เฌาพรา บอ อึบ น็อห คูนดีคัม ปี อัน อึบ แบลง อึม. เฌาพรา แตห อึณ ฮาว โดบ ปี อึง อัน.

2 ดูอี ทาง ปี โบง เฆ แฮะ มูห แฮะ หมาน. มาแล, อึณ มูห เฌาพรา อี ยอด น็อห เฆ. อัน ดี ซูงพยาด โยว แฮะ หมาน อาว หมาน.

3 เซ แม โดบ ดารา เฌาพรา บอ โบง ซืร ซืร หมาน หมาน ดี อี, อึณ บอ ล็อะ กาเซา น็อห เฌาพรา. อึณ หมึอม หลึอม ปี หลู แม.

4 ปี โบง เฆ ดูอี ฮาย, อึณ โดบ น็อห ปีพูง, น็อห ปีคึก เฆ. อึณ บอ มูห หมาบ ดีโลย.

5 เซ ดูอี โบง นังฆัน, ปี คราม อัน ดี โบง, อึณ ดี แตห อัน มึห ดี โฮม ลึง ตา ลึง. เซ อัน ยี โบง แฮ แฮ, แตห อึณ เจว ฮอต, อาว ฆลึม โฮม ฆลึม ตา ดอ เหมา.

6 โกรวกราม ปี กาโลว แม ดี ดึห ตัห, อึณ ดี บอ เจว หราย. อึณ ปี อึณอูะ อี ตู กอย เหลณ. อึณ บอ ปี ยอต ปี ดีณ อี, แตห โดว ซัด เคร ยัม.

7 ดูก ปี ดัว ดูอี ฮาย ดี อี เฮา, อึณ ดี วี แตห เฆ ชึม. โคว, เฆ แฮะ แวน นา มูห นา หมาน.

8 เฆ อี โบง นา จีจีว, เฆ ดี บอ โดบ อึณเตณ โฆะ แฆะ. เฆ อี มึห น็อห ลูย, เฆ ดี บอ โบง นา มูห นา หมาน.

9 กอย แคง ทึบ, อึณ บอ หมึอม หลึอม กอย รึม แคง กาง โดบ อีบึณ ซีมา ปึณ ซีมา เอห.

10 ดูอี ฮาย, อัน ซี โบง มี อี ตู บอด อี ตู หมึอม. อัน มืร ตู นับ ดี กาเว ฆึก อัน.

11 ดูอี อี กาณัห อี บอ พยาก อี, อัน โลว คัม หมาบ อัน, อึณ ดี แตห ดูอี รึร นับ ดี ซาดีก. อึณ ยี มูห ดูอี อี มึห อางยาน, อัน ดี บอ นับ ดี เฮน ปี มาโนว อี เฮา ดี อัน, แตห อัน แว นับ กาปัว.

12 ดูอี อี มึห น็อห ซืร น็อห หมาน, อัน ยอด ปี ปาย เฆ อี กอย แคง กาง ดูอี ฮาย. อัน ดี บอ แตห เฆ ชึม.

13 เซ แม ปีกาอาว โหยะ แม, ตู โทม โฆรห ดูอี ฆีน, โฆรห ปี แดะ แม มืร, อาว มึห อี ย็อห คอ อู วี.

14 เซ ดูอี แฮะ รู กาเซา ดี แม, ลักซอง ปี ปรา แม ดี ดัว, อึณ แป ปีหนีม น็อห อัน. ปี เครียง แม ดี ดัว, อึณ แตห รู อัน หราย.

15 เซ ดูอี ซูงพยาด โดบ ดารา, อึณ บอ แบน น็อห ดาคึย ดี เฆ อี มึห น็อห ซืร น็อห หมาน. เฆ อี ตู หมึอม ยี แบน น็อห โยว กาเซา.

16 ดูอี อี ตู โดบ อางยาน บอด, อึณ ปี อัน ฮาว โดง กอย เฆ ดูอี ยัม.

17 ดูอี อี อึง แตห อึณ เกยา เซเซ, โบง มี ปี อึง อัน, อัน ดี แกร ดี ฆีน. อาเซ อึง ดี เดียง ป็อห บอ โฮม ซีแงห เซเซ, อัน ดี พลาน, ตู รัม.

18 เฆ ดูอี ฮาย โลว วี คัม ดูก กาดาง ดูอี อี มึห น็อห บอด น็อห หมึอม. บอ ดูอี อี ตู ปึอน หณึม โลว คัม ดูก กาดาง ดูอี อี โบง นา หมึอม.

19 กอย แคง แปร กาฮ็อห, อึณ หมึอม หลึอม กอย รึม โดบ อีบึณ ซีมา ปึณ ซีมา เอห.

20 โกรว อี ง็อห ตาง, แฮะ โนะ แคง กาง ดูอี อี มึห อางยาน. อี มูห ดูอี อี ตู มึห อางยาน, อัน ยี โบง แตห โกรวกราม อัน โตต ปีเยณ.

21 ดูอี อี โบง นา ซืร นา หมาน, บอ โบง นา หมึอม, อาซาก อัน ดี โต็ง. อี เฮา ดี โรวเซ อัน บอ โบง นา ซืร นา หมาน ดี อัน.

22 ดูอี อี มึห อางยาน, อัน นับ ดี กาโฆห บอ ปึอน มืง เฆ ดูอี อี มึห โปลม ตาง. อัน บอ ปึอน ดี ปยาต บอ แรง มืง อี มูห โดง บึง เฆ.

23 เซ แม ซาดีก โฆรห ปี กาลาง แม, ดูก ตู ตัห ฌัม แม.

24 ดูอี ปีคึก บอ ดูอี อี ซี แตห อี เฮา อืบ อัน, อี เฮา บอ ต็อห อัน จืร, “ดา อี ปัห กาบยาว ตาง.” อัน นับ มี ดี ลูกตาย อี เฮา, ตู นับ ดี โรวเซ เฆ.

25 ดูอี กราน ยี นับ ดี ซี ปึอน แบน โมยว แบน โมยว. น็อห อัน ตี ดี วี แตห อัน ยัม โกบ ยี ตู คัม อัน ดี ดึห แด อัน ดี ฌูะ ดี มาปัวะ.

26 เซเซ อัน บอ ซี ปึอน แบน โมยว แบน โมยว. อึณ ยี มูห ดูอี อี มึห น็อห ซืร น็อห หมาน, อัน ตู หลัยะ, อัน นับ ดี กาซาง ดัว ดี อี เฮา เซเซ.

27 เฌาพรา บอ กาอีห ปี หลู เฆ ดูอี ฮาย. แดง ตี, เซ เฆ ตัห หลู ดอ คราม เฆ ดี โบง อี ตู หมึอม, อัน บอ แว กาอีห หลึอม ตี.

28 อาเซ แบน ซักเซ กาลาง อี ตู หมาน, อัน โลว คัม หมาบ อัน. ดูอี อี นับ ดี โทม โฆรห อี, อัน ยี กาลาง นา หมาน เซเซ.

29 ดูอี ฮาย นับ ดี ณึงราง ปีกยัะ อัน. อี มูห ดูอี อี มึห น็อห บอด น็อห หมึอม, อัน นับ ดี กาพา ปี ดี โบง อัน.

30 ดูอี อี มึห อางยาน, บอ ดูอี อี กาหลูห ดี น็อห แบน โมยว แบน โมยว, อัน ตู กาแคณ ตู กาบัห ดี เฌาพรา.

31 ซีแง ดี กาโฆห อี ดี ดา ซึก, เฆ ปี บอ แฮะ ฮอต แรน อูน มังปร็อง เฆ, อึณ ยี มูห เฌาพรา อี แตห เฆ ออง.