ดูอี ฆีน อี มึห น็อห ซืร น็อห หมาน, อัน บอ หมึอม หลึอม ดูอี รึร อี กาโลว, กาลาง โฆรห โฆะ แฆะ.

2 ดูอี อี มึห น็อห ซี โบง แบน โมยว แบน โมยว, เซ อัน ยี ตู นับ มาเซ, อึณ ตู หมึอม ดี อัน. อาเซ ซี โบง แฮ แฮ ครัน ครัน, อัน นับ ดี กาลึบ.

3 ดูอี นับ ดี ชึม โกบ รึร อัน. แฮะ ฮอต, อัน ยี วี รู ดี เฌาพรา แคง น็อห อัน.

4 ดูอี ครัม ดี บอ มึห ฆึก กืน. อี มูห ดูอี ฆีน, ฆึก บรีม อัน มืร บอ นับ ดี เบลห แวน อัน.

5 เซ แม แบน ซักเซ, กาลาง โฆรห ตู หมาน ดอ ซูงพยาด อี อามู, แม โลว คัม หมาบ แม. อาเซ ซีมา กาโลว, อัน ตู ลอด อี ดัม หมาบ ดี อัน.

6 อึณ มึห ดูอี กืน อี ซี ปึอน ซาเร ดี อาต ดา กาณา เฆ. ดูอี ดอน อี บอ ซี แบน ฆึก ดูอี น็อห ดีฮาง.

7 เซ อึณ มูห ดูอี ฆีน, เฆ บีนอง อัน มืร วี ฌ็อง อัน. ฆึก อัน บอ แว วัห อัน. อัน ปี บอ วี เหรต ดี แดะ เฆ มืร, เฆ ตู แตห อัน ยึร เฆ.

8 ดูอี อี มึห อางยาน, อัน บอ ร็อก โดว บรีม อัน. เฆ อี ซี นับ แบน โมยว แบน โมยว, เฆ ดี แว มึห กืน.

9 ดอน อี อี กาลาง โฆรห ตู หมาน ดอ ซูงพยาด อี ดารา, อัน ดืน ดี โลว คัม หมาบ อัน. อาเซ ยี ซีมา กาโลว, อัน ดี ชึม.

10 ดูอี รึร ตู กาอาบ มึห โกรวกราม กืน กาเซา. แดง ตี, หมาย มืร ตู กาอาบ อึบ ฆอน ดา ตาง บอ ฆอน คูนดีคัม.

11 เซ แม นับ ดี กาพา บอ นับ ดี ซาดีก, แม ดี แป ดี โอด น็อห. เซ แม ยี ตู ดืน ปี โบง ลูต อี เฮา ดี แม, อึณ แตห แม มึห ซาเร.

12 น็อห รู คูนดีคัม, อึณ ปี มาครังซี เรียง. เฆฌู อัน ยี ปี อึม ดีงาน อี โจห แดง เปต เฆ แปร.

13 ฆอน อี รึร, อัน ดี แตห ฆูณ อัน ชึม. อีบึณ อี ซีมา ปึณ, อึณ บอ ปี อึม ฆลาย อี จอด ป็อก ป็อก.

14 กาง บอ โกรวกราม, อึณ บอ มูห คาฆูน ปี ดัว ฆูณ มา. อีบึณ อี มึห อางยาน, อีบึณ อี หมึอม, อึณ บอ มูห ปี ดัว เฌาพรา.

15 ดูอี กราน แบน ซี อีด เซเซ. ดูอี อี ตู โบง ฆาน, อัน ดี กาปราณ, ดี เอต โบม.

16 เซ แม โดบ ดารา, แม ดี บัร อาซาก แม. เซ แม ตู ซาดีก ปี โบง แม, แม ดี ยัม.

17 อาเซ กาเว ดูอี ฆีน, อึณ ปี อัน แฮะ ดัว เฌาพรา การ็อห. เฌาพรา ดี วี ดัว เวียะ อาฆยึร แปะ แฮะ โบง อัน.

18 แม โลว มาโนว ฆอน แม, ตา อึณเพียะ ดอ ซี ปึอน เฆ เฮน. เซ เฆ บอ ลึร, แกวะ แตห อึณ แบน หมาบ แม.

19 เซ ดูอี แฮะ รู กาเซา, อัน ดี โลว วี คัม หมาบ อัน. เซ แม ดี จอย แตห อัน ลอด, แม ดี โลว จอย ดอน เฌณ.

20 เซ แม โทม อากยาม อางยาน บอ โบง โดบ, อู ซีแง แม ดี วี แบน ดูอี อี มึห อางยาน.

21 ดูอี แฮะ ปึอน คราม ดี โบง แบน โมยว แบน โมยว. มาแล, อึณ มูห ปี อึง เฌาพรา อี ดี แบน.

22 ปี ซี ปึอน ดูอี, อึณ มูห น็อห ร็อก. ดูอี ฆีน แฮะ หมึอม หลึอม ดูอี อี ซีมา กาโลว.

23 เซ แม โรวเซ เฌาพรา, อึณ ดี แตห อาซาก แม โต็ง. อึณ ดี แตห แม ปึอน แคะ ปี โลว แม, ตู แตห อึณ มึห อาเพ อาเร ดี แม.

24 ดูอี อี กราน กาเซา, อัน กราน บอ ดี บาว โบม บลึบ แคง โมต อัน.

25 ดูอี ปีคึก โลว คัม อี มัห อัน, แตห ดูอี รึร วี นับ ดี ซาดีก. ดูอี อี มึห อางยาน, อัน นับ ดี เฮน ดอ มาโนว อี ดี อัน.

26 ดูอี อี โบง นา จาว ดี ฆูณ อัน, วี โฮว แตห บอ มา อัน เลห เรต กาง, อัน มูห ฆอน อี โบง แตห อึณ หมึอม ซาย.

27 อึย ฆอน โอว, เซ แม จู เฮน, อึณ ปี แม วัห โฆรห อี แตห แม มึห อางยาน.

28 ซักเซ อี กาลาง โฆรห ตู หมาน, อัน บอ วัห ดารา บอ กาณัห อี มูห อี หมาน. อัน อึง นา ตู หมึอม ปี อี บลึบ ปี ดี โฮม แคง โมต อัน, กอ ฮู ดัน ซีฆลาณ.

29 เฆ ดูอี ปีคึก, เฆ โลว คัม กาเซา หมาบ เฆ. บอ เฆ ดูอี รึร โลว คัม อึณเพียะ.