1 เฌาพรา วี ต็อห, “อึย แม อีบึณ อี ตู นับ ดี มึห ฆอน, แตห แม โคย ดาคึย. แม อี ตู ดึอม มึห เซา ดี ฆอน, แตห แม ต็อห โหมว ตาง ตาง. โคว, อีบึณ อี ตู มึห อีมาย, อัน ดี วี มึห ฆอน กืน หลึอม อีบึณ อี มึห อีมาย.”

2 แตห เบ ปีเลห ปีว็อห แวง ทึบ บีก เบ, แตห อึณ ตาง. แตห เบ กาโทะ บอ บีก ฆ็อง, แตห โดง กอย เบ กาว็อห, แกวะ แตห อึณ กาเคียะ. บอ วัน ทึบ เบ, แตห เบ ปีโต็ง. บอ หล็อก ปี ดอก เบ, แตห อึณ รีด, แตห อึณ มัน ซีคยา.

3 โคว, เบ ปึอน ดี ปีว็อห ปีเลห กาอูน กาดาย เบ ดอน บลาก. เฆ หลูกหลาน เบ ดี วี ปึอน ดี ดึห กาดาย แปะ แฮะ อึบ เฆ ดูอี อาโมยว เฮา, แตห อึณ วี แบน คาฆูน เฆ. มืง ตาง อี แฮะ ราม อี ตู มึห ดูอี กอย นา แคง, เฆ ดี วี มึห ดูอี กืน ตัห กอย กอ โนะ.

4 แกวะ แตห เบ โยว, เบ อาว ฮู โลว ซาย อี, อาว ฮู โลว ปี กาฟัร กาเฟียน น็อห เบ. เบ อาว ฮู โจห เตียม. เบ ดี วี ปีว อี หมึอม ซาย แปะ แฮะ โบง เบ ดอ ซี หนึม เบ ตึอน. เบ อาว ฮู มึห น็อห เตียะ น็อห ดีแตด โกบ ปี เบ ยา ซีปรัห อี กอย ราง อัน.

5 โคว, อัน เฌา อี พาน เบลห แม, อัน แฮะ ปี อีมาย แม. อัน บอ จืร เฌาพรา อี อึบ โตต ดอน โมยว. เฆ อี เฮา บอ ต็อห, เฌาพรา อี ซีงา บอด อี มูห เฌาพรา ปี กรึบ ดูอี อีซาเรลัะ อี แฮะ ทูด เลห เฆ, อัน บอ จืร “เฌาพรา อี อึบ โตต แดง กาดาย นี.”

6 อึย เบ ดูอี อีซาเรลัะ, เบ แฮะ ปี อีบึณ ปี แวน อีมาย อัน ซีณ ดอ ซี หนึม อัน. อึณ บอ แบน น็อห ลึร น็อห เตียะ ดี เบ. มาแล, เฌาพรา แฮะ วี แดะ เบ วี ตัห โดง กอย อัน. อัน ต็อห,

7 “โอว แวน เบ มี อาดา อู กาจัน. โอว ดี วี ดึห วีว เบ โกบ มึห โอว น็อห ร็อก กาเว กาเซา.

8 โกบ แฮะ รู กาเซา โอว, โอว แฮะ เบลห แวน เบ อาดา อู กาจัน. โอว ยี มึห น็อห ร็อก น็อห เมตดา, แตห โอว วี กาเว เบ เซเซ.” เฌาพรา อี แฮะ ทูด เลห เบ, อัน แฮะ กาลาง อูน ปาย ตี.

9 เฌาพรา วี ต็อห, “ดอ อัน ตี, อึณ ปี ดอ แฮะ อึณปูน อึม โจว บาน อาโนว ตึอน. โอว แฮะ ดืง แฮะ กาแซณ ต็อห, วาย นี อึม อาว ฮู อึณปูน กาดาย ปอ อู เฌณ. ปาย ตี โอว ปี วี ดืง กาแซณ ต็อห, โอว อาว ฮู ปีรู ปีจาว ดี เบ. โอว อาว ฮู มาโนว กาเซา เบ.

10 นอน ดี ตาง ปี บอ กาโทะ มืร, นอน ดีแตด ปี บอ ดียูห ดีเยณ มืร, น็อห เมตดา โอว ยี ตู โตต ตู หราย ดอ เหมา. บอ กาดีก ซัดฌา แปะ แฮะ ดัว โอว ดี เบ, อี แตห น็อห เบ ฆัด เฆียด, อึณ ตู กาดัด ดอ เหมา.” เฌาพรา อี มึห น็อห ร็อก กาเว แฮะ กาลาง อูน ปาย ตี.

11 เฌาพรา ปี วี ต็อห, “อึย เบ ดูอี มืง เยรูซาแลม, เบ แฮะ ดึอม คัม ดูก ตาง กาเซา ปี คูน ตาง อี แฮะ แตห เบ ดียูห ดีเยณ. อึณ มืร ตู มึห อี จอย เบ. ดอ ตี นี โอว ยี วี ดึห แซณ อี ชีด, แตห อึณ แบน ดัง มืง เบ. โอว ดี ดึห บอ แซณ เงียน, แตห อึณ แบน ดัง ร็อง.

12 โอว ดี ดึห แซณ ดีปูน เบลห ดี โฮว จา เบ. โอว ดี ดึห แซณ เรณ ว็อง โบง แบน มาโลห เบ. โอว ดี ดึห บอ แซณ แบน โมยว แบน โมยว อี บอด โบง แตห อึณ แบน แรง มืง.

13 บอ หลูกหลาน เบ ดี แบน ดีแบ เฌาพรา. เฆ ดี บอ มึห น็อห ฆัด เฆียด บอ น็อห ดาคึย.

14 เบ ดี โดบ ดารา อี ซืร ซืร หมาน หมาน, อี การัม. เบ มืร ดี บอ ลอด คัม ปี คาหนาบ อี เฮา, อาว มึห ดี โลว โยว มาเซ.

15 เซ อึณ ยี มึห อี กาโฆห ดี เบ, อาว มูห ปี ควาง โอว. อาเซ กาโฆห ดี เบ, อัน ดี ชึม.

16 โอว แฮะ พาน เบลห ดูอี จึม ฮีน, แตห อัน ยูะ บียูะ อัน, จึม ครึง กาโฆห. โอว แฮะ แตห อึณ มึห บอ ดา ซึก อี โฆ็ง ครึง กาโฆห, แตห เฆ บัร ดี ง็อห รันซู.

17 มาแล, ครึง กาโฆห อี ดี วี กาโฆห ดี เบ, อึณ ตู ออง ดอ เหมา. ดอน อี อี แนนัะ เบ, เบ ดี โลว ดัม หมาบ ดี อัน. โอว ดี โบง ปาย ตี ดี เฆ ดูอี ปี ซูต ปี จัร โอว, แตห เฆ ออง รันซู เฆ.” เฌาพรา แฮะ กาลาง อูน ปาย ตี.