอี อี นับ ดี บัณ อัะ, บอ ดี มืง อาเมเซด ฆาย มืง โรด, มืง ทูบา ฆาย มืง ยาว บอ ดี เฆ ดูอี อี กอย แคง ฆูน อึม อี ตู ดึอม ยึร ลอง โอว, บอ ตู ดึอม ยึร แคะ ตาง อาพูง ดังโคว โอว. เฆ ดูอี ปี จัร โอว ตี, เฆ ดี บอ กาลาง ลอง อาพูง ดังโคว โอว กาแต เฆ ดูอี อาโมยว เฮา ตี.

20 เฆ ดี บอ วี ดึห ตัห บีนอง วอแว เบ อี กอย แคง มืง เฆ ตี, แตห เฆ ตัห ฌัม ดี นอน โอว อี บอด, แตห เฆ แบน ปี ปี ดี หลู ดี โอว. เฆ ดี บอ วี ดึห ตัห บีนอง วอแว เบ ตี, แตห เฆ ป็อะ มังปร็อง บอ ลักเลา แบน โมยว แบน โมยว, มา มาโลว เฆ มังปร็อง กาฮาต. เฆ ดี บอ ดึห ตัห เฆ ตี โดง กอย เฌาพรา ปี เฆ ดูอี อีซาเรลัะ ดึห ตัห ปี ดี หลู เฆ แคง ซีลัยะ อี ซีงา บอด, วี ฮาว โดง กอย โฮว เฌาพรา. 21 โอว ดี บอ ดึห ดูอี กาแต เบ ตี มัง อี, แตห เฆ แบน ดา อี หลู ดี เฌาพรา บอ โบง ฆาน แคง โฮว เฌาพรา ปี เฆ ดูอี อาเลวี.

22 โอว ดี แตห ดูอี อาโมยว เบ บอ จืร เบ กอย เซเซ. ปาย ตี โอว ดี บอ แตห ฆางหราว กามาย บอ กาดาย กามาย กอย มัน ซีคยา เซเซ.”

23 เฌาพรา ปี วี ต็อห, “ซีแง บลอย มาเฆียน กามาย ดอน ซีแง, บอ ซีแง ดีเหลา ดอน ซีแง, เฆ ดูอี บอกาเฆลียด ดี บอ ตัห กรึบ โอว.”

24 ดอ วี เลห เวณ เฆ, เฆ ดี บอ ยึร โดว ยัม เฆ ดูอี อี กาบัห ดี โอว. มังปรัต อี โฮม ยัง ดูอี, เฆ ตู ยัม ดอ เหมา. บอ เงา อี แตห ดูอี คัม ดูก ตาง, อาว ปึอน บยัด. เซ ฮี ยึร ปี ปาย เฆ ตี, อึณ บอ แบน หมึอม กาอีห กาเซา ดี ดูอี บอกาเฆลียด.