โฮม โบม ฮัวะ กาฮ็อห โดบ ดูอี อี กอย ดาคึย, อึณ หมึอม หลึอม โฮม โบม ซีแงห ยี กอย แคง กาง อี ลาย กาเอห.

2 หมาย อี มึห อางยาน, อัน บอ ปึอน ดี อึบ ฆอน ดา กาณา อัน อี โบง หมึอม ซาย. อัน บอ ปึอน คาฆูน อาดา อู วี ปี ฆอน ดา กาณา อัน.

3 รึอน เฆ ครีว โลว ฮับ แคง กาโละ, ดัง แคง เงา แตห อึณ แฌด. เซ อึณ ยี มูห น็อห ดูอี, เฌาพรา อี ดี แฌด ดี ยอด โยว อึณ หมาน ตู หมาน.

4 ดูอี ฮาย ดูอี มืก, อัน บอ โทม โฆรห เฆ อี ฮาย อี ตู หมึอม. ดูอี อี ซีมา กาโลว, อัน บอ โทม โฆรห เฆ อี โฆะ แฆะ.

5 เซ แม กาณัห ดูอี ฆีน ดูอี พลาน, อึณ บอ ปี แม แนนัะ เฌาพรา อี พาน เบลห อัน. เซ แม โคย โกบ แฮะ ดูก ดี อี, อึณ ดี แบน หมาบ ดี แม.

6 เซ ดูอี กัด มึห หลูกหลาน, อึณ ปี อัน แฮะ ชึบ มังฆึม. บอ ฆอน ดี น็อห ตาง ดี ฆูณ มา อัน.

7 ดา ตาง ปี โรวเซ อี เฮา, อัน ตู กาอาบ กาลาง โฆรห กาโลว. โฆรห ปีพูง อึณ ตู กาอาบ ดี ดูอี รึร.

8 เซ ดูอี ปรา ดี ดัว ลักซอง ดี อี, อึณ ปี แซณ บอด ดี อัน. อัน บอ ฮาว นา เหมา, แซณ ตี ดี แตห อัน ออง.

9 เซ แม ร็อก อี, แม ฆ็อห แวน แปะ แฮะ ลูต อี ดี แม. เซ แม ยี กาลาง เลห แปะ แฮะ ลูต อี เฮา, อึณ ปี แม โบง แตห อู ฆึก ลาย กาฆ็อห.

10 ปี กาลาง อี อู แด นับ ดี มาโนว กืน ดี ดูอี อี มึห อางยาน. เซ ยี ตา อึณเพียะ, มัห ดูอี รึร อาดา อู มาย็อห เฌณ, อึณ ตู แป ดี มาโนว อัน แคะ ตี.

11 ดูอี ฮาย บอ เหรต มี ดี แวน ปวน อี. อึณ ดี บอ โลว ดาลาม อี ตู นับ ดี กาเว อี, แตห อัน แป ดูอี ฮาย ตี.

12 เซ ดูอี เฮา แฮะ ดึห เตา ฆอน มาเฆรห, อาว หงึย กาตูณ มา อัน. อึณ ยี หมึอม หลึอม กาตูณ แม ดูอี รึร ดอ รู อัน.

13 เซ ดูอี ตู นับ ฆูง เฆฌู อี บอ วี เวียะ อี ตู มูห อี ตู หมึอม ดี อี, อัน ดี โลว วี คัม อี ตู บอด อี ตู หมึอม เซเซ.

14 ดอ กาจูห แม ดี กาเอห กาแทณ, อึณ บอ ปี แม บลูห โรงฟาย แตห อึณ หลูห, แตห อึณ ฌึอม. โคว, แตห แม วัห อี ตู เบระ ดี น็อห อาต กาเอห กาแทณ แม.

15 เซ อี ดัม หมาบ ดี ดูอี อี มึห น็อห ซืร, บอ วี เบลห ดูอี ตู หมึอม, เฌาพรา กาอีห กาเซา อา โมยว ตี.

16 เซ ดูอี รึร ดัว รึอน แตห อัน เฮน อางยาน, อาว มึห อาฆยึร โกบ ตู มึห อัน น็อห ซี เฮน บอ โกบ ตู นับ อัน มาเซ.

17 ฆึก นับ ดี ลาย ร็อก เซเซ. อู วอแว โลว ลาย จอย ดอ ฌัม เฆ ดูก.

18 ดูอี อี ตู มึห อางยาน, อัน นับ ดี กาแซณ บอ นับ ดี กีคัม ดี เวียะ นี ดาง อี เฮา.

19 ดูอี อี โบง นา ตู หมึอม, อัน บอ อึง ดี โบง หมาบ. เซ ดูอี ปีพูง อัน, อึณ บอ ปี อัน บาง อาเพ อาเร ตัห โดง กอย อัน.

20 ดูอี น็อห โฆะ น็อห แฆะ, อัน ตู ปึอน นา บอด นา หมึอม. ดูอี อี ซีมา พูก, อัน ดี ฌัม ดูก.

21 ฆอน อีมาย อี ตู มึห อางยาน บอ แบน ดูก แบน กลึร ดี ฆูณ อัน. ฆูณ อี มึห ฆอน รึร, น็อห อัน มืร ตู ดาคึย ดอ เหมา.

22 น็อห โคย น็อห กรึอม, อึณ ดี แตห อี กอย ดาคึย. น็อห ลึร น็อห กาปยาต แตห กาอาง อี กาฮ็อห.

23 ดูอี อี ตู โดบ ดารา, อัน บอ ปรา ดี ดึห ลักซอง อี เฮา, บอ วี ปยาต แวน ดารา อี หมาน.

24 เซ ดูอี มึห อางยาน บอด, อัน บอ คราม ดี โบง โดบ อางยาน ตี เซเซ. อี มูห เฆ ดูอี รึร, เฆ ยี ต็อห ดี เหรต อางยาน กอ ฌัม โดง ซืด กาดาย.

25 ฆอน อีมาย อี รึร บอ แบน ดูก แบน หณาบ ดี ฆูณ อัน. อึณ บอ แบน กลึร แบน เหงา ดี มา อัน.

26 อาว กาอาบ ดัม หมาบ ดี ดูอี โกบ มึห เฆ น็อห ซืร. อาว กาอาบ มัห ดา ตาง โกบ โบง อัน นา หมึอม.

27 เซ ดูอี นับ แบน โมยว แบน โมยว, อัน บอ นับ ดี ยืน โฆรห อัน. อาเซ นับ ปี ปาย แบน โมยว แบน โมยว, อัน ตู หงึย รู.

28 ดูอี ปี บอ มูห ดูอี รึร, เซ อัน กอย หนีม หนีม ตู โมต กืน, อี เฮา ดี บอ ต็อห, อัน มึห อางยาน. เซ อัน ตู ต็อห มาเซ, เฆ ดี ทาง อัน แฮะ หล็อก.