อึย ฆอน กาโณม โอว, แกวะ แตห แม ปีว โฆรห ปี มาโนว โอว. แตห แม โหลห เซเซ ปี จัร โอว แม โบง.

2 โฆรห โอว ตี ดี แตห อาซาก แม โต็ง, แตห แม ปึอน บอ นา หมึอม ดอน โมยว.

3 แคะ มึห อี หมึอม อี หมาน, แกวะ แตห แม เบลห แวน ดอ เหมา. แตห แม โนว ซีคยา อี หมึอม อี หมาน ตี, แตห อึณ ดึก ดี น็อห แม, แตห อึณ บอ ปี แม ฮอย อูน มากาแวะ ดี แมง แม.

4 เซ แม โบง ปาย ตี, บอ เฌาพรา บอ ดูอี กืน ดี บอ อึง แม.

5 แตห บอ น็อห บอ พึอม แม หณึม บึง เฌาพรา. แกวะ แตห แม บึง อางยาน โดว บรีม แม.

6 แคะ ปี โบง แม ดอน โมยว, แตห แม แตห เฌาพรา อึบ. เซ แม โบง ปาย ตี, อัน เฌา ดี บอ แตห แม นับ ปี ดี โลว โบง แม.

7 แกวะ แตห แม น็อห ตาง โกบ มึห แม อางยาน. แตห แม โรวเซ เฌาพรา บอ วัห อี ตู หมึอม.

8 เซ แม โบง ปาย ตี, อึณ ปี ซีนัม บอด, อี แตห โดง ดีม โดง เซา แม หราย, แตห บอ มาโบลม แม หราย.

9 แตห แม โรวเซ เฌาพรา บอ หลู ปี ซัม ปี ปีด แม, หลู เบล ดัง อี หมึอม อี เลห แคง มาน แม.

10 เซ แม โบง ปาย ตี, โหงว ดีฆาว ดี บอ โนะ ลูต แคง บูะ แคง ฆรัว แม. บอ อึม มางูน ดี บอ โนะ ลูต แคง แปรณ แม.

11 อึย ฆอน กาโณม โอว, เซ เฌาพรา มาโนว แม, แกวะ แวน ปี มาโนว อัน. เซ เฌาพรา แคร แม, แกวะ แตห แม ปึร.

12 โคว, เฌาพรา นับ ดี แตห ดัม ดี ดูอี ปี ร็อก อัน, ปี ฆูณ นับ ดี มาโนว ฆอน ปี อึง อัน.

13 เซ ดูอี มึห อางยาน บอ กาหลูห ดี น็อห อัน, ดูอี ตี แฮะ ดาคึย กาเซา.

14 โคว, อางยาน ตี มึห อาฆยึร หมึอม หลึอม รึอน เฆ ครีว.

15 อางยาน บอ ง็อห ตาง หลึอม แซณ เรณ. แคะ บอ มึห โกรวกราม, อาว มึห อี ปึอน กาเฆา ดี อางยาน ตี.

16 อางยาน ตี, อึณ ดี แตห อาซาก แม โต็ง, แตห แม ครัม, แตห แม มึห บอ ซาเร.

17 อึณ ดี แตห แม แบน น็อห ดาคึย, แตห แม ปึอน ดี กอย ซีคยา.

18 อาเซ ปึอน อางยาน ตี, อึณ ปี อัน แฮะ ปึอน เฮ อี แตห อาซาก ดี อัน. อาเซ แฮะ มึห อางยาน ตี, อัน ดี โบยว ดาคึย.

19 อางยาน ตี แฮะ แตห เฌาพรา โบง กาดาย. อี กาหลูห ดี น็อห อัน เฌา ดอน โมยว แฮะ แตห อัน โบง เบลห ฆางหราว.

20 โกบ ปี นับ อัน ดอน โมยว, อัน เฌา แฮะ แตห โดง ลึก กาเซา ดัห แตห อึม ปึอน ดี เลห. อัน เฌา มืร แฮะ แตห อึม ดีงาน บอ ฆลาย เลห แคง อึณอูะ.

21 อึย ฆอน กาโณม โอว, แตห แม บอ ปา รีด อางยาน อี นับ ดี กาย็อห อี หมึอม อี ตู หมึอม. แกวะ แตห แม แวน ดอ เหมา, แตห แม โหลห เซเซ.

22 อางยาน ตี ดี แตห แม มึห อาซาก, ตู แตห แม ยัม. อึณ แฮะ ปี แม แฮะ ฮอย มากาแวะ ดี แมง แม.

23 แม ดี บอ ปึอน ดี ฮาว โดบ อึณเตณ ปี โลว ฮาว แม, ตู แตห เปลา แม ตา ดูห ดี มาเซ.

24 ดอ อีด แม, แม มืร ตู โลว โยว มาเซ. แม ดี บอ ปึอน ดี อีด ซีคยา ดอง คืน.

25 แม มืร ตู โลว โยว อาเพ อาเร อี ตัห ดี เฆ ดูอี ฮาย, อี ตัห อู เฌณ ปี คูน ตาง.

26 เฌาพรา ดี บอ ยอด แมน แม, แตห แม กอย ดาคึย. อัน เฌา มืร ตู แตห แม คัม ดูก.

27 เซ อึณ มึห ดูอี ฆีน, แตห แม จอย แคะ ปี ปึอน แม จอย.

28 เซ แม แฮะ มึห ปี ดี จอย ดี ฆึก แม อาตึร, แม แกวะ ต็อห, “แตห แม บัร. แคหณา โอว ดี แตห.”

29 แม แกวะ คราม ดี โบง นา จีจีว แตห อึณ ดึร ฆึก แม อี กอย กาตัด แม, อี แฮะ หณึม น็อห แม.

30 เซ ดูอี อู วี ตู ดึอม กาเอห กาแทณ ดี แม, ตู ดึอม โบง นา จาว ดี แม, แกวะ แตห แม กาลูต กาแทณ ดี อัน.

31 แม แกวะ หลัยะ เฆ อี โบง นา ตู จีจีว ดี อี. แกวะ แตห แม มึห น็อห ซี โบง ปี เฆ ดอ เหมา.

32 โคว, เฌาพรา ฌ็อง เฆ ดูอี น็อห โฆะ. เฆ อี น็อห ซืร น็อห หมาน, อัน เฌา ยี แตห เฆ นับ ปี คราม อัน.

33 เฌาพรา บอ ดืง กาง เฆ ดูอี ตู หมึอม, วี ม็องการา แตห ดี กาง เฆ ดูอี อี มึห น็อห ซืร น็อห หมาน.

34 อัน เฌา บอ แนนัะ เฆ อี นับ ดี แนนัะ อี เฮา, วี เฆฌู เฆ อี มึห น็อห เตียม.

35 เฆ อี มึห อางยาน, เฆ ดี มึห ซาเร. เฆ ดูอี รึร, เฆ ยี โลว ซาย อี.