อึย ฆอน กาโณม โอว, แตห แม โทม โฆรห โอว, แตห แม โนว อูน โฆรห โอว แคง น็อห แม.

2 แตห แม โบง โดบ ปี ต็อห โอว, แตห แม มึห อาซาก. แตห แม บอ บัร ซีคยา ดารา โอว, แตห อึณ ปี แม ลึมลา งาย แม.

3 แตห แม โหลห เซเซ, แตห อึณ ปี ซีกานู อี แฮะ ชึบ ดี กานู แม. แตห อึณ ดึก ดี น็อห แม.

4 แตห แม ต็อห, อางยาน ปี อีกัด แม. แตห แม รีมาด อางยาน ตี ปี วอแว แม.

5 เซ แม โบง ปาย ตี, แม ดี ลอด ดี ยา มาลัม, อี โหมว ดี เกา อี, อี โหมว ดี กาลาง โฆรห.

6 โอว แฮะ ดึอม กอย แคง กาง โอว, ยอด ฮาว แคง มาโลห.

7 โอว บอ ยึร เฆ ฆอน อี ตู นับ มาเซ, เฆ กืน กอย ดี ตี. กาแต เฆ ตี, อึณ มึห กาโณม อู วี, อัน รึร กาเซา.

8 อัน บอ ฮาว โดบ อึณเตณ, ฌัม กาตัด ดี โฆะ อึณเตณ อี มูห โดง กอย ยา มาลัม. แฮะ ฮอต, อัน บอ ฮาว ซืร ดี กาง ยา มาลัม ตี.

9 ดอ อัน ตี แฮะ มูห บา ดี อับ. อาว ฮู บอ ลึห ซีคยา, แฮะ ราม อับ ว็อง.

10 อีบึณ ตึอน บอ เลห. อัน แฮะ ชึบ ครึง ยา มาลัม, ฮาว บัร ดี รวห, บัร ดี เกา กาโณม ตี.

11 อีบึณ ตี มืร ตู มึห ซาเร. อัน บอ ยัะ ฮาว โดบ อึณเตณ,

12 ฮาว บัร ดี โฆะ อึณเตณ. มัง เฌณ อัน บอ บัร กาแต อึณเตณ บอ แคง กาลัห.

13 อัน ฮี ยึร กาโณม ตึอน, อัน บอ เงียม บอ ปูต บอ อูห บอ ยอด ต็อง กาโณม ต็อห,

14 “อาตึร นี, โอว แฮะ แรน ดี หลู อี กอย กาฌูะ โฮม รึม. ยัง ยี ซี มึห. โอว แฮะ ฮอต ดัว กาดีก ซัดฌา, แฮะ โลว โบง โดบ กาดีก ซัดฌา ตี อาตึร นี.

15 โกบ ปาย ตี, โอว บอ บัร ดี รวห แม. ดอ ตี นี โอว แฮะ กาตูณ แม.

16 โอว แฮะ ฮอต ดัะ อูน อึณเบว บีก โคยว แดง กาโช็ง อีด โอว. อึณ บอ มูห บีก ปี จึห ตัห มืง แอฆึบ.

17 โอว แฮะ คร็อห บอ อึณกรึห อูห หงูน แดง ดีหน็อง โดง อีด โอว. อึณ มูห กาณัน เลโบน, บอ เดา อาโลว บอ แฆละ เฮ ซีนาโมน.

18 ตัห, แตห อาย กอย รึม อีด รึม, แตห อึณ กอ ฌัม แปร วัห. แตห อาย อีด ลาย เงียม, ลาย ร็อก, แตห อึณ เกยา.

19 อีมาย โอว มืร ตู กอย, อัน แฮะ ฮาว เรา โต็ง.

20 อัน แฮะ ดึห ดี โฆ็ง ฮู รึอน. มาเฆียน ฮี กาลัง อัน กอ ดี วี ตัห ฌัม ดี กาง นี.”

21 อีบึณ ตี บอ นับ ดี กาลาง โฆรห ดาคึย หมึอม โทม, ว็อกแวณ เกา กาโณม ตี.

22 อัน บอ โดบ อีบึณ ตี อู เฌณ. อัน บอ ปี มามัก ปี ตึณ ฮาว อี ดี ง็อห. อัน บอ ปี มาฌัะ อี แฮะ เคร ยอต,

23 แตห บลา อัะ กาหลัน ฌัม กาโดม อัน. อัน บอ ปี มาซีม อี แฮะ ลึบ แคง ยอต, ยี ตู นับ, อัน แฮะ ฌัม โดง ดี ยัม อัน.

24 โคว อัน ตี แตห เบ ฆอน กาโณม โอว โทม โฆรห โอว. แตห เบ บอ โนว ปี กาลาง อูน โอว.

25 แกวะ แตห อีบึณ ฌึร ตี ปึอน ดี เกา เบ. อาว โลว ฮาว แล ฮาว วีน กาง อัน.

26 โคว, อัน แฮะ โบง แตห อีมาย ลึร ชึม กืน กาเซา. อีมาย แปะ แฮะ แป อัน ดี เกา แฮะ แบน พึง กืน.

27 อึณ ปี กาง อัน กอย โดบ อึณเตณ อี ฮาว ฌัม มืง มารานัะ, อี โลง โดง กอย เฆ ดูอี ยัม.