1-2 อึย ฆอน กาโณม โอว, แตห แม โทม อางยาน โอว. แตห แม โทม โฆรห โอว ลอง ปี ปาย แบน โมยว แบน โมยว, แตห แม นับ ดี กาย็อห อี หมึอม ตู หมึอม, แตห แม นับ ปี ดี โลว กาลาง แม.

3 โคว, โฆรห อีบึณ ฮาย, อึณ บอ งาม ปี งาม มาเพียน. อึณ บอ หมึอม โทม ปี ฮัม เวา.

4 มาแล, ดี กาแดะ อัน ยี ซ็อง ปี ซีฆราม ซ็อง. อึณ บอ ลัม ปี มาปัวะ ลาง อี มึห บลา อา บลาก.

5 อึณ ปี เปลา อัน ฮาว โดง กอย บาเรว ดูอี ยัม. อึณ ปี อัน นับ ดี แยต แม โลง มืง มารานัะ.

6 อัน ยี ตู กาพา ซีคยา ลอง อาซาก อัน. อัน บอ กาปลูะ ฮีด, กาปลูะ อาฆยาง อัน แบน โมยว แบน โมยว, ยี ตู นับ โดว อัน.

7 โคว, แตห เบ ฆอน โอว ดอน อี โทม โฆรห โอว. แกวะ แตห เบ บลืง โฆรห ปี กาลาง โอว.

8 แตห เบ เตา โต็ง โต็ง ดี อีบึณ ฌึร ตี. แกวะ แตห เบ ฮาว เครียะ กาง อัน.

9 เซ เบ ตู โบง ปาย ตี, อึณ ปี เบ ควาง อี เฮา โบง แตห เบ ชึม ซาเร. อึณ บอ ปี เบ ควาง ดูอี ฮาย กาเซา, อี ตู นับ ดี กาเว อี, แตห เฆ อึบ อาซาก เบ.

10 อึณ บอ แตห เฆ ดูอี อี ตู มูห ดูอี อาโมยว เบ ปึอน โตต โกรวกราม เบ. โกรว แปะ แฮะ เหรต ตัห เบ, ดี วี แบน โกรว อี เฮา.

11 ฮี ฌัม ปัน ดี โตต อาซาก แม, โดว โบ็ง แม ฮี ลึร, แม ดี วี หงูน โกบ ดูก ปี คัม แม.

12 ปัน ตี แม ดี วี ต็อห, “โอว แฮะ ฌ็อง ปี มาโนว อี. โอว มืร แฮะ แวน ปี มาโนว อี ดี โอว.

13 โอว มืร ตู โทม โฆรห ปี ต็อห ดา ซารา โอว, ตู ดึห ดี โทม ปี มาโนว อี ดี โอว.

14 โคว, โอว แฮะ รีน ดี ชึม โตต, แตห ดอน อี ปึอน ดี ยึร ดอ แฮะ ตัห กอย กาฌูะ เฆ.”

15 แตห แม มึห น็อห ซืร ดี อีบึณ บรีม แม. แตห แม ร็อก มี อัน อู วี.

16 แกวะ แตห แม มึห ฆอน ดี อีบึณ ปอ อู วี.

17 แกวะ แตห โปลม แม ชึม ดี อีบึณ วี เฮา ดอ เหมา.

18 แตห เฌาพรา ม็องการา แตห ดี อึณโฮม แม. แตห แม ดาคึย ดี โดบ อีบึณ แปะ แฮะ ดึห แม ซีณ ดอ หนึม แม.

19 แตห อัน ปี มาฌัะ โดว มา อี หมึอม ร็อก, แตห อึณ บอ ปี มังเฆียห โดว มา อี ชีด กาเซา. แตห ปู อัน ล็อะ น็อห แม ดอน หมึร ดอน หณา. แตห แม กอย รึม บอ ร็อก อัน เซเซ.

20 อึย ฆอน กาโณม โอว, เหมา อึณ ปาย ปี ซี กอย รึม แม โดบ ยา มาลัม, บอ ซี เงียม อีบึณ อี เฮา?

21 โคว, เฌาพรา ยึร โตต ปี โบง เอ ดูอี. อัน บอ บัร ดี งึอบ โตต ดอน โมยว.

22 เซ อึณ มึห ดูอี มืก, หมาบ ปี โบง อัน ดี วี เหมต อัน. อึณ ปี, หมาบ อัน ตี ดี วี แบน วัน อี ปัก อัน.

23 อัน ดี บอ ยัม โกบ ตู แป อัน ดี อึบ โดว บรีม อัน. อัน กาลึบ โกบ โดบ อัน น็อห อัน อี รึร กาเซา.