1 เฌาพรา วี กาลาง ดี เฆ ดูอี ปี อึบ อัน ต็อห, “แตห เบ โบง โดบ ดารา, แตห อึณ ซืร ซืร หมาน หมาน. โคว, โอว มืร ดี เจว ตัห คยอด เบ. แตห อึณ บอ ลึห ลอง น็อห ซืร น็อห หมาน โอว.

2 โอว ดี ม็องการา ดัว ดี ดูอี อี โบง ปาย ตี. โอว ดี ม็องการา ดัว บอ ดี ฆอน เฆ อี กัม ซีแง ดีเหลา, บอ เฆ อี ตู โบง กาลึบ โบง บลืง ซีแง ดีเหลา ตี. โอว ดี ม็องการา ดัว บอ ดี เฆ อี ตู โบง นา ตู หมึอม.”

3 บอ เฆ ดูอี อาโมยว เฮา อี แฮะ หณึม เฌาพรา, เฆ มืร อาว ฮู มึห ดี ต็อห, “เฌาพรา ตู แตห เย ปึอน ดี กรึบ โดบ เฆ ดูอี ปี อึบ อัน.” บอ เฆ ดูอี ซัห, อาว ฮู ปึอน ต็อห, “โอว แฮะ ปี เฮ กาฮ็อห.”

4 เฌาพรา บอ วี กาลาง ดี เฆ ดูอี ซัห อี กัม ซีแง ดีเหลา บอ โบง ปี อึง อัน อี ล็อะ น็อห อัน บอ หณึม ซีคยา กาดีก ซัดฌา ปี ดัว อัน ดี เฆ.

5 อัน ต็อห, “แคง โฮว โอว, โอว ดี ดัว แตห เบ มึห โดง ดี โหลห อี ดี เบ เซเซ, แตห เฆ โหลห เบ หลึอม เฆ ดูอี อี มึห ฆอน อีบึณ บอ ฆอน อีมาย บอกาเฆลียด. แตห เบ ปึอน ดี ลึบ แคง แวง โฮว โอว, โอว ดี แตห อี โหลห เบ เซเซ, ตู แตห อึณ หราย ดอ เหมา.”

6 เฌาพรา ปี วี กาลาง บอ ดี เฆ ดูอี อาโมยว เฮา อี หณึม บึง เฌาพรา บอ แบน แดเจณ อัน, เฆ อี ร็อก อัน, อี กรึบ อัน, อี หณึม ซีคยา กาดีก ซัดฌา ปี ดัว อัน ดี เฆ.

7 อัน ต็อห, “โอว ดี วี ดึห ตัห เบ ดี นอน อี ซีงา บอด, อี มูห โดง กอย โอว. โอว ดี แตห เบ โบยว ดาคึย ดอ กอย เบ แคง กาง โอว, อี มูห โดง ซาคึร อี. โอว มืร ดี ดึห ปี หลู เบ ปี เบลห เบ แดง กาโช็ง หลู. กาง โดง กอย โอว, เฆ ดี บอ ต็อห แฮะ มูห กาง โดง ตัห ซาคึร ดูอี ดอน โมยว, ดอน ครึร ดี เฌาพรา.” 8 เฌาพรา อี อึบ ดอน โมยว, อี วี แดะ กาฌูะ เฆ ดูอี อีซาเรลัะ แปะ แฮะ เหมต ฮาว อี, อัน ต็อห, “โอว ดี วี ดึห ดูอี ดอน ฌึร ดอน ครึร, แตห เฆ วี ตัห กอย กาแต เฆ ดูอี ปี อึบ โอว, อี แฮะ ฮอต ตัห กาฌูะ.”

9 เฌาพรา ปี วี กาลาง ดี เฆ ดูอี อาโมยว เฮา ต็อห, “แตห เบ วี ตัห, แตห เบ ปี มาโดว แปร อี ฮาย, แตห เบ ตัห ก็อะ ยัม โตต เฆ ดูอี ปี อึบ โอว.

10 งาย เฆ อี บัร มืง อีซาเรลัะ แฮะ อับ. เฆ แฮะ ปี มาโซว อี ตู นับ ดี โปรห. เฆ บอ อีด ดอน นา ดอน โปละ บอ อีด อึณบาว.

11 เฆ บอ ปี มาโซว อี กาปราณ กาเซา โบม. เฆ บอ โฮม มืร ยี ตู นับ ดี แพ. ดา ตาง เฆ ตี, เฆ บอ ปี ดูอี อี เฮียง มาบู, เฆ ยี ตู นับ มาเซ. เฆ บอกาเฆลียด บอ โบง โดบ ปี อึง เฆ, แตห อึณ แบน อาฆยึร ดี โดว บรีม เฆ ราง อาเซ ราง อัน.

12 เฆ บอ ยึต ป็อห, บอ นับ ดี ต็อห, ‘ตัห, แตห เอ เดียง ป็อห. แตห เอ เดียง แพ แพ. แคหณา อึณ ดี เกยา ปี อาตึร นี. อึณ ดี บอ เกยา หลึอม ตี.’”